Salmos 76
76
Salmo 76
Su'si ma chi masu na in kundee nuu ya
1Ndaka ñayii ñuu Judá ma chi ka jini i Su'si o a.
Te ñayii ñuu Israel ma chi ka ndachiñu'u i ya.
2Te veñu'u nuu ka ndachiñu'u i ya ma
kátuu nuu yuku nani Sion ma ja iyo i ñuu Jerusalén ma.
3Te yukan ni sa'a ya ja ni ka tna'nu tna'a ja ka jasi i maa i ma
sukan‑va'a ñatuu nawa kaki'i ña'a ma,
ji'in yuchi ka kuu espada ma, ji'in flecha ma,
ji'in ndaka‑ka ja ka jatniñu i ja ka kanaa i ma.
Sukan ni ja'nu ya ndaka.
4Vivii kúu ni, vi Su'si, te iyo kua'a‑ka jayiñu'u ni
sana yuku na'nu ma ja vivii ka ndaa i ma.
5Ñayii inundee ini ma, ni ka skenaa i maa i.
Suni ñayii ka neva'a tnu'u ndee tnu'u ndatnu ma,
masu nawa ni kuu jin sa'a ndaka i.
Ni ka kixi i, te ni masu jin ndoto‑ka i.
6Su'si iya ni yo kukanu ini tee ni yo kuu Jacob ma,
nú maa ni na sunkani tee yoso caballu ma
ja masu nawa sa'a‑ka de ma,
te caballu ñú'u carreta ma, masu nawa kuu sa'a ti
ja chíndee ti de ma.
7Kovaa nuna ndákiti ini ni ma,
chi masu na in kundee ja konukuiñi i nuu ni a.
Vaa Su'si iya ndákan kuenda kúu ni,
te chukan kúu ja jin koyu'u ña'a sa.
8Onde andivi ma iyo ni,
te ká'an ni naxe jin ndo'o jin neni ñayii ma,
nú ma jin kandija i ja tátnuni ni ma.
Te onde ñu'ú ya ni ka nduu nañii i
ja ka yu'u i ja ká'an ni ma
9ora ndokuiñi ni ja ndakan ni kuenda
nuu ñayii ñuu ñayivi a, vi Su'si,
te sa'a ni ja jin kaku ñayii ka ndaa kuee ini ma.
10Ja ndaa ndija kúu ja ora ndákiti ini ñayii ma nuu ni ma
chi su'va ndáni'i ni jayiñu'u, vi Su'si.
Te visi ka ndakiti xeen ini i nuu ni ma,
kovaa másu jin kundee i, vaa maa ni kúu Iya Tátnuni.
11Jín skuiso o nawa jín ndakua'a o nuu Su'si iya tátnuni nuu o a,
te ndaka o ja ka iyo yatni o nuu iyo Su'si
iya ndakan ndaa kuenda nuu ndi‑in ndi‑in o ma,
jín kinda'a o nawa jin ndakua'a o ya.
12Te maa ya xnaa ndaka sa'ya tee ka netniñu ma
ja ñatuu ka sa'a de sukan kúni ya ma,
te sukan, te jin koyu'u de ja ka kuu de rey
ka tatnuni ñuu ñayivi a.
Currently Selected:
Salmos 76: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
