Salmos 145
145
Salmo 145
Jín ndachiñu'u o Su'si ma ja sukan iyo tnu'u ndee tnu'u ndatnu ya ma te va'a ini ya ma
1Ndimaa ndaka'an ndakachi sa ja maa ni kúu Rey tátnuni, vi Su'si,
te ni‑kani ni‑jika ndachiñu'u ña'a sa.
2Ndi‑kivi ndi‑kivi ndaka'an ndakachi sa ja vii ja va'a sa'a ni ma,
te ndimaa ndachiñu'u ña'a sa ni‑kani ni‑jika.
3Ka'nu xeen maa Iya Tátnuni ma,
te maa ya iyo ja ndachiñu'u xen‑xeen o,
te ni masu kuu naxe ka'an‑nka o ja iya ka'nu xen‑xeen kúu ya.
4Te ndaka jichi sa'ya tata ñayii ma, jin ndaka'an jin ndakachi i
ndaka tu'u ja sa'a ja kúu ni a,
te jin ndachiñu'u ña'a i, vi Su'si.
5Te jin ndaka'an jin ndakachi i jayiñu'u ni ma,
ji'in ja sukan kanuu ni a.
Te maa sa chi ndakani ndaka'vi ini sa ndaka ja sa'a ja kúu ni a.
6Te ndaka ñayii ma, jin kuatnu'u ini ña'a i
ndaka ja sa'a ni ma, vi Su'si,
te jin ndaka'an jin ndakachi i sukan vii sukan luu
kúu ja sa'a ni ma.
Te maa sa ndaka'an ndaka tu'u ja sa'a ja kúu ni ma, vi Su'si.
7Te ndaka ñayii ma jin ndakune'e sukan va'a xen‑xeen ini ni ma,
te jin kata i, te jin ndachiñu'u ña'a i,
vaa maa ni kúu iya sa'a ndaa sa'a ndija ma.
8Iya nda'vi xen‑xeen ini kúu Iya Tátnuni ma,
te kuee ndákiti ini ya, te ka'nu xen‑xeen ini ya.
9Iya va'a xeen ini kúu Iya Tátnuni ma nuu ndaka o,
te vivii jito ya ndaka tu'u ja ni sa'a ya ma.
10Te jín ndachiñu'u ña'a
ndaka ja ni sa'a ni ma, vi Su'si Iya Tátnuni,
te ndaka ñayii ñatuu na ja u'vi ka sa'a i ma,
na jin ka'an vii jín ka'an va'a i ja kuu ni, vi Su'si.
11Jín ka'an i sukan tátnuni ni ma ji'in sukan iyo jayiñu'u ni ma,
te suni jín ndaka'an tna i
sukan iyo tnu'u ndee tnu'u ndatnu ni ma, vi Su'si.
12Sukan‑va'a jín kuni ndaka ñayii ma
sukan iyo tnu'u ndee tnu'u ndatnu ni ma,
te kúu sa'a ni ndaka ma,
ji'in sukan iyo jayiñu'u ni ma,
ji'in sukan iyo ja tátnuni ni ma.
13Vaa maa ni chi ni‑kani ni‑jika tátnuni ni nuu
ndaka tu'u ja ni sa'a ni ma,
te maa ni tátnuni nuu ndaka jichi sa'ya tata ñayii ma, vi Su'si.
14Te maa ni chi chíndee chítuu ni
ndaka ñayii ka kuxii ka kunda'vi ini ma,
te ndókani ni ndaka ñayii ka xtaya ma.
15Te ndaka ja ka teku ja ni sa'a maa ni ma, vi Su'si,
ka ndonenuu i nuu iyo ni a,
vaa ka kukanu ini ña'a i ja maa ni kua'a ja jin kaa i
ora ka jiniñu'u i ma.
16Te ndákune ni nuu nda'a ni a,
te tétniñu ni kua'a xeen ja vii ja va'a nuu
ndaka ja ka teku ka iyo ñuu ñayivi a, vi Su'si.
17Ndaka cha'a sa'a kúu Iya Tátnuni ma,
te ka jini o ja iya sa'a ndaa sa'a ndija kúu ya,
te ndaka ja sa'a ja kúu ya ma, te káxtnu'u ya ja nda'vi xeen ini ya.
18Iya Tátnuni ma chi iyo yatni ya nuu ka iyo
ndaka ñayii ka ndakune'e i ya ma,
nuu ka iyo ndaka ñayii ni‑yu'u ni‑ini i
ka ndakune'e ndija i ya ma.
19Te ndaka ñayii ka kandija ja ká'an ya ma
chi ndákone'e ya ja ka jikan‑ta'vi i ma,
te sa'a ya ja jin kaku i nuu ja u'vi ma,
vaa ka ndi ini i ja masu jin sa'a i ja u'vi ma,
vaa ka na'a i ja iya ndákan kuenda kúu ya.
20Iya Tátnuni ma chi jito va'a ya ndaka ñayii ka kutoo i ya ma,
kovaa xnaa ya ndaka ñayii ndimaa ja u'vi ka sa'a i ma,
vaa ñatuu ka kandija i ja ká'an ya ma.
21Te maa sa chi ndaka'an ndakachi sa jayiñu'u Iya Tátnuni ma,
te ndaka ñayii ma, na jin ka'an vii jín ka'an va'a i
ja kuu Su'si o iya ñatuu na ja u'vi sa'a ni‑kani ni‑jika ma.
Currently Selected:
Salmos 145: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
