Salmos 66
66
Salmo 66
Jayiñu'u kóo nuu Su'si ma vaa vivii ka kuu ja ni sa'a ya ji'in tnu'u ndee tnu'u ndatnu ya ma
1Ndaka o ja ka iyo o ni‑ka'nu ñuu ñayivi a,
jín kata sii ini o nuu Su'si ma.
2Jín kata sii ini o nuu Su'si ma,
te jín ndaka'an jín ndakachi o ndaka ja sa'a ya ma,
te jín ndachiñu'u o ya.
3Jín kuña'a o nuu Su'si ma sa'a:
“Ndaka ja sa'a ja kúu ni ma chi vii xen‑xeen ka na'a.
Vaa maa ni kúu ja iyo kua'a tnu'u ndee tnu'u ndatnu,
te chukan kúu ja ndaka ñayii ñatuu ka kunimani nuu ni ma
chi visi ñatuu ka kuni i, kovaa jin kandija i ja ká'an ni ma.
4Te ñayii ka iyo ni‑ka'nu ñuu ñayivi a chi jin kata i nuu ni,
te jin ndachiñu'u ña'a i maa ni, vi Su'si.”
Sa'a jin kuña'a o nuu Su'si ma.
5Ne'e koo ni, te jin kuni ni sukan sa'a sukan kúu Su'si o a
ja jin kuu o,
vaa masu nama uun kuiti sa'a ya in ja vii ja va'a
ja ni ka jini o vitna a.
6Vaa ni june ya nuu mar ma, te nuu ka jika i kuan koo i ma
chi ni nduu ñu'ú yichi kuiti.
Te ja sukan ni sa'a ya ma, te ka kusii ini xeen o nuu ya.
7Te ji'in tnu'u ndee tnu'u ndatnu ya ma,
tátnuni ya ni‑kani ni‑jika,
te nde'ya vava'a ya ni‑ka'nu ñuu ñayivi a,
sukan‑va'a ndaka ñayii ñatuu ka kandija ja ká'an ya ma,
te máko jin ndokuiñi i te ko jin ka'an i ja maa i ka kuu‑ka.
8Ndaka ni ja ka kuu ni ñayii ñuu Su'si o ma,
jin ka'an ni ja vii ja va'a ja kuu ya,
sukan‑va'a jín kuniso'o ñayii ma
sukan ka jita ni ja ka ndachiñu'u ni ya ma.
9Vaa maa ya ni sa'a ja ni ka kaku o nuu ja u'vi ma,
te maa ya jito va'a ña'a, nasa yukan,
te jin ndakakayata o te jin ndaskenaa o maa o.
10Te maa ni, vi Su'si, kúu iya ni jitotnuni ña'a
naxe ka iyo sa nuu ni a.
Sukan, te ni ndasavii, ni ndasandoo ña'a ni
sukan ndúu nanimaa plata ma.
11Ni sa'a ni ja ni ka jakun‑nee sa nuu tnundo'o tnuneni ma,
te ni ka kuvee i siki sa ma nkuu.
12Te ni sa'a ni ja kuenda tnu'u ja ni ka jiñu ña'a
caballu ka yoso tee ma xini sa a.
Te ni ka ya'a sa nuu ñu'u i'ni ma, ji'in nuu ndute ma.
Kovaa sani te ni ndatava ña'a ni,
te kua'a xeen ja vii ja va'a ni ndataa ni.
13Kenda sa ini veñu'u ni ma,
te ka'mi sa kiti ndataa sa nuu ni ma,
te sa'a sa ja ni skuiso sa ja sa'a sa nuu ni ma,
14sukan ni ka'an, ni kachi sa ja sa'a sa nuu ni ma
nuu iyo sa nuu tnundo'o tnuneni ma.
15Te ka'mi sa ndikachi ma ji'in xndiki ma
ji'in ndixi'yu kiti vava'a‑ka ma nuu ni,
te xiko asi asi ma kenda nuu iyo ni ma,
ja ndakuan‑ta'vi sa nuu ni, vaa sukan játna ini ni, vi Su'si.
16Ndaka ni ja ka kandija ni ja ká'an Su'si ma,
ne'e koo ni, te jin koniniso'o ni ja ndáka'an ndákachi sa a
sukan ni sa'a Su'si ma ja kuu sa.
17Ni ndakune'e sa Su'si ma,
te ni‑yu'u ni‑ini sa ni jita sa ja ndáchiñu'u sa ya ma.
18Nute ni jatanuu sa te konde'ya sa ja u'vi ma te ko sa'a sa ma
chi masu kuniso'o Su'si Iya Tátnuni ma
ja jikan‑ta'vi sa nuu ya ma nkuu.
19Kovaa Su'si ma chi ja ndaa ndija kúu
ja ni jiniso'o ya ja jikan‑ta'vi xen‑xeen sa ma,
te ni jatanuu ya ja ni jiña'a sa ma.
20Ja vii ja va'a kúu Su'si ma,
vaa masu ni saxiko ya ja ni jikan‑ta'vi sa nuu ya ma,
vaa ni kunda'vi ini ña'a ya, te ñatuu ni saxiko ña'a ya.
Currently Selected:
Salmos 66: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
