Salmos 119
119
Salmo 119
Vava'a ko kuu o nuna kandija o tnu'u tátnuni Su'si a
1¡Naka vii naka va'a ka kuu ñayii ka jika va'a ka jika ndaa
ichi Su'si o a te ka sa'a i sukan tátnuni ya ma!
2¡Naka vii naka va'a ka kuu ñayii ni‑yu'u ni‑ini i
ka ndanduku i ja jin sa'a i sukan tátnuni Su'si ma,
chi jin koo va'a i nuu ya!
3Vaa ñayii ka ndikin ichi Su'si Iya Tátnuni ma
chi ñatuu nde ka sa'a‑ka i ja u'vi ja masu játna ini Su'si ma.
4Saa vi, Su'si, vaa maa ni ni tatnuni nuu i
ja na jin ko sa'a ndi'i jín ko sa'a tu'u i ndaka
sukan kúni ni ja jin ko sa'a jin ko kuu i ma.
5¡Naka va'a ko kuu sa, nuna konukuiñi va'a sa ichi ni a
te kandija tna sa ja sa'a sa sukan tátnuni ni a, vi Su'si!
6Vaa nuna katanuu sa ja sa'a sa sukan tátnuni ni ma
chi masu nawa ndakukan‑nuu sa.
7Te ni‑yu'u ni‑ini sa ndachiñu'u ña'a sa, nuna ndasa'a sa kuenda
sukan ndakan ndaa ndakan ndija ni kuenda nuu in in sa ma.
8Te ûni ku'un ini sa ja sa'a sa sukan tátnuni ni ma.
Te máko xndoo kuiti ña'a ni, vi Su'si.
9¿Naxe sa'a suchi jaa ma ja koo vii koo va'a i nuu ni ma, Su'si?
Jiniñu'u ja ko sa'a ko kuu i ndaka
sukan ká'an tnu'u maa ni a, vi Su'si.
10Saña chi ni‑yu'u ni‑ini sa ndánduku ña'a sa,
te máko kua'a ni tnu'u ja xndoo sa sukan tátnuni ni
ja ko sa'a sa ma.
11Ini anua sa ya táva'a va'a sa ndaka
tnu'u ká'an tnu'u káchi ni nuu sa a,
sukan‑va'a ma ko sa'a sa ja u'vi
te ko kuiso kuechi sa nuu maa ni, vi Su'si.
12Iya va'a iya vii ini kúu ni, vi Su'si Iya Tátnuni.
Kúni sa ja sa'a ni ja jaku'ni ini sa ndaka sukan tátnuni ni
ja ko sa'a ko kuu sa ma.
13Te ndaka'an ndakachi sa nuu ñayii ma ndaka
sukan ká'an sukan káchi ni nuu sa ja ko sa'a sa ma.
14Saña chi iyo sii ini xeen‑ka sa ja sa'a sa sukan tátnuni ni ma
sana ja ni'i sa ndaka ja va'a iyo ñuu ñayivi a.
15Te ndakani ndaka'vi ini sa, te ndasa'a sa kuenda
naxe ká'an tnu'u tátnuni ni ma,
te katanuu sa ja kaka sa ichi maa ni a, vi Su'si.
16Te koo sii ini xeen sa ja ko sa'a sa sukan tátnuni ni ma,
te masu ndunaa sa tnu'u maa ni a, vi Su'si.
17Saña ja jinukuechi sa nuu maa ni a,
sa'a ni ja kuta'vi sa ja va'a te koteku sa
te kandija sa ja sa'a sa sukan ká'an tnu'u maa ni a.
18Ndakune ni nduchinuu sa a, te jín kuni i
ja vii ja luu ká'an tnu'u maa ni a.
19Saña chi másu nuu ñu'ú ya kúu nuu koo sa
chi nunuu‑ni iyo sa ya'a.
Chukan kúu ja kaxtnu'u ni ndaka ja tátnuni ni ja sa'a sa ma.
20Ûni nii nduu ma kúxii ini sa
nava'a ñatuu kuu sa'a sa sukan tátnuni ni ma.
