Salmos 79
79
Salmo 79
Sukan ka kuxii ini ñayii ñuu Jerusalén ma ja ni ka kenda koo ñayii ka sa'a ndeva'a ña'a ma
1Su'si maa sa, ni ka kenda koo ñayii masu ka kandija
ja ká'an ni a, te ni ka ndunda'a i ja kúu kuenda maa ni a,
te ni ka sa'a ndeva'a i ini veñu'u ii ni a,
te ni ka skendoo nda'vi, ni ka skendoo kee i ñuu Jerusalén ya.
2Te ni ka ja'ni i ñayii ka jinukuechi nuu ni ma,
te ni ka wa'a i yikikuñu ñayii ma ni ka jaa lasaa ma
ji'in kiti yuku ma.
3Te ni‑ka'nu yu'u ñuu Jerusalén ma ni ka jati i niñi ñayii
ni ka ja'ni i ma,
te ka jika ka jika‑nka niñi i ma kuenda tnu'u ja ndute,
te ñatuu na in iyo ja chu'u i ndiyi ma.
4Te ñayii ka iyo yatni ma, ka ka'an ndeva'a i, te ka jakundee ña'a i.
5¿Na saa‑ka kivi ndakiti ini ni nuu sa, Su'si?
¿Ni‑kani ni‑jika ndakiti ini ni nuu sa?
¿Na saa‑ka kivi kuiso ini ni ja ndákiti ini ni ma?
6Su'si, xndo'o xneni ni ñayii ka iyo in in ñuu ma
ja ka tatnuni‑ka i ma
te ñatuu ka ndakuni ña'a i maa ni ma
te ñatuu ka ndakune'e ña'a i ja maa ni kúu Su'si ma
te ka sa'a i ja ndákiti ini ni ma.
7Vaa ni ka xnaa i ndaka ja ka neva'a sa'ya tata Jacob ma,
te ni ka skendoo nda'vi, ni ka skendoo kee i ñuu de ma.
8Te máko sa'a ni ja saña jin ndachunaa ndaka kuechi
ni ka yo sa'a, ni ka yo kuu tna'a sa ñayii jana'a ma.
Su'va ndunda'vi ini ña'a ni, vaa ka ndo'o ka neni sa ya.
9Su'si maa sa, iya sa'a ja jin kaku sa ma,
sakanu ini ña'a ni ndaka ja u'vi ni ka yo sa'a sa ma,
te chindee ña'a ni ja na jin kaku sa,
sukan‑va'a na koo jayiñu'u nuu maa ni
ja kúnda'vi ini ña'a ni ma.
10Vaa nú ña'a, te jin ka'an ñayii ñatuu ka kandija i maa ni ma:
“Másu nde na'a ja iyo Su'si ñayii ya'a”, jin ka'an i.
Sa'a ni ja na jin kuni sa sukan ndakan ni kuenda
nuu ñayii ni ka ja'ni tee ka jinukuechi nuu ni a.
11Katanuu ni sukan ka tnana u'vi ñayii ka yinee vekaa ma,
te chindee ni i ji'in tnu'u ndee tnu'u ndatnu ni a,
sukan‑va'a jin kaku i te má jin ka'ni de i.
12Su'si Iya Tátnuni, sa'a ni ja uja‑ka jichi
jin ndando'o jin ndatna'a maa ñayii ka iyo yatni ji'in sa ya,
vaa ni ka ka'an ndeva'a ndekuu i ja kuu ni ma, vi Su'si.
13Te saña ja ka kuu sa ñayii ñuu ni a,
ja ka kuu sa ndikachi korraa ni a
chi jin kata sa te jin ndachiñu'u ña'a sa ni‑kani ni‑jika
ji'in sa'ya tata sa ma.
Currently Selected:
Salmos 79: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
