Salmos 80
80
Salmo 80
Sukan jin kakan‑ta'vi o nuu Su'si ma ja na chindee ña'a ya
1Su'si iya jito ñuu Israel ma,
ja kúu ni sukan kúu tee jito ndikachi de ma,
ja jito va'a ni sa'ya tata José ma
te iyo ni ne'un ángel ka nani querubín ma,
kaxtnu'u ni ja iyo ni te koniniso'o ni ja ka ka'an sa ya.
2Sa'a ni ja jin kaku sa ja ka kuu sa sa'ya tata Efraín ma,
ji'in Benjamín ma, ji'in Manasés ma,
sukan‑va'a jin kuni sa tnu'u ndee tnu'u ndatnu ni a.
3Su'si maa sa, sa'a ni ja na jin ndasa'a sa
sukan ni ka yo sa'a sa onde xi'na‑ka ma
nuu ni ka iyo vii, ni ka iyo va'a sa nuu ni ma.
Te ndakonde'ya vii ndakonde'ya va'a ña'a ni,
te máko ndakiti‑ka ini ni nuu sa,
sukan‑va'a jin kaku sa.
4Su'si iya tátnuni nuu kua'a xeen ángel ma,
¿na saa‑ka kivi káxtnu'u ni ja ndákiti ini ni nuu ñayii ñuu ni a?
¿Te na saa‑ka kivi sana koniniso'o ni ja ka jikan‑ta'vi sa nuu ni a?
5Vaa kuenda tnu'u ja ndeyu sa xi ndute sa
kúu ja ka kuxii ka kunda'vi ini sa ma te ka nda'yu sa ma.
6Te ni sa'a ni ja ni ka yo jakundee ña'a
ñayii ka iyo yatni ji'in sa ma,
te ñayii ñatuu ka kunimani nuu sa ma,
te ka jakundee ña'a i ja sukan ka kuu sa ma.
7Su'si maa sa, iya tátnuni nuu kua'a xeen ángel ma,
sa'a ni ja jin ndusii ini sa
sukan ni ka yo iyo sa onde xi'na‑ka ma,
te ndakonde'ya vii ndakonde'ya va'a ña'a ni,
te máko ndakiti‑ka ini ni nuu sa,
sukan‑va'a jin kaku sa.
8Ni ndene'e ña'a ni onde ñuu Egipto ma,
ja ka kuu sa sukan kúu in tnu uva ma,
te ni xtandiyo ni ndaka‑ka ñayii ka iyo ñuu yukan
ja ñatuu ka kandija i ja tátnuni ni ma,
te ni ndataa ni ñuu yukan ja ni ka nukoo sa.
9Ni ndasavii ni ñu'ú nuu ni ndasunkoo va'a ña'a ni ma,
ja ka kuu sa sukan ka kuu tnu uva ma,
te ni ka ndukua'a sa, te ni ndachitu ñuu ñayivi a.
10Te ni koko tnu uva ma te ni‑ka'nu ni‑tu'u ni ndasa'a kati tnu,
vaa onde yutnu inusukun‑ka ma, ni ka ka koo nda'a tnu uva ma,
11te ni ka kenda koo nda'a tnu a onde nuu mar ma,
te onde ini yute nani Eufrates ma ni ka nana koo sa'ya tnu ma.
12¿Te nava'a ni skotuu ni ja ndesi tnu uva ma,
te ndaka ñayii ka ya'a kuan koo i ma, te ka kune'e i uva ma?
13Te chikini yuku ma, ka jaxi ti tnu kuan koo ti,
te kiti yuku ma, ka kokon ti tnu kuan koo ti.
14Su'si iya tátnuni nuu kua'a xeen ángel ma,
onde andivi nuu iyo ni a konde'ya ña'a ni,
te kunda'vi ini ña'a ni,
te ki ndi koto ña'a ni,
ja ka kuu sa tnu uva ni ma.
15Vaa maa ni ni sunkoo tnu uva a,
te sa'ya tnu ma, ni ndasunkoo va'a ni tnu,
sukan‑va'a kuenda maa ni ko kuu tnu.
16Jâ ni ndonda ni nuu sa ma, vaa ni xndoo ña'a ni,
te ni ka ja'nde ña'a i, te ni ka ja'mi ña'a i,
te kuenda tnu'u ja ni ka naa sa nkuu.
17Kovaa chindee ni sa'ya tee ni kaji maa ni ma
te ni iyo de xiñi kua'a ni a,
vaa maa ni ni sunkani de ja kuatniñu maa ni de ma.
18Te sukan, te masu jin kakayata sa nuu ni,
vaa maa ni sa'a ja jin koteku sa,
te maa sa chi jin ndakune'e ña'a sa.
19Su'si maa sa, iya tátnuni nuu kua'a xeen ángel ma,
sa'a ni ja jin ndusii ini sa sukan ni ka yo iyo sa
onde xi'na‑ka ma,
te ndakonde'ya vii ndakonde'ya va'a ña'a ni,
te máko ndakiti‑ka ini ni nuu sa,
sukan‑va'a jin kaku sa.
Currently Selected:
Salmos 80: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