21Maa ni, vi Su'si, chi ndónda ni nuu ñayii ka sa'a ja u'vi ma
ja ñatuu ka kandija i ja jin sa'a i sukan tátnuni ni ma.
22Sa'a ni ja na koo jika sa nuu ñayii ka saxiko ña'a ma
te ka kuni u'vi i nuu sa ma,
vaa saña chi ndí ini sa ja sa'a sa ja tátnuni ni ma.
23Vaa onde tee ka tatnuni‑ka ma, ni ka jinkoo de,
te ni ka ndatnu'u tna'a de ja jin sa'a ña'a de ja u'vi,
kovaa saña ja kúu sa tee jinukuechi nuu ni a
chi ndákani ndáka'vi ini sa naxe ká'an tnu'u tátnuni ni ma,
vaa kúkanu ini ña'a sa.
24Vaa ndaka tnu'u tátnuni ni ma kúu
ja ndáka'an ndákachi nuu sa naxe ko sa'a ko kuu sa, vi Su'si.
25Ni kuita kuiti ini sa
kuenda tnu'u ja onde nuu ñu'ú‑nka a‑ni kátuu sa.
Chindee ña'a ni, te koteku sa sukan ká'an tnu'u maa ni a.
26Vaa nuu maa ni ni ndaka'an, ni ndakachi sa
naxe sa'a naxe kúu sa kua'an vee sa kúu sa ma,
te maa ni chi ni ndakone'e ni ja ká'an sa ma.
Te jikan‑ta'vi sa nuu ni ja kaxtnu'u ni ndaka tnu'u tátnuni ni ma.
27Te sa'a ni ja jaku'ni va'a ini sa sukan ká'an tnu'u tátnuni ni
ja sa'a sa ma,
sukan‑va'a ndása'a sa kuenda ja vii ja luu sa'a ni ma.
28Vaa ûni ndátnana ini anua sa ya, jini sa ja kúxii ini sa, vi Su'si.
Sa'a ni ja na ndani'i sa tnu'u ndee tnu'u ndatnu
sukan ká'an tnu'u maa ni a.
29Xtandiyo ni tnu'u xnda'vi tna'a ma ini anua sa ya,
sukan‑va'a máko xnda'vi sa ñayii ma,
te kunda'vi ini ña'a ni ja na sa'a sa
sukan ká'an tnu'u tátnuni ni ma.
30Ni kaji sa ichi ndaa ni a,
te tnu'u tátnuni ni ma ñu'u ini sa kua'an vee sa kúu sa.
31Ni jatna ini sa tnu'u tátnuni ni ja sa'a sa ma, vi Su'si,
te máko kua'a ni tnu'u ja tna'a sa ja kan‑nuu.
32Te na koo ñama sa ja ko sa'a sa sukan tátnuni ni ma,
vaa ni sa'a ni ja kua'a xeen‑ka ja jáku'ni ini sa, vi Su'si.
33Su'si Iya Tátnuni, sa'a ni ja jaku'ni ini sa
sukan tátnuni ni ma
te kó sa'a kó kuu sa ndaka kivi koteku sa ma.
34Taa ni janitnuni va'a, sukan‑va'a ni‑yu'u ni‑ini sa
kátanuu sa tnu'u tátnuni ni ma
te kó sa'a sa sukan kúni ni ma.
35Te skaka ña'a ni ichi va'a ma ichi nuu kuu jaku'ni ini sa
sukan kúni ni ja ko sa'a ko kuu sa ma,
vaa ja kúu ini sa kúu ja ko sa'a sa ndaka sukan tátnuni ni ma.
36Sa'a ni ja ini anua sa ya,
te kó ndi ini i ja ko sa'a i sukan tátnuni ni ma,
te máko kua'a ni tnu'u ja ko ndiyo ini sa nawa iyo ñuu ñayivi a.
