Salmos 78
78
Salmo 78
Ndaka ja vii ja va'a sa'a Su'si ma ja kuu ñayii ñuu ya ma
1Ndaka ni ja ka kuu o in‑ni ñuu,
jin koniniso'o ni tnu'u va'a káxtnu'u sa ya.
2Ká'an sa tnu'u ndichi ja ka iyo yu'u onde xi'na xeen‑ka ma,
sukan‑va'a jín ndasa'a o kuenda.
3Vaa jâ ni ka yo jiniso'o o
ja ni ka yo ndakani tna'a o ñayii jana'a ma,
te jâ ka ndasa'a o kuenda sukan ni sa'a Su'si ma.
4Te máko jin ko chu'u o nuu sa'ya tata o kii koo‑ka ma,
su'va jín ndaka'an jín ndakachi o nuu i
sukan iyo tnu'u ndee tnu'u ndatnu maa Su'si ma
ji'in ja sukan ni sa'a ya milagru ma,
te jín ndachiñu'u o ya.
5Vaa Su'si ma, maa tnu'u ni tatnuni ya nuu Jacob ma,
ni skendoo ya nuu tna'a o tee jana'a ñuu Israel ma,
sukan‑va'a jin ndaka'an jin ndakachi de nuu sa'ya tata de ma
sukan jin ko sa'a jin ko kuu ndaka i ma,
6sukan‑va'a jin kuni ndaka sa'ya tata de
jin kenda koo kivi ki'in o ma,
te maa i, te jin ndaka'an jin ndakachi tuku i nuu sa'ya tata i ma,
7sukan‑va'a jin kukanu ini tna sa'ya tata i ma nuu Su'si ma
te máko jin ndunaa i ndaka milagru ni sa'a, ni kuu ya ma,
te jín kona'a i ja jin sa'a i sukan tátnuni ya ma,
8te máko jin ko kuu i sukan ni ka yo kuu yuva i ma
ja ni ka yo kuu de in jichi ñayii inuso'o ma,
te ñatuu ni ka yo kandija de ja ni ka'an Su'si ma,
vaa ñatuu ni ka yo ñu'u ini de ja maa in‑ni Su'si o ma
jin kondikin de.
9Vaa sa'ya tata tee kúu Efraín ma,
visi kuan koo tu'va de ja jin kanaa de ma
chi ni ka ndakunu de ja ni ka yu'u de,
10vaa ñatuu ka ñu'u ini de ja jin sa'a de
sukan ni kaxtnu'u Su'si ma
sukan‑va'a jin koo va'a de ji'in ya ma,
te ñatuu ni ka kuu ini de ja jin kandija de
sukan ni tatnuni ya ma.
11Ni ka ndunaa de sukan ni sa'a ni kuu Su'si ma,
ja ni ka kaku de ma,
ji'in ja sukan ni kaxtnu'u ya milagru ni yo sa'a ya ma,
te ni ka ndunaa tna de sukan ni ka jini de milagru
ni yo sa'a ya ma.
12Te ndaka tna'a de ñayii jana'a ma
chi ni ka jini tna i ndaka milagru ni sa'a ya ñuu Egipto ma,
nuu ka iyo‑ka i ñuu Zoán ma.
13Te ni ka jini tna i sukan ni june ya nuu ndute mar ma,
te ni ndaxtutu ya ndute ma in in lado ma,
te ni ka ya'a ndaka ñayii ma.
14Te sa'a ni yo kuu ya ji'in i ichi kuan koo i ma,
vaa nduu ma chi in viko sasa'a‑ni kati yoxtnuu i
ichi kuan koo i ma,
te jakuaa ma in ñu'u ndu'va yoxtnuu
ichi kuan koo i ma.
15Te nuu yichi nuu ñatuu kuiti nawa iyo ma
ni ndakune ya in toto,
te ni too kua'a ndute, te ni ka ni'i i de ja jin ko'o i de ma.
16Te kuenda tnu'u ja in yute ka'nu kúu
nuu ni xtoo ya ndute ma me'ñu toto ma.
17Visi ni ka jini i milagru yukan ma,
kovaa ni ka yo sa'a‑ka i ja u'vi ma,
kuan koo i ichi nuu ñatuu kuiti nawa iyo ma,
vaa nuu yichi kuiti kúu ma,
te ñatuu ni ka kuni i ja jin kandija i ja ká'an Su'si
iya iyo onde sukun ma.
