Salmos 72
72
Salmo 72
Sukan ni jikan‑ta'vi rey ma nuu Su'si ma ja na chindee ña'a ya ja ka'nde ndaa de tniñu ñayii ma
1Su'si maa sa, kua'a ni tnu'u ndaa tnu'u ndija ni a rey ya,
sukan‑va'a kuu ka'nde ndaa de tniñu ndi‑in ndi‑in ñayii ma.
Te sukan sa'a tna ni ja kuu sayii de ma.
2Te rey ya, na sa'a ndaa na sa'a ndija de ja jin kuu ñayii ñuu ni a,
ji'in ñayii ka kunda'vi ka kukee ma
te ka kukanu ini ña'a i maa ni, vi Su'si.
3Te ndaka ja iyo onde yuku ma, ji'in nuu tinduu ma,
na jin sa'a i ja jin koo sii ini ñayii ñuu ni ma
te kóo tnu'u ndaa tnu'u ndija ni a nuu ñayii ñuu ni ma.
4Te rey ya, na sa'a ndaa na sa'a ndija de
ja jin kuu ñayii nda'vi ka iyo ñuu ni a.
Te sa'a de ja jin kaku ñayii ka ndo'o ka neni
ja ka sa'a ndeva'a ña'a in‑ka ñayii ma,
te xnaa de ñayii sa'a ndeva'a ñayii ñuu ni ma.
5Te rey ya, ndaka kivi koteku de ma kóyu'u de,
nasa yukan, te sa'a de in ja ñatuu játna ini ni, vi Su'si.
6Te su'va ja sa'a de ma kó kuu sukan kúu ora kúun savi ma
xi sukan kúu ora núu yuyu ma nuu ñu'ú a,
ja vivii ndóyo ni‑ka'nu nuu ñu'ú a,
ji'in ni‑ka'nu siki kuii ma, te vivii núkona'a ma.
7Te ndaka kivi tatnuni de ma,
te vivii ká'nde ndaa de tniñu ñayii ma,
te vivii jín koo mani ndaka ñayii ma,
onde kenda kivi ja masu kenda‑ka yoo ma
ja kotnuu ora jakuaa ma.
8Te na tatnuni de onde nuu ka jakituu mar ma
ni‑ka'nu ñuu maa de ma.
9Te sa'a ni, vi Su'si, ja ndaka ñayii ka iyo
nuu ñatuu kuiti nawa iyo ma,
ndaka ñayii ñatuu ka kunimani nuu de ma,
na jin jakindeyi i te na jin kenda koo nuu i ma
onde nuu ñu'ú ma,
ja jin kuandetu i nuu de ma.
10Te ndaka rey ka iyo ñuu Tarsis ma,
ji'in ndaka rey ka iyo yu'u mar ma,
ji'in rey iyo ñuu Sabá ma,
ji'in rey ñuu Seba ma,
kí koo de kí xsia'a de ja jin skuta'vi de rey ya.
11Te ndaka‑ka rey ma, jín ndachiñu'u de rey ya,
te ni‑ka'nu ñuu ñayivi a, na jin kunukuechi i nuu rey ya.
12Vaa maa de chi chindee de ñayii nda'vi ñayii kee ma,
te jin kaku i nuu tnundo'o tnuneni ma,
te chindee de ñayii ka jiniñu'u ja na in chindee ña'a ma.
13Te kunda'vi ini de ñayii ka kunda'vi ka kukee ma,
te kua'a de ja jin kaa ñayii ñatuu nawa ka neva'a i
ja jin kaa i ma,
sukan‑va'a jin koteku i.
14Te másu kua'a de tnu'u ja jin sa'a ndeva'a
ñayii ka ni'i ka tna'a‑ka ma ñayii nda'vi‑ka ma,
te másu kua'a de tnu'u ja jin kati niñi i ma
te jin skenaa i maa i ma,
vaa ñayii nda'vi ma chi ñayii ka ndanuu
ka kuu tna i nuu rey ma.
15Na koteku kani rey ya,
te na ki koo i kí xsia'a i oro iyo ñuu Sabá ma,
te jín kakan‑ta'vi jín kakan‑ta'vi ñayii ma nuu Su'si ma
ja kuu rey ya.
Te ndaka kivi, jín ka'an i ja va'a ja kuu de.
16Te visi vala‑ni ja jin saka ñayii ma nuu yuku ma,
kovaa kua'a xeen na jin ndaxtutu i.
Sukan ka ndaxtutu ñayii ma
ja ka kuu xeen ñu'ú ñuu Líbano ma,
te ndaka ja jin saka i ma, te kóo sukan iyo yi'i yuku ma,
te na koo kua'a xeen ja jin ndaxtutu i.
17Te na jin ndakune'e i rey ya ni‑kani ni‑jika,
te kóo xeen jayiñu'u de nani ndito téku de.
Te ja maa de, te na jin kuta'vi ñayii ndaka ñuu ma
ja vii ja va'a,
te ndaka ñayii ma, sa'a na jin ka'an i:
“¡Naka vii naka va'a kúu rey ya!”,
jin ka'an i.
18Ja vii ja va'a kúu Su'si iya Tátnuni ñuu Israel ma,
vaa maa in‑ni ya kúu iya sa'a milagru.
19Te ni‑kani ni‑jika na koo jayiñu'u ya ni‑ka'nu ñuu ñayivi ya,
vaa ja vii ja va'a kúu ja sa'a ya ma,
te na jin ndachiñu'u i ya.
Te sukan kó kuu, te sukan kó kuu.
20Te ya'a ni jinu ja ni jikan‑ta'vi David ma, tee kúu sayii Isaí ma.
Currently Selected:
Salmos 72: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