37Te máko kua'a ni tnu'u ja ko kukanu ini sa
ndaka ja masu nde jiniñu'u ma,
su'va chindee ña'a ni, te kóteku sa, te kóndikin sa ichi maa ni a.
38Sa'a ni ja jaku'ni va'a ini sa sukan ká'an tnu'u maa ni a,
ndaka ja ni skuiso ni nuu sa ja jinukuechi sa nuu ni a,
vaa yu'u sa ja nú ma sa'a sa sukan kúni ni ma
chi ndakan ni kuenda nuu sa.
39Chindee ña'a ni ja má koyu'u‑ka sa
ja ka ka'an ndeva'a ñayii ma nuu sa ja ndikin ña'a sa a,
vaa ndaka tnu'u ká'an ni ma chi ja va'a kúu.
40Vaa jini maa ni ja kúu ini sa ja sa'a sa sukan tátnuni ni ma,
sa'a ni ja koteku sa, vaa iya sa'a ndaa kúu ni, vi Su'si.
41Iya Tátnuni, kaxtnu'u ni sukan nda'vi ini ni ma,
sukan ni skuiso ni ma,
te chindee ña'a ni ja na kaku sa nuu ñayii
ñatuu ka kunimani nuu sa ma.
42Te sukan, te jín kuni ñayii ka ndakiti ini nuu sa ma
ja saña chi kúkanu ini sa sukan ká'an tnu'u maa ni a.
43Te máko xtandiyo ni ini yu'u sa a tnu'u ndaa tnu'u ndija ni a,
su'va kó ka'an kó ka'an‑ni sa nuu ñayii ma,
vaa kúkanu ini sa ja maa ni sa'a ndaa, vi Su'si.
44Te ni‑kani ni‑jika kó sa'a sa sukan tátnuni ni ma.
45Sukan‑va'a kónune yu'u kónune nuu sa nde kua'an nde vee sa,
vaa ni ndanduku sa tnu'u tátnuni maa ni a ja ko sa'a sa ma.
46Te masu kukan‑nuu sa chi ka'an sa
sukan sa'a sukan kúu ni a nuu tee ka kuu rey ma.
47Vaa ûni kúu sii ini sa ja sa'a sa sukan tátnuni ni a,
te ñu'u ini sa ja ko sa'a sa.
48Vaa ûni kútoo sa ndaka sukan tátnuni ni ma,
te ûni ñu'u ini sa ja sa'a sa ndaka sukan kúni ni ma, vi Su'si.
49Ndaka'án ni ndaka tnu'u ni ka'an ni nuu sa ma,
ja jinukuechi sa nuu ni a,
vaa suu i sa'a ja kúkanu ini ña'a sa, vi Su'si.
50Vaa ora kúxii kúnda'vi ini sa ma,
te jiniso'o sa tnu'u ká'an ni ma,
ja suu i sa'a ja koteku sa ma,
te ndáni'i sa tnu'u kanu ini.
51Vaa ñayii ka jani ini ja maa i ka kuu‑ka ma
chi ka jakundee xeen ña'a i saña,
kovaa masu nde xndoo sa tnu'u tátnuni ni a, vi Su'si.
52Te ni ndaka'án sa ndaka sukan ni sa'a ndaa, ni sa'a ndija ni
onde xi'na‑ka ma,
te ni ndani'i sa tnu'u kanu ini, vi Iya Tátnuni.
53Ûni ndákiti xeen ini sa nuu ñayii
ni ka xndoo sukan ká'an tnu'u tátnuni ni ma
te ka sa'a i ja u'vi ma.
54Kovaa saña chi tnu'u tátnuni ni ma
chi ûni jita jita‑ni sa nani iyo sa ñuu ñayivi a,
nuu masu ñuu sa kúu ya.
55Iya Tátnuni, ndaka jakuaa ma ndáka'án ña'a sa maa ni,
te saña chi kúni sa ja sa'a sa ndaka sukan ká'an tnu'u
ni kaxtnu'u ni ma.
56Cha'a kúu ja vii ja va'a ni kuta'vi sa nuu ni, vi Su'si,
vaa ni sa'a sa ndaka sukan tátnuni ni ma.
