Salmos 71
71
Salmo 71
Sukan jikan‑ta'vi in tee nija'nu nuu Su'si ma
1Nuu maa ni kúkanu ini sa ja kaku sa, vi Su'si.
Te má kua'a ni tnu'u ja tná'a sa ja kan‑nuu.
2Ja maa tnu'u ndaa tnu'u ndija ni a,
te koniniso'o ni ja ká'an sa ya,
te chindee ña'a ni ja kaku sa nuu ja u'vi ma.
3Te ko kuu ni in nuu toto nuu ndimaa kuu kenda sa
te koxtnee va'a sa te kaku sa nuu ñayii ka sa'a ja u'vi ma,
vaa nuu maa ni kúu nuu kuu chu'u sa te kaku sa ma.
4Su'si maa sa, chindee ña'a ni ja na kaku sa
nuu ñayii ka sa'a ja u'vi ma te ka ja'ni tna'a i ma.
5Vaa onde nuu jaa sa ma kúkanu ini ña'a sa
ja maa ni kúu iya sa'a ja koo va'a sa.
6Te onde nuu ñunee sa chii si'i sa ma,
maa ni ni yo jito‑va'a ña'a,
te maa ni ni sa'a ja ni kâku va'a sa ma.
Te chukan kúu ja ni‑kani ni‑jika ndachiñu'u ña'a sa.
7Visi kua'a ñayii chi ka jatnu'u ini ña'a i,
kovaa saña chi nuu maa in‑ni ni kúkanu ini sa
ja na chindee ña'a ni, te kaku sa nuu ja u'vi ma.
8Te nii nduu ma ndaka'an ndakachi sa
sukan sa'a sukan kúu ni ma.
Kata sa, te ndachiñu'u ña'a sa ndaka ora.
9Te nuna kuu nija'nu sa ma,
te máko saxiko ña'a ni te ko xndoo ña'a ni
kivi ma kundee‑ka sa nde a sa'a sa ma.
10Ñayii ñatuu ka kunimani nuu sa ma, ka ndatna'a i,
te ka ndatnu'u i ja jin ka'ni ña'a i.
11Te ka ka'an i:
“Su'si ma chi jâ ni skendoo ya tee ya'a, te jín sondikin o de,
te jín tnii o de, vaa masu na in tasa'an‑ka de”,
ka kuu i ka ka'an i.
12Te chukan kúu ja máko kújika ni nuu iyo sa ya,
vi Su'si maa sa,
su'va koo ñama ni ja kii ni ki chindee ña'a ni.
13Te sa'a maa ni ja na jin skenaa maa ñayii ka kuni i
ja saña jin ka'ni i ma,
te jín ndatna'a ndaka maa i ja kan‑nuu,
vaa ka kuni i ja jin sa'a ndeva'a ña'a i.
14Kovaa saña chi ndimaa kondetu ña'a sa
te ndachiñu'u ndachiñu'u‑ka ña'a sa.
15Te ndaka ora ndaka'an ndakachi sa
tnu'u ndaa tnu'u ndija ni a nuu ñayii ma,
ja sukan ni sa'a ni ja ni ka kaku sa nuu ja u'vi ma,
te ni masu kuu ndaka'an sa ndaka ja ni sa'a ni ma,
vaa kua'a xeen kúu.
16Su'si Iya Tátnuni, ndaka'an ndakachi sa nuu ñayii ma
ndaka milagru ni sa'a, ni kuu ni ma,
te ndaka'an sa sukan ká'an tnu'u ndaa tnu'u ndija
ni kaxtnu'u maa ni a.
17Su'si maa sa, maa ni ni kaxtnu'u nuu sa
tnu'u ndaa tnu'u ndija ni a onde nuu jaa sa ma,
te ndimaa ndákaxtnu'u sa nuu ñayii ma
ndaka ja vii ja va'a sa'a ni a.
18Visi jâ ni kuu nija'nu sa te jâ ni vixi xini sa a,
kovaa máko skendoo ña'a ni, vi Su'si,
onde nú ni kuu ni ka'an, ni kachi sa
tnu'u ndee tnu'u ndatnu ni a nuu ñayii ka iyo vitna a,
ji'in nuu ñayii ñatuu jin kâku‑ka ma.
19Kua'a xeen kúu ja sa'a ja kúu ni a,
te tnu'u ndaa tnu'u ndija ni a
ka'nu xen‑xeen sukan ka'nu andivi ma.
Te ñatuu na in kúu sa'a sukan sa'a maa ni a, vi Su'si.
20Te visi ni wa'a ni tnu'u ja ni ndo'o ni neni sa
te ni jini sa tnu'u xii ini ma,
kovaa maa ni chindee ña'a ja koteku sa ni‑kani ni‑jika,
te visi jâ yinee sa chii ñu'ú ma,
te maa ni ndatava ña'a nuu nee ma,
sukan‑va'a koo sa ji'in ni.
21Te ndataa ni kua'a xeen jayiñu'u,
te ndaka'an mani ña'a ni.
22Te chukan kúu ja maa sa chi tee sa guitarra ma,
te kata sa ja ndachiñu'u ña'a sa maa ni, vi Su'si,
vaa maa ni kúu Su'si iya ii ñuu Israel ma.
23Te sii ini xeen jita sa nuu maa ni a,
vaa maa ni ni sa'a ja ni kaku anua sa ya nuu ja u'vi ma.
24Te nii nduu ma ndaka'an ndakachi sa
tnu'u ndaa tnu'u ndija ni a,
vaa ni sa'a ni ja ni ka ndatna'a maa
ñayii ñatuu ka kunimani nuu sa ma ja kan‑nuu,
vaa ni ka jini i ja masu na kuechi sa ma.
Currently Selected:
Salmos 71: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