18Te ni ka jitotnuni i Su'si o ma
kóto nuna kua'a ya ja jin kaa i sukan ka kuni maa i ma.
19Te sa'a ni ka ka'an i ja kuu Su'si o ma:
“¿Kuiti ja kuu taa Su'si ma ndaka ndeyu jin kaa o vitnañu'ni,
te vitna ja masu nawa iyo kuiti nuu ka iyo o ya?
20Ja ndaa kúu ja ni ta'vi Su'si ma toto ma,
te ni too ndute kua'a xeen ma, te jika jika‑nka de ma.
¿Kovaa kuiti ja kuu taa tna ya xtatila jin kaa o?
¿Te kuiti ja kuu taa ya kuñu jin kaa o ja ka kuu o ñuu ya a?”,
ka kuu i ka ka'an i.
21Te ni jiniso'o Su'si ma sukan ka ka'an i ma,
te ni ndakiti xeen ini ya nuu ñayii ñuu Israel ma,
ja ka kuu i sa'ya tata Jacob ma,
22kuechi ja ñatuu nde ni ka kandija i Su'si ma
te ñatuu nde ni ka kukanu ini i ya
ja maa ya chindee ña'a te jin kaku i nuu ja u'vi ma.
23Kovaa Su'si ma chi ni tatnuni ya nuu viko
ka iyo onde andivi ma,
sani te viko ma, ni ka jan ndiyo i, te ni ndanune andivi ma.
24Te ni tetniñu ya ja nani maná ma,
sukan‑va'a jin kaa ñayii ma.
Sukan ni sa'a ya ja ni kuun triu onde andivi ma,
ja jin kaa i ma.
25Ndaka ñayii ma ni ka jaa xtatila ka jaa ángel ma
onde ni ka ndutu chii i ma.
26Te ni sa'a ya ja ni jaki'i nini'i tachi ichi nuu vee ma,
ichi ninu ma.
27Te ni sa'a ya ja ni kuun kuñu ni ka jaa ñayii ma,
vaa ni tetniñu ya kua'a xen‑xeen kiti ka nani kañu'u ma.
Ni kuun kua'a xen‑xeen ti nuu ka iyo i ma,
sukan kua'a ñuti kaa yu'u mar ma.
28Te ni sa'a ya ja onde me'ñu nuu ka iyo i ma ni ka kenda koo ti,
te nii nuu ka ndaa ve'e sa'ma nuu ka iyo i ma ni ka kenda koo ti.
29Te sukan ni sa'a ya ja ni ka ni'i i ja ni ka kuu ini i ma,
te ni ka jaa xeen i onde ni ka ndutu chii i ma.
30Kovaa masu nde ni ka ndajinu ini i ja ka jaa i
ja ni ka ndiyo ini i ma,
vaa ka ñu'u‑ka kuñu ma yu'u i ma,
31sani te ni ndakiti ini Su'si ma nuu i ma,
te ni sa'a ya ja ni ka ji'i ñayii ka ndaa ndee ka ndaa va'a‑ka ma,
ñayii ni ka yo jatnu'u ini‑ka ña'a ñayii ñuu Israel ma.
32Visi sukan ni sa'a ya milagru ma,
kovaa masu nde ni ka ndakunitnuni i
ja jin ndakuan‑ta'vi i nuu ya ma
chi su'va ni ka sa'a‑ka i ja u'vi ma.
33Chukan kúu ja ni sa'a ya
ja ni ka yo ndo'o, ni ka yo neni maa i ma,
te ni ka yo kuneé, ni ka yo ku‑uun maa i ma,
te ni ka skenaa i maa i ma.
34Te nuu ni sa'a ya ja ni ka ji'i ñayii
ñatuu ka kandija ja ká'an ya ma,
sani te ñayii ka teku‑ka ma,
ni ka yo ndanduku kunu kunu i ya nduu ñuu.
35Te onde sukan ni kuu ma,
sana ni ka ndaka'án i ja maa ya kúu Su'si
iya iyo onde sukun ma
te maa ya sa'a ja jin kaku i ma.
36Vivii ni ka yo ka'an i ja kuu Su'si ma,
kovaa masu inundija i ja ni ka yo ka'an i ma.
37Vaa másu ka iyo ndaa ini anua i ma nuu Su'si ma,
vaa másu nde ni ka yo sa'a i ja ni ka skuiso i nuu Su'si ma,
nuu ni tatnuni ya naxe jin ko sa'a i
sukan‑va'a jin koo va'a i nuu ya ma.
