Salmos 65
65
Salmo 65
Sukan vivii jito Su'si ma nuu ndaka ja ni sa'a ya ñuu ñayivi a
1Su'si maa sa, nuu maa ni iyo jayiñu'u onde ñuu Sion ma.
Te nuu maa ni iyo ja jin ndataa ñayii ma
ndaka ja ni ka skuiso i nuu ni ma.
2Vaa maa ni chi niniso'o ni ja ka jikan‑ta'vi i nuu ni ma,
te chukan kúu ja ndaka ñayii ñuu ñayivi a
chi ki koo i nuu maa ni a, vi Su'si.
3Chi vaa maa ni chi ni sakanu ini ña'a ni
ndaka ja u'vi ni ka yo sa'a, ni ka yo kuu sa ma,
vaa ni yo kundee maa ja u'vi ma ni yo tatnuni i nuu sa ma.
4¡Naka vii naka va'a kúu ñayii ni kaji maa ni
te ki'in ni ji'in i ja koo ni ji'in i ve'e nuu iyo ni ma!
Sa'a ni ja jin ni'i sa ndaka ja vii ja va'a iyo veñu'u ii ni ma.
5Su'si maa sa, maa ni kúu iya ka kukanu ini ndaka ñayii
ni‑ka'nu ñuu ñayivi a,
te maa ni kúu iya sa'a ja jin kaku sa nuu ja u'vi ma,
te ni masu ndi'i jin ndaka'an jin ndakachi sa
ndaka sukan sa'a ndaa sa'a ndija ni a ja jin kuu sa ma.
Onde ñayii ka iyo yu'u mar ma, ja jika xeen ka iyo i ma,
ka kukanu ini ña'a i maa ni, vi Su'si.
6Vaa maa ni kúu iya ni jani va'a yuku ma,
te ka nukuiñi vava'a i, ja maa tnu'u ndee tnu'u ndatnu ni a,
te ni masu jin kotuu i.
7Sukan ni'i ni'i‑nka kúu yu'u ndute nuu mar ma,
kovaa maa ni kúu iya sa'a ja ndúu nañii de ma.
Te sukan ni'i ni'i‑nka kua'an nuu ndute ma,
te maa ni sa'a ja ndúkuee nuu de ma.
Te maa ni ndása'a kuee ini
ndaka ñayii ka kuni ja jin kanaa i ma.
8Chukan kúu ja ndaka ñayii ka iyo ni‑ka'nu ñuu ñayivi a
chi ka yu'u ña'a i maa ni, vi Su'si,
vaa ni ka jini i ndaka ja vii ja luu sa'a ni a.
Te maa ni kúu iya sa'a ja ka iyo sii ini ndaka ñayii
ka iyo ichi nuu kána kandii ma,
ji'in ichi nuu kêe kandii ma,
te ka jita i yaa, te ka ndachiñu'u ña'a i, vi Su'si.
9Maa ni jito ni‑ka'nu ñu'ú ya,
vaa sa'a ni ja kúun savi te iyo ko'yo.
Vivii ndása'a kuii ni, te xchitu ni ndute ndaka yute ni ma,
sukan‑va'a jin kuu ja ka saka ñayii ma.
Te sukan vivii satu'va ni ndaka yukun itu ñayii ma,
vaa sukan kúni maa ni, vi Su'si.
10Te sa'a ni ja vivii ndándoyo yukun nuu ka jitu i ma,
te ka nuku'un ka nuku'un‑nka ndute soko yukun i ma.
Sa'a ni ja ndaka tiviñu'u ma,
te vivii ka kuun i te sukan te vivii ndutiuchi ñu'ú ma,
ja skuun ni savi ma,
te vivii sa'a ni ja ka kuu ndaka ja ka saka ñayii ma.
11Maa ni chi vivii wa'a ni ndaka ja vii ja va'a neva'a ni a
nuu ñayii a nii kuiya.
Te sa'a ni ja vivii ndúu viko ma, sani te kúun savi ma,
te nii nuu ñu'ú ya kénda ndaka ja va'a wa'a ni ma.
12Te sii ini ka ndukuii ndaka nuu masu nawa ka iyo kuiti ma,
ji'in ndaka yuku sukun sukun‑ka ma,
te sukan ni‑ka'nu ñuu ñayivi a ndúkuii.
13Te ndaka nundaa ma ka nuku'un kua'a xeen kiti
ja ka jaa ti kuii iyo ma.
Te ndaka yoso ma ka kayi ka kayi‑nka
ndaka ja ni ka saka ñayii ma,
vaa ni ka kuu i ma,
te sii ini xeen ndúu ñuu ñayivi ya,
te iyo jayiñu'u ni, vi Su'si, ja ndaka ja sa'a ja kúu ni a.
Currently Selected:
Salmos 65: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
