Salmos 42
42
Salmo 42
LIBRO II
Sukan ûni jiniñu'u ini anua o Su'si ma
1Sukan kúu yu'u isu ma, ja yichi xen‑xeen ti ma
te ndánduku ti in yute ja ko'o ti ndute ma,
sukan ndánduku ña'a ini anua sa a maa ni, vi Su'si.
2Ini anua sa a chi sukan kúu sa ora yichi sa ma,
sukan jiniñu'u i Su'si iya téku ma.
¿Na kivi sana kuu ki'in sa ja koo sa nuu Su'si ma ini ve'e ya ma?
3Nduu ñuu ni yo nda'yu, ni yo nda'yu sa,
nani ka ka'an ndeva'a i nuu sa ma:
“¿Ndenu iyo Su'si ni ma, ja jito ña'a ya?”,
ka kuu i ka ka'an i.
4Te núkoo núku'un sa, te ndákani ndáka'vi ini sa,
te ndáka'án sa naxe ni yo skaka sa kua'a xeen ñayii ma
onde ni ka yo kenda koo sa ini ve'e Su'si ma,
te ka kayu'u sa ka jita sa ja ka ndachiñu'u sa Su'si ma,
te ûni viko ka'nu xeen ni ka yo sa'a sa.
5Te jani ini sa, ¿te naku ko kuxii ini o, te ko ndakani ini o?
Su'va kúkanu ini o Su'si ma, te ndáchiñu'u o ya,
vaa maa ya kúu Su'si o,
vaa maa ya sa'a ja kaku o nuu ja u'vi ma.
6Su'si maa sa, ûni ndí ini xeen sa,
te chukan kúu ja ndeva'a‑ni ndenu iyo sa ma,
te ndáka'án ña'a sa,
visi onde ñu'ú Jordán ma, xi onde yuku nani Hermón ma,
xi onde yuku nani Mizar ma.
7Vaa onde yuu kunu ma ndijin,
sukan kúu yu'u ndute kú'nu yute ma,
te onde nuu kunu‑ka mar ma ñunee sa,
te ni sa'a ni ja ni ya'a ndute ma siki sa a.
8Kovaa nuna tuu na ndii ma, te kunda'vi ini ña'a Iya Tátnuni ma.
Te nuna kunee ma, te ndusii ini sa,
te kata sa yaa ká'an sukan sa'a sukan kúu ya ma,
te kakan‑ta'vi sa nuu Su'si sa ma, iya sa'a ja koteku sa ma.
9Te kuña'a sa nuu Su'si ma:
“Maa ni kúu toto nuu koxtnee va'a sa ma.
¿Nava'a ko kani ini sa ja ni ndunaa ña'a ni?
¿Te nava'a ko kuxii ini sa, ja sa'a ña'a
ñayii ñatuu kúnimani nuu sa a?”
Sa'a kuña'a sa ya.
10Kuenda tnu'u ja ka xtnakue'e
ñayii ñatuu ka kunimani nuu sa ma onde yiki sa a,
ja ka ka'an ndeva'a i nuu sa,
vaa sa'a ka ka'an i ndi‑kivi ndi‑kivi:
“¿Ndenu iyo Su'si ni ma, ja jito ña'a ya?”,
ka kuu i ka ka'an i.
11Kovaa ni ndachu'un xeen ini sa,
te ka'án sa: ¿Te naku ko kuxii ini o, te ko ndakani ini o?
Su'va kúkanu ini o Su'si ma, te ndáchiñu'u o ya,
vaa maa ya kúu Su'si o,
vaa maa ya sa'a ja kaku o nuu ja u'vi ma.
Currently Selected:
Salmos 42: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