38Kovaa maa ya chi ni kunda'vi ini ya i,
te ni sakanu ini ya ndaka ja u'vi ka sa'a i ma,
te ñatuu nde ni sa'a ya sukan ni yo jani ini ya
ora ni yo ndakiti ini ya nuu i ma.
39Ni ndaka'án ya ja yikikuñu‑ni ka kuu i,
vaa ñuñu'ni‑ni ka iyo i ñuu ñayivi a te jin kûu i,
te másu jin ndakokuiñi‑ka i ñuu ñayivi a.
40¡Na saa‑nka jichi ni ka yo sa'a so'o i te ñatuu ni ka yo kandija i,
te ni yo kuxii ini ya,
vaa ñatuu ni ka yo sa'a i sukan ká'an ya ma
nani ka jika i kuan koo i ichi nuu ñatuu kuiti nawa iyo ma!
41¡Na saa‑nka jichi ni ka yo jitotnuni i Su'si ma
nú kuu chindee ña'a ya xi ña'a,
te ni ka yo sa'a i ja ni yo ndakiti ini Su'si iya ii ñuu Israel ma!
42Te ñatuu ni ka yo ndaka'án i sukan ni yo chindee ña'a ya ma,
ja ni ka kaku i nuu ñayii ni ka yo xndo'o, ni ka yo xneni ña'a ma.
43Te ni ñatuu nde ni ka yo ndaka'án i milagru ni sa'a ya ma
nuu ka iyo‑ka i ñuu Egipto ma,
ja vivii ni yo jito va'a ya i nuu ka iyo‑ka i ñuu Zoán ma,
44nuu ni sa'a ya ja ndaka ndute jika yute ma, ni nduu de niñi ma,
sukan‑va'a ni‑in‑ka ñayii ñuu Egipto ma kuu ko'o‑ka ndute ma.
45Ni tetniñu ya kua'a xeen tiukun ja ni ka xnaa ti nawa iyo ma.
Te ni tetniñu ya kua'a sa'va ja jin xtna'a ti ñayii ma.
46Te ni tetniñu ya kua'a tika langosta
ja ni ka jaa ti ndaka ja ni kuu itu ñayii yukan ma.
47Te ni sa'a ya ja ni kuun ñiñi,
te ni naa ndi'i kuiti itu ñayii yukan ma,
ji'in ndaka yutnu kui'i ka iyo ñuu yukan ma.
48Te ndaka kiti ka ndeka ñayii ñuu Egipto ma, ni ka ji'i ti,
ja ni ka kani ña'a tajan ma, ji'in ja ni kuun ñiñi na'nu ma.
49Te ni tetniñu ya in jichi ángel ma,
ja ni ki koo i ni ka xnaa i ñuu Egipto ma,
vaa ni ndakiti xeen ini ya nuu ñayii ñuu yukan ma.
50Te ni masu nde ni sakanu ini‑ka ya ñayii ñuu yukan ma,
su'va ni wa'a ya tnu'u ja ni ka ji'i maa i
nuu ndaka kue'e ni tetniñu ya ñuu yukan,
vaa ni ndakiti xeen ini ya nuu i ma.
51Te ni sa'a ya ja ni ka ji'i ndaka sa'ya ñayii ñuu Egipto ma
suchi yii xinañu'u ma,
ja ka iyo i ne'un sa'ya tata tee ni yo nani Cam ma.
52Te ni ndene'e ya ndaka ñayii ñuu Israel ma, te ni yo jito ya i,
sukan kúu in tee jito ndikachi de ma,
te ni skaka ya i ichi nuu ñatuu kuiti nawa iyo ma.
53Te ni kaxtnu'u ya ja iyo ya ji'in i,
sukan‑va'a masu nawa jin koyu'u i,
te ni sa'a ya ja ñayii ñatuu ka kunimani nuu i ma,
ni ka kandee i nuu ndute mar ma, te ni ka ji'i i.
54Sani te ni skaka ya ñayii kúu ñuu ya ma
kuan koo i onde ni ka kivi koo i nuu kúu ñuu ii ma,
te nda'a kua'a ya ma ni sa'a ja ni ka kundee i
nuu ñayii ka iyo ñuu yukan ma.
