Salmos 144
144
Salmo 144
Sukan jin kakan‑ta'vi o nuu Su'si ma ja na jin koo va'a ndaka o ve'e o ma ji'in ndaka kiti kuechi kiti likin ka neva'a o ma
1¡Naka vii naka va'a ini Su'si iya tátnuni nuu sa a!
Vaa vivii jito va'a ña'a ya, te ñatuu nawa ndo'o sa.
Te maa ya kúu iya kaxtnu'u nuu sa naxe ko sa'a ko kuu sa,
sukan‑va'a kundee sa nuu ñayii kenda koo
ja jin kanaa i ji'in sa ma.
2Te maa ya kúu iya ka ketna'a ini ji'in sa, te kútoo ña'a ya,
te másu xndoo ña'a ya, vaa maa ya sa'a ja kaku sa nuu ja u'vi ma,
vaa sukan kúu in ve'e sukun kúu ya, te kuu chu'u sa,
sukan‑va'a kaku sa nuu ñayii ñatuu ka kunimani nuu sa ma.
Te kúkanu ini sa ja maa ya kúu iya jasi ndee jasi ndoso ña'a
ja ñatuu ni‑in ja u'vi kaki'i ña'a,
te maa ya kúu iya sa'a ja sava‑ka ñuu ma, kúu tátnuni sa nuu i.
3Su'si Iya Tátnuni,
¿nawa kúu ñayii ma ja ndí ini xeen ni ja ko koto ni i?
¿Te nawa kúu ñayii ma ja kúnda'vi ini ni i te kútoo ni i?
4Ñayii ya chi sukan kúu ja jaka ini o ma‑ni sukan‑ni kúu i,
vaa ja téku i a chi sukan‑ni kúu kuanda'vi ma‑ni
sukan‑ni kúu i ja nunuu‑ni iyo i ñuu ñayivi a.
5Iya Tátnuni, ndakune ni andivi a, te nuu ni kii ni nuu iyo yuku a,
te sa'a ni ja kana ñu'ma.
6Ji'in kuji ni a, te skana ni flecha ni a ichi andivi a, te jándute,
sukan‑va'a jín koyu'u ñayii ñatuu ka kunimani nuu ni a,
te jín kuitenuu i jín koo i.
7Onde sukun a onde nuu iyo ni a, te skuili ni nda'a ni a,
te chindee ña'a ni ja na kaku sa nuu ñayii
masu ka jini ña'a i saña ma,
vaa sukan kúu ndute kua'a ñu'u nuu mar ma, sukan îyo ka kuu i,
8vaa ñayii ya'a, másu ka ka'an ndaa i
chi ûni ka ndone'e i nda'a kua'a i ma
ja ka xnda'vi i in‑ka ñayii ma.
9Kovaa saña, vi Su'si Iya Tátnuni, chi kata sa yaa jaa nuu ni,
te tee sa salterio ma,
te kata sa yaa ká'an ja sukan vii va'a ini maa ni, vi Su'si.
10Vaa maa ni chi sa'a ni ja ka kundee rey ma,
te sukan ni sa'a ni ja ni kaku David ma
tee ni yo jinukuechi nuu ni a,
te ñatuu ni ka ja'ni ña'a ñayii
ñatuu ni ka yo kunimani nuu de ma.
11Te suni sa'a ni ja na kaku tna sa nuu ñayii in‑ka ñuu ma,
ja masu ka ka'an ndaa i ma,
te ûni ka ndone'e i nda'a i ma ja ka xnda'vi i in‑ka ñayii ma.
12Te sa'a ni ja sayii sa ma, te vivii jin koo i nuu ni ma
sukan ka kuu yutnu vivii ve jin kua'nu
ka iyo nuke'e veñu'u ni ma,
te sasi'i sa ma, sa'a ni ja vivii na jin ko kuu i,
sukan vivii ka ndaa ja ka yituu veñu'u ni ma.
13Te sa'a ni ja yaka nuu ka ñu'u ndaka ja jin kaa sa ma,
ûni na ku'un chitu i.
Te ndaka kiti ka jaan tata sa ma, na jin kukua'a xeen ti,
te kua'a xen‑xeen ja na jin koneva'a sa nuu ñu'ú nuu ka iyo sa a.
14Te xndiki sa ma, na jin koo ndee jin koo ndatnu ti ja jin satniñu ti,
te ñatuu na in kenda ja sakui'na i ichi ka jika sa a,
sukan‑va'a ñatuu na in koyu'u ja kee i ndenu ki'in i ma.
15Ja vii ja va'a kúu ñayii kúu ñuu Su'si Iya Tátnuni ma,
vaa ndaka cha'a koneva'a i.
Currently Selected:
Salmos 144: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
