Salmos 146
146
Salmo 146
Jín ndachiñu'u o Su'si ma ja sukan ja'nde ndaa ya tniñu ñayii ma
1Yo'o chi ûni ni‑yu'u ni‑anua o
ndáchiñu'u o Su'si iya tátnuni nuu o a.
2Kata sa te ndachiñu'u sa Su'si iya tátnuni nuu o a
nani téku sa a.
3Máko kukanu ini ni ñayii ka ndanuu ma,
vaa masu nawa jin sa'a i ja kaku ni nuu ja u'vi ma,
vaa ñayii‑ni ka kuu i.
4Vaa kivi jin kûu tna i ma chi ñuyaka‑nka‑ni jin nduu i,
te yukan‑ni, te ni ka naa ja ni ka yo jani, ni ka yo ka'vi ini i
ja jin sa'a i ma.
5¡Kovaa naka vii naka va'a‑ka kúu ñayii kúkanu ini Su'si
ni yo kukanu ini tee ni yo kuu Jacob ma
ja suu ya ko kuu iya chindee ña'a!
6Vaa maa ya kúu iya ni sa'a andivi ma,
ji'in nuu ñu'u kua'a ndute ma.
Ni sa'a ya ñu'ú ya ji'in ndaka‑ka nawa iyo a.
Te ndimaa ja ndaa kúu tnu'u ká'an ya ma.
7Vaa sa'a ya ja ka ndayaa ñayii
ka xndo'o ka xneni ña'a in‑ka ñayii ma,
te wa'a tna ya ja jin kaa ñayii ka kokon ka yichi ma,
te ndáxsiaa ya ñayii nda'vi ka yinee va'a ma.
8Su'si Iya Tátnuni a chi sa'a ya
ja ka ndundijin nuu ñayii inukuaa ma,
te ndóne'e ya ñayii ni ka xtaya ma,
te kútoo xeen ya ñayii ka sa'a ja va'a ja ndaa ma.
9Iya Tátnuni a chi jito va'a ya ñayii ka iyo ñuu
nuu masu ñuu i kúu ma,
te suni jito va'a ya suchi ñatuu na yuva na si'i‑ka i ma,
ji'in ña'a ni ka ji'i yii ma.
Kovaa ñayii ka sa'a ja u'vi ma
chi sa'a ya ja kuan koo neé kuan koo uun‑nka maa i.
10Vaa Su'si Iya Tátnuni ma chi maa ya tátnuni ni‑kani ni‑jika
nuu ndaka jichi ñayii ñuu Sion ma, vaa maa ya kúu Su'si.
¡Aleluya! ¡Jayiñu'u kóo nuu ya!
Currently Selected:
Salmos 146: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