55Ndi‑tna'a kuan koo i ma,
te maa ya ni kene'e ndaka ñayii ka iyo ñuu yukan,
sani te ni wa'a ya nuu jin koo in jichi in jichi sa'ya tata
tee kúu Israel ma.
56Kovaa ni ka sa'a i ja ni ndakiti ini Su'si o iya iyo onde sukun ma,
vaa ndimaa ni ka yo jitotnuni i ya,
te ñatuu ni ka yo kandija i ja jin sa'a i
sukan ni tatnuni ya ma.
57Su'va sukan ni ka yo sa'a yuva i ma, sukan ni ka yo sa'a tna i,
te ka kuu i sukan kúu in kuji ja nde'ya o ma chi iyo va'a i,
kovaa nuna kuatniñu o ma chi tna'nu i.
58Ni ka sa'a i ja ni ndakiti ini ya,
vaa ni ka yo sa'a i altar onde nuu yuku sukun‑ka ma,
te ni ka yo ndachiñu'u i tna'a ja masu Su'si ka kuu ma,
tna'a ja ni ka yo sa'a maa i ji'in nda'a i ma.
59Te ni jini Su'si ma ndaka ja ka sa'a i ma, te ni ndakiti xeen ini ya,
te ni saxiko ya ndaka ñayii ñuu Israel ma.
60Te ñatuu ni iyo‑ka ya ini ve'e nuu ni ka sa'a i ja koo ya ma,
sukan‑va'a koo ya me'ñu ndaka i ma nkuu.
Chukan kúu ja nuu ka iyo i ñuu Silo ma chi ni skendoo ya i.
61Te ni wa'a ya tnu'u ja ñayii in‑ka ñuu
ja ñatuu ka kunimani i nuu ya ma,
ni ka ndunda'a maa i nuu ni yo kenda jayiñu'u ya ma
ji'in tnu'u ndee tnu'u ndatnu ya ma.
62Ûni ni ndakiti xeen ini ya nuu ñayii kúu ñuu ya ma,
te ni wa'a ya tnu'u ja ni ka kundee maa ñayii in‑ka ñuu ma
ja ni ka ja'ni i ñayii kúu ñuu ya ma.
63Vaa suchi yii ma suchi jaa ma, nuu ñu'u i'ni ma ni ka kayu i,
te ni ka ji'i i,
te suchi si'i ma suchi jaa ma, ni ka sa'a ndeva'a ña'a i,
te masu nde ni kuu vii ni kuu luu ja jin tnanda'a i ma.
64Te tee ka kuu sutu ma, ni ka ja'ni ña'a ñayii ma
ji'in yuchi kúu espada ma.
Te ñasi'i de ni ka ndoo ma, masu nde ni kuu jin konda'yu ña
ja jin kuxii ini ña ja ni ka ji'i de ma.
65Kovaa ni ndaka'án Su'si ma sa'ya tata ñayii ñuu Israel ma,
te ni chindee ya i, te ni kayu'u nini'i ya
sukan kúu in tee kua'an ja kanaa de.
66Te sani te ni kundee ya nuu ñayii ka kuni u'vi nuu ñuu ya ma,
te ni sa'a ya ja ni ka ndakunu i kuan nu koo i,
te ni ka ndatna'a maa i ja kan‑nuu ni‑kani ni‑jika.
67Ni saxiko ya sa'ya tata José ma,
te ñatuu ni kaji ya sa'ya tata Efraín ma.
68Te ni kaji ya sa'ya tata Judá ma ji'in yuku nani Sion ma,
yuku kutoo ya ma.
69Te ni sa'a ya ja ni ka sa'a i in veñu'u nuu koo ya
te jin ndachiñu'u i ya ma,
te ni sunkani va'a ya sukan ni sunkani va'a ya ñu'ú ya,
sukan‑va'a koo va'a i ni‑kani ni‑jika.
70Te ni kaji ya David ma, nuu iyo de ja jito de ndikachi de ma,
sukan‑va'a kunukuechi de nuu ya.
71Ni jan nu kueka ya de nuu yikuu‑ka de jito de ndikachi de ma,
sukan‑va'a ko koto va'a de ñayii ñuu ya ma
sukan ni yo jito de ndikachi de ma.
72Te David ma chi ni‑yu'u ni‑ini de
ni yo jito va'a de ñayii ñuu Su'si ma,
te ni yo jini de naxe skaka de i ichi va'a ma.
Currently Selected:
Salmos 78: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