57Iya Tátnuni, maa ni kúu iya ni kuta'vi sa ja koo ji'in sa,
te vitna, te skuiso sa nuu ni ja kandija sa ja sa'a sa
ndaka tnu'u tátnuni ni ma.
58Te ni‑yu'u ni‑ini sa ndánduku ña'a sa.
Kunda'vi ini ña'a ni sukan ká'an tnu'u maa ni a.
59Ni ndakani, ni ndaka'vi ini sa,
te ni ndasa'a sa kuenda naxe iyo sa nuu ni ma,
te ni nukun‑nee sa ichi va'a ni a,
te ni ndakandija sa ndaka tnu'u ká'an tnu'u káchi ni nuu sa a.
60Ni ndatnuñu sa, te ñatuu nde ni wa'a sa tnu'u ja kukuee‑ka sa,
te ni jakondee sa sa'a sa sukan ká'an tnu'u tátnuni ni ma.
61Visi kua'a xeen ñayii ka sa'a ja u'vi ma
te ni ka ndakonduu ña'a i ja jin ke'en‑su'va ña'a i,
kovaa masu nde ni ndunaa sa tnu'u tátnuni ni ma.
62Sava ñuu ma ndákoo sa, te ndákuan‑ta'vi sa nuu ni
ja sukan sa'a ndaa sa'a ndija ni ma.
63Kétna'a ini sa ji'in ndaka ñayii ka sa'a sukan tátnuni ni ma,
vaa ka yu'u i ja ndakan ni kuenda nuu i ma,
nú ma jin ko sa'a i sukan kúni ni ma.
64Iya Tátnuni, tnu'u nda'vi ini ni a chi ni‑ka'nu ñuu ñayivi a iyo,
te jikan‑ta'vi sa nuu ni ja kaxtnu'u ni tnu'u tátnuni ni ma nuu sa.
65Te saña ja jinukuechi sa nuu ni a, sa'a ni ja ni'i sa ja vii ja va'a,
sukan ká'an tnu'u maa ni a.
66Te sa'a ni ja jaku'ni vava'a ini sa tnu'u tátnuni ni ma,
vaa saña chi kándija sa sukan ka'an i ma.
67Nuu ñatuu ndasa'a‑ka sa kuenda
ja masu nde jiniñu'u ja sa'a ja kúu sa ma
chi kua'a xeen ja masu játna ini ni ma ni yo sa'a sa.
Kovaa vitna chi tna'a ja tátnuni ni ma sa'a sa,
vaa kándija ña'a sa, vi Su'si.
68Kovaa ndijin chi iya va'a ini kúu ni, te sa'a ni ja va'a,
te káxtnu'u ni tnu'u tátnuni ni ma nuu sa.
69Visi maa ñayii ma ka jani ini i ja maa i ka kuu‑ka
te ka ka'an i tnu'u sa, tna'a ja masu ja ndaa kúu ma,
kovaa saña chi masu sanuu sa ja ka ka'an i ma,
vaa ni‑yu'u ni‑ini sa ni kandija sa sukan ká'an tnu'u
tátnuni ni ma.
70Vaa ini anua ñayii yukan chi iyo ja jasi ndee,
te chukan kúu ja ka kuu i sukan,
kovaa saña chi iyo sii ini sa
sukan ká'an tnu'u tátnuni ni ma.
71Ja vava'a kúu ja ni xndo'o, ni xneni ña'a ni ma,
vaa sukan, te ni jaku'ni ini sa sukan ká'an tnu'u tátnuni ni ma.
72Nuu saña, vi Su'si, chi va'a xeen‑ka kúu tnu'u ká'an káchi ni a
sana ja ni'i sa kua'a xeen xu'un oro ma xi xu'un plata ma.
73Vaa maa ni ni sa'a ña'a,
te vivii ni sa'a ña'a ni ni‑ka'nu sa,
te vitna, te jikan‑ta'vi sa nuu ni ja sa'a ni ja na jaku'ni ini sa
te ko sa'a sa sukan ká'an tnu'u tátnuni ni ma.
