Salmos 73
73
Salmo 73
LIBRO III
Sukan jin ndando'o jin ndatna'a maa ñayii ka sa'a ja u'vi ma
1Ja ndaa ndija kúu ja Su'si ma
chi sa'a ya ja va'a ja jin kuu ndaka yo'o
ja ka kuu o ñayii ñuu Israel ya.
Maa ya chi sa'a ya ja va'a ja jin kuu ñayii
ka iyo vii ka iyo ndoo ini anua i nuu ya ma.
2Kovaa saña chi vala‑nka‑ni nkuu,
te kendeka sa nuu ja u'vi ma, te skenaa sa maa sa nkuu.
3Vaa kuechi ja nde'ya sa ja ñayii ka sa'a ja u'vi ma,
te ka ni'i ka tna'a i ma, te ka sa'a vixi i maa i ma.
4Te nde'ya sa ja másu nawa ka ndo'o ka tna'a i ma,
te ka iyo sii ini i, te ka iyo ndee ka iyo ndatnu i ma.
5Te masu nde ka satniñu xeen i
sukan ka kuu‑ka sava ñayii ka satniñu xeen ma,
te ni masu nde ka ndo'o ka neni i
sukan ka ndo'o ka neni‑ka sava ñayii ma.
6Te chukan kúu ja ka jani ini i ja jayiñu'u xeen kúu
ja ka sa'a i ma
te ja vii xen‑xeen kúu
ja ka sa'a ndeva'a i in‑ka ñayii ma.
7Te onde nduchinuu i ma ndijin
ja nanimaa ja u'vi ka ñu'u ini i ja jin sa'a i ma,
vaa ûni kua'a xeen ja u'vi ka ñu'u ini i ma.
8Ka jakundee i ñayii ma,
te ka ka'an u'vi i ja jin kuu ñayii ma,
te onde nuu ñayii ma, te ka jiña'a i naxe ka jani ini i ma.
Te ka sa'a ndeva'a i ñayii nda'vi ma,
te ka jani ini i ja maa i‑ni ka kuu‑ka.
9Te ka ka'an u'vi i ja kuu Su'si ma, iya iyo onde andivi ma,
te ka kunuu maa ja ka ka'an i ma nuu ñayii ma.
10Te chukan kúu ja ndaka ñayii ma ka kandija
ja ka ka'an ñayii ka sa'a ja u'vi ma,
te ka jan koo i ka jan tu'va‑ka i ñayii yukan,
vaa ka jani ini i ja va'a xeen‑ni kúu ja ka sa'a ñayii yukan ma.
11Te ka ka'an i:
“Másu kuni Su'si ma ndaka ja ka sa'a o a.
Iya iyo onde sukan ma ni masu ndasa'a maa ya kuenda”,
ka kuu i ka ka'an i.
12Jin konde'ya ni, te jin kuni ni ja ñayii ka sa'a ja u'vi ma,
ja masu nde ka ndo'o ka neni i,
te ve jin kuxiku xen‑xeen i.
13Te nú sukan, masu nde jiniñu'u
ja ni‑in ja u'vi ñatuu nde sa'a sa a, jani ini sa,
te masu nde jiniñu'u
ja jito va'a sa maa sa ja ñatuu na ja u'vi
ko sa'a sa ji'in nda'a sa a, jani ini sa.
14Te saña chi nii nduu ma ka xndo'o ka xneni ña'a ñayii ma,
te nú ni ndatuu ni ndandii sa in‑ka kii ma,
in‑ka tuku jichi ka xndo'o ka xneni ña'a i.
15Kovaa ñatuu ni wa'a sa tnu'u ja kani ini sa
sukan ka jani ini i ma
te ka'an sa sukan ka ka'an i ma
chi nute ni sa'a sa sukan ma
chi ja kuechi sa ma,
te ma jin kaka ndaa ñayii ñuu ni ma, vi Su'si.
16Kovaa nuu ni ndakani, ni ndaka'vi ini sa ma,
te ni ndasa'a sa kuenda ja yii xeen kúu ja jaku'ni ini o
ja maa in‑ni o ma.
17Nú masu ja onde ni kivi sa ve'e ii Su'si ma,
te yukan, sana ni jaku'ni ini sa
na ndenu jin kenda koo ñayii ka sa'a ja u'vi ma,
visi ka ni'i ka tna'a maa i ñuu ñayivi a.
18Vaa ja ndaa kúu ja sukan ka sa'a ka kuu maa i ma,
te ni sunkani ni i nuu ndi'vi xen‑xeen ma,
te maa ni sa'a ja jin kendeka ja'a i ma,
te jin skenaa i maa i ma.
19Te sanaa sanaa‑ni, te jin kûu i,
te ndaka maa ja u'vi ka sa'a ka kuu i ma
sa'a ja jin ndayu'u xen‑xeen i.
20Kivi kenda ja ndokuiñi ni ma, vi Su'si
chi sukan‑ni kúu in ja jani o ora kixi o ma
ja nú ni ndoto o ma sani te ni ndunaa o ma,
sukan‑ni jin ko kuu ñayii yukan nuu ni.
Vaa visi ka jani ini i ja maa i ka kuu‑ka
kovaa maa ni chi su'va saxiko ni i.
21Saña chi ni yo kuxii, ni yo kunda'vi ini sa,
te ûni ni yo tna‑u'vi ini anua sa a
ja nde'ya sa ja sukan ka kuu i ma.
22Vaa ûni ni ñatuu ni kuu jaku'ni‑ni ini sa ma,
te sukan kúu in kiti, sukan kúu sa nuu ni ma nkuu, vi Su'si.
23Visi ndaka sukan ni yo sa'a, ni yo kuu sa ma,
kovaa masu nde ni xndoo ña'a ni, vi Su'si,
su'va ni yo tnii ni nda'a kua'a sa a.
24Te ni ka'an, ni kachi ni nuu sa naxe ko sa'a ko kuu sa ma
te sukan ndikin ña'a sa sa'a sa a.
Te nuna jinu ma, te ndakuan‑ta'vi ña'a ni nuu iyo ni a,
te koo jayiñu'u sa, vi Su'si.
25Ñatuu na in‑ka Su'si sa iyo onde andivi a,
nú masu ja maa in‑ni ni, vi Su'si,
te nú iyo sa ji'in maa ni, masu nawa nde‑u'vi ini sa
ja iyo ñuu ñayivi a.
26Visi na kuita maa yikikuñu sa a ji'in ini anua sa a,
kovaa maa ni ndachindee ndachituu ini anua sa a, vi Su'si,
vaa maa ni iyo ja koo ji'in sa ni‑kani ni‑jika.
27Ñayii ka kujika nuu ni ma, jin skenaa i maa i,
vaa maa ni chi xnaa ni ndaka ñayii ñatuu ka kuni
ja jin kondikin ndaa ña'a i maa ni ma, vi Su'si.
28Kovaa saña chi ja va'a xeen kúu ja koo yatni sa
nuu Su'si Iya Tátnuni ma,
te kúkanu ini sa ya, vaa suu ya ndetu sa ja chindee ña'a ya,
sukan‑va'a ndaka'an ndakachi sa nuu ñayii ma
ndaka ja va'a ja sa'a ja kúu ya ma.
Currently Selected:
Salmos 73: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
