Salmos 77
77
Salmo 77
Jín ndasa'a o kuenda ndaka ja vii ja va'a sa'a Su'si ma
1Ni‑yu'u ni‑ini sa ndákune'e sa Su'si ma,
te ora ndákune'e sa ya ma chi jiniso'o ya ja jiña'a sa ya ma.
2Te kivi ni yo ndo'o, ni yo neni sa ma,
te ndaka jakuaa ma ndánduku sa Su'si iya tátnuni nuu o a,
te skata nda'a skata nda'a sa nuu ya,
te jikan‑ta'vi jikan‑ta'vi sa nuu ya ja na chindee ña'a ya.
Kovaa ñatuu ni ndani'i sa tnu'u kanu ini,
vaa kúxii xeen ini sa ma.
3Te ndáka'án sa sukan vii sukan va'a ini Su'si ma, te nda'yu sa,
kovaa ndása'a sa kuenda sukan ndó'o néni sa ma,
te ndákuxii tuku ini sa.
4Kovaa maa ni, vi Su'si, másu nde ni taa ni tnu'u ja kusu sa ma,
chi vaa ndó'o néni sa ma, te ni masu nde kúu ka'an‑ka sa ma.
5Ndáka'án sa sukan ni yo kuu sa ji'in ni onde xi'na‑ka ma.
6Te ndáka'án sa sukan ni yo jita sa ndaka jakuaa ma
ja ni yo ndachiñu'u ña'a sa ma, te ndákani ndáka'vi ini sa.
Te jikan‑tnu'u sa maa sa:
7“¿Kuiti ja ni‑kani ni‑jika ndakiti ini Iya Tátnuni ma nuu o a
te xndoo ña'a ya?
¿Te ma ndunda'vi ini‑ka ña'a ya?
8¿Kuiti ja ñatuu kútoo‑ka ña'a ya?
¿Jâ ni ndunaa ya ndaka ja ni skuiso ya nuu o ma?
9¿Jâ ni ndunaa Su'si ma sukan kúnda'vi ini ña'a ya ma?
¿Ndákiti xeen ini ya nuu o?”,
Sa'a ka'án sa.
10Te ja tna‑u'vi xeen ini sa kúu ja ñatuu iyo‑ka ni ji'in sa,
ja chindee ña'a ni sukan ni yo sa'a ni onde xi'na‑ka ma, vi Su'si.
11Te ndáka'án sa ndaka milagru ni yo sa'a, ni yo kuu ni
onde xi'na‑ka ma nuu tna'a sa ñayii jana'a ma, vi Su'si.
12Te ndákani ndáka'vi ini sa ndaka ja vii ja va'a sa'a ni ma,
te ndáka'an ndákachi sa nuu ñayii ma ndaka ja sa'a ni ma.
13Su'si maa sa, iya ii kúu ni, te masu na in‑ka su'si iyo
ja kuu sa'a ndaka sukan sa'a maa ni a.
14Maa ni kúu Su'si iya sa'a milagru,
vaa maa ni káxtnu'u tnu'u ndee tnu'u ndatnu ni a
nuu ñayii ñuu ñayivi a.
15Te ja maa tnu'u ndee tnu'u ndatnu ni ma,
te ni sa'a ni ja ni ka kaku ndaka ñayii
ka kuu sa'ya tata Jacob ma ji'in José ma
ja ka kuu i ñayii ñuu ni ma.
16Te nuu ni jini ña'a ndute ma maa ni ma, vi Su'si,
te onde ka'a ndute ma ní'i ní'i‑nka ja ni yu'u de ja ká'an ni ma,
te ni kandija de ja ni tatnuni ni ma.
17Te suni viko tna ma, ka kandija i ja tátnuni ni ma,
vaa sani te kúun savi ma, te jándute ni‑ka'nu andivi ma,
te kána savi ma.
18Vaa maa ni sa'a ja jándute ma, te ni‑ka'nu ñuu ñayivi a yé'e ni'ni,
te kána savi ma ora ndákavanuu tna'a ndákavanuu tna'a‑nka
viko ma, vi Su'si.
19Maa ni ni jika ichi nuu mar ma
kovaa masu nde ka na'a ja'a ni a ichi nuu ni ya'a ni ma.
20Te ni sa'a ni ja Moisés ma ji'in Aarón ma
ni ka skaka ñayii ñuu ni ma.
Kuenda tnu'u ja sukan kúu tee jito ndikachi de ma,
sukan ni ka yo kuu de nuu ñayii ma.
Currently Selected:
Salmos 77: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