74Ndaka ñayii ka ndachiñu'u i maa ni ma, vi Su'si,
chi nuna jin kuni ña'a i saña chi ka ndusii ini xeen i,
kuechi ja kúkanu ini sa sukan ká'an tnu'u tátnuni maa ni ma.
75Iya Tátnuni, jini sa ja ja va'a ja ndaa ka kuu
tnu'u tátnuni ni ma,
te maa ni jini nava'a xndo'o xneni ni saña
ja jinukuechi sa nuu ni a.
76Vaa kútoo ña'a ni ma, te ndaka'an mani ña'a ni,
sukan ni skuiso ni nuu sa a ja jinukuechi sa nuu ni a, vi Su'si.
77Te sa'a ni ja na kenda tnu'u nda'vi ini ni a nuu sa,
sukan‑va'a koteku sa,
vaa kúu sii ini xeen sa nuu tnu'u tátnuni ni a.
78Te jín ndakukan‑nuu maa ñayii ka jani ini ja maa i ka kuu‑ka ma,
vaa masu na kuechi sa, te ka ka'an i tnu'u sa,
kovaa saña chi ndása'a sa kuenda naxe ká'an
tnu'u tátnuni ni ma.
79Te ndaka ñayii ka jini sukan ká'an tnu'u tátnuni ni ma
te ka yu'u i te ñatuu ka sa'a‑ka i ja u'vi ma,
na ki koo i, te jín ndatna'a sa ji'in i, te jín koo mani sa.
80Te ini anua sa ya na ku'un kaji kú'un va'a ini
nuu tnu'u tátnuni ni ma,
sukan‑va'a ñatuu nawa ndakukan‑nuu sa.
81Te ûni ve kuita sa ja ndetu sa ja na chindee ña'a ni ja na kaku sa,
vaa kúkanu ini sa sukan ká'an tnu'u maa ni a.
82Te onde nduchinuu sa ya ve jin kuita‑nka
ja ndétu sa sukan ká'an tnu'u maa ni a,
te jani ini sa:
“¿Na kivi‑nka, te kii Su'si ma te ndaka'an mani ña'a ya?”,
jani ini sa.
83Vaa sukan‑nka kaa ñii kiti nuu ñu'u ndute ma
ja ni kutnuu kuiti i ja ni kuñu'ma i ma,
sukan‑nka ni kaa sa,
kovaa masu nde ndunaa sa ja tátnuni ni ma.
84¿Na saa‑ka kivi koteku saña
ja kúu sa ñayii jinukuechi nuu maa ni a?
¿Te na kivi, te ndakan ni kuenda nuu ñayii
ka sondikin ña'a i saña ma?
85Ndaka ñayii inundee ini ma
ja ñatuu nde ka kandija i tnu'u tátnuni ni ma,
ni ka sa'a i in yavi visi na kêe sa, ka kuni i.
86Te vitna ja masu nawa sa'a sa,
te ka sondikin ña'a i ja jin ka'ni ña'a i.
Chindee ña'a ni, vi Su'si,
vaa ndaka tnu'u tátnuni ni a chi ja ndaa kúu.
87Visi ka kuni i ja jin xnaa ña'a i ñuu ñayivi a,
kovaa saña chi masu nde xndoo sa ndaka tnu'u tátnuni ni a.
88Ja sukan kútoo ña'a ni a, te sa'a ni ja koteku sa,
te chindee ña'a ni ja na sa'a sa
sukan tátnuni ni ja ko sa'a sa ma.
89Vaa ja ndaa kúu ja tnu'u tátnuni ni ma
chi ni‑kani ni‑jika iyo i andivi ma.
90Vaa ûni ká'an ni, te sa'a ni a, vi Su'si,
te ni‑kani ni‑jika sukan sa'a sukan kúu ni,
vaa sukan‑ni ni sa'a ni ñuu ñayivi ya,
te masu nde kotuu i.
91Te ndaka ja ni tatnuni ni ja jin koo ma
chi ka nukuiñi va'a i onde vitna,
vaa ndaka i ka jinukuechi nuu ni.
92Chukan kúu ja saña
chi nute ñatuu ni kandija sa sukan ni tatnuni ni ma
chi vaa jâ ni xnaa ña'a tnundo'o tnuneni ma nkuu.
93Chukan kúu ja ni masu ndunaa kuiti sa tnu'u tátnuni ni ma,
vaa ja ni jaku'ni ini sa tnu'u yukan,
te ni sa'a ni ja kuu koteku sa ni‑kani ni‑jika.
94Su'si, sa'a ni ja na kaku sa nuu ja u'vi ma,
vaa sa'ya maa ni kúu sa, vaa sa'a sa sukan tátnuni ni ma.
95Ñayii ka sa'a ja u'vi ma chi ka ndetu ñu'ni i naxe jin xnaa ña'a i,
kovaa saña chi masu ndí ini sa ja ka jani ini i ma
chi ja ndí ini sa kúu ja sa'a sa sukan tátnuni maa ni a.
96Saña chi jini sa ja ndaka ja ka iyo a chi jin naa i,
kovaa tnu'u tátnuni ni a chi ni‑kani ni‑jika koo i.
97Ûni kútoo xeen sa tnu'u tátnuni ni a,
te nii nduu ma ndákani ndáka'vi ini sa sukan ká'an ni ma.
98Te ni sa'a ni ja ni kundichi‑ka sa
sana ndaka‑ka ñayii ñatuu ka kunimani nuu sa ma,
vaa tnu'u tátnuni ni a iyo ji'in sa ndaka kivi.
99Te ni jaku'ni‑ka ini sa sana ndaka‑ka ñayii ka skua'a ña'a ma,
vaa ñu'u xeen ini sa tnu'u tátnuni ni ma.
100Te ni jaku'ni xeen‑ka ini sa sana tee ka kuu nija'nu ma,
vaa kándija sa te sa'a sa sukan tátnuni ni ma.
101Te ndaka ichi u'vi ma ni xndoo ja'a sa ya,
sukan‑va'a kuu sa'a sa sukan ká'an tnu'u maa ni a.
102Te ñatuu nde xndoo sa tnu'u tátnuni ni ma,
vaa maa ni káxtnu'u nuu sa.
103Te ûni játna ini xeen sa sukan ká'an tnu'u maa ni a
sana in ja asi xeen jini yu'u sa ma.
Vixi‑ka tnu'u maa ni a sana nduxi ñuñu ma jini sa.
104Nuu tnu'u tátnuni ni a ni kutu'va sa tnu'u ndichi ma,
te chukan kúu ja saxiko sa ndaka ichi xnda'vi tna'a ñayii ma.
105Vaa tnu'u káxtnu'u ni nuu sa a chi vivii xtnuu i nuu ja'a sa a,
kuenda tnu'u ja in ñu'u ndu'va, te xtnuu i ichi jika sa ya.
106Ni skuiso sa ja sa'a ndi'i sa'a tu'u sa
ndaka tnu'u ndaa tnu'u ndija tátnuni ni a.
107Su'si Iya Tátnuni, jini ni ja kúxii kúnda'vi ini sa.
Sa'a ni ja koteku sa sukan ká'an tnu'u maa ni a.
108Jikan‑ta'vi sa nuu ni, vi Su'si Iya Tátnuni,
ja na jatna ini ni ja ndáka'an ndákachi yu'u sa ya,
vaa ja jita sa ya‑ni kúu ja ndátaa sa nuu ni, vi Su'si.
Te kaxtnu'u ni nuu sa ja na jaku'ni ini sa
tnu'u ndaa tnu'u ndija ni a.
109Vaa ndi‑kivi ndi‑kivi iyo yika sa ja jin ka'ni ña'a i ka kuni i,
kovaa masu nde ndunaa sa tnu'u tátnuni ni ma.
110Visi ka nduku i ja sanaa sanaa‑ni jin tnii ña'a i,
kovaa masu kuu,
vaa saña chi ñatuu nde ndunaa sa ndaka tnu'u tátnuni ni ma.
111Ni tnii sa ndaka ja ni skuiso ni ma
ja ko kuu ta'vi sa ni‑kani ni‑jika,
te suu i kúu ja ndása'a sii ini ini anua sa ya ndaka ora.
112Ni‑yu'u ni‑ini sa jani ini sa ja ko sa'a sa
sukan ká'an tnu'u tátnuni ni ma,
te ni masu skendoo sa ni‑in kivi.
113Ûni masu játna ini kuiti sa ndaka ñayii ka kuvixi ma,
vaa ka ka'an i te masu ka sa'a i,
kovaa saña chi ja játna ini sa kúu ja ko sa'a sa
sukan tátnuni ni ma.
114Nuu kuu chu'u sa te kaku sa nuu ja u'vi ma
kúu nuu maa ni a, vi Su'si,
vaa kúkanu ini sa sukan ká'an tnu'u maa ni a.
115Ndaka ni ja ka sa'a ni ja u'vi ma, jin kakayata ni nuu iyo sa ya,
chi saña chi kúni sa ja sa'a sa sukan tátnuni Su'si ma.
116Su'si, taa ni tnu'u ndee tnu'u ndatnu
sukan ni skuiso ni nuu tnu'u ká'an ni ma,
sukan‑va'a koteku sa te masu nawa kukan‑nuu sa
ja ni kukanu ini ña'a sa.
117Chindee ña'a ni, sukan‑va'a na kaku sa nuu ja u'vi ma,
sukan‑va'a ndaka kivi sii ini ko sa'a sa ndaka
sukan tátnuni ni ma.
118Vaa ndijin chi saxiko ni ñayii ka jikayata
nuu tnu'u tátnuni ni ma,
vaa ndaka ja ka jani ka ka'vi ini i ma chi masu nde jiniñu'u.
119Te ndaka ñayii ka sa'a ja u'vi ma chi masu nde ka jiniñu'u i.
Kuenda tnu'u ja in mi'i‑ni ka kúu i nuu maa ni, vi Su'si.
Kovaa saña chi ñu'u ini sa ja sa'a sa
sukan ká'an tnu'u tátnuni ni a, vi Su'si.
120Yikikuñu sa ya chi ni'i ni'i‑nka i
ja yu'u xen‑xeen ña'a i maa ni, vi Su'si,
vaa maa ni kúu iya ndakan kuenda nuu sa.
121Saña chi nanimaa ja ndaa ja va'a sa'a sa,
te máko xndoo ña'a ni nuu nda'a ñayii
ñatuu ka kunimani nuu sa ma.
122Kunda'a ña'a maa ni, Su'si, sukan‑va'a na koo va'a sa
te máko jin sa'a ndeva'a ña'a ñayii ka jani ini
ja maa i ka kuu‑ka ma.
123Vaa nduchinuu sa ya chi ni ka kuita‑nka i
ja ka ndetu i ja na chindee ña'a ni,
sukan‑va'a na kaku sa nuu ja u'vi ma,
vaa sukan ni skuiso ni nuu tnu'u maa ni ma,
te ndetu ña'a sa.
124Saña ja kúu sa ñayii jinukuechi nuu ni a, vi Su'si,
te ja kúnda'vi ini ña'a ni a, te sa'a ni sukan iyo ja sa'a ña'a ni,
vaa kútoo ña'a ni a,
te kaxtnu'u‑ka ni ndaka sukan ká'an tnu'u tátnuni ni ma.
125Saña ja kúu sa ñayii jinukuechi nuu ni a,
sa'a ni ja na jaku'ni va'a‑ka ini sa,
vaa ja kúni sa kúu ja jakun‑tnuni‑ka ini sa
tnu'u ndaa tnu'u ndija tátnuni ni ma.
126Su'si Iya Tátnuni, va'a‑ka ndakan ni kuenda nuu ñayii a,
vaa jâ ni ka xndoo i sukan tátnuni ni ja jin ko sa'a i ma.
127Chukan kúu ja saña chi kútoo xeen sa ndaka ja tátnuni ni ma.
Vi'i‑ka kútoo sa tnu'u maa ni a sana xu'un ma,
visi nanimaa oro kúu i ma.
128Vaa ûni jatanuu sa ndaka ja tátnuni ni ja sa'a sa ma
sana ndaka‑ka ja ka xnda'vi tna'a ñayii ñuu ñayivi a.
129Ûni vivii kúu ndaka tnu'u tátnuni ni a.
Chukan kúu ja ñu'u ini sa ja sa'a sa ndaka ora, vi Su'si.
130Vaa nute jin kachi ndaka ñayii ma
ja jin koniniso'o i sukan ká'an tnu'u maa ni a
chi ûni ndaxtnuu vava'a i nuu ñayii ma,
vaa vivii sa'a i ja ka jaku'ni ini ñayii
ka ndasa'a kuenda ja ka jiniñu'u i Su'si ma.
131Chukan kúu ja ni ndakune sa yu'u sa ya, te ni jaka ini sa,
vaa ûni ndiyo ini sa ja jaku'ni ini sa tnu'u tátnuni ni ma.
132Konde'ya ña'a ni, te kunda'vi ini ña'a ni,
sukan sa'a ni ji'in ndaka‑ka ñayii ka kandija ja ká'an ni ma.
133Te ndaskaka va'a ña'a ni ichi maa ni a,
te kó sa'a sa sukan ká'an tnu'u maa ni a,
te ni‑in ja u'vi kundee tatnuni nuu sa a.
134Te sa'a ni ja kaku sa nuu ñayii ka sa'a ndeva'a tna'a ma,
te ku'un ini sa ja ko sa'a sa tnu'u tátnuni ni ma.
135Vivii konde'ya ña'a ni saña ja jinukuechi sa nuu ni a,
te kaxtnu'u ni naxe ko sa'a ko kuu sa sukan tátnuni ni ma.
136Nda'yu sa ji'in ndenuu sa,
vaa kúxii ini sa ja ñatuu ka kandija ñayii ma
ja jin sa'a i sukan tátnuni ni ma, vi Su'si.
137Su'si iya sa'a ndaa sa'a ndija kúu ni,
te ndakan ndandaa ni kuenda nuu ñayii ma.
138Vaa ndaka tnu'u tátnuni ni ja jin ko sa'a ñayii ma,
tnu'u ndaa tnu'u ndija kúu i, te kuu kukanu ini sa,
vaa masu nawa xnda'vi ña'a ni.
139Te ndákiti xeen ini sa,
vaa ndaka ñayii ñatuu ka kunimani nuu sa ma,
chi ni ka ndunaa i ndaka sukan ká'an tnu'u tátnuni ni ma.
140Ja ndaa ndija kúu ja tnu'u tátnuni ni ma,
tnu'u nanimaa kúu i,
te saña ja jinukuechi sa nuu ni a, vi Su'si, chi játna ini sa.
141Saña chi in ñayii masu kanuu kúu sa,
te ka saxiko ña'a ñayii ma,
kovaa saña chi ñatuu nde ndí ini sa,
vaa masu nde ndunaa sa sukan tátnuni ni ma.
142Ndijin, vi Su'si, chi ndimaa sa'a va'a sa'a ndaa ni,
vaa ja ndaa kúu tnu'u tátnuni ni a.
143Te visi tnundo'o tnuneni ka kenda koo nuu sa ya,
kovaa masu ndí ini sa,
vaa ja ndí ini‑ka sa kúu ja sa'a sa
sukan ká'an tnu'u tátnuni ni ma.
144Te ndaka tnu'u tátnuni ni ma chi ndimaa tnu'u ndaa kúu.
Te chindee ña'a ni ja na jaku'ni va'a ini sa,
sukan‑va'a kuu koteku sa.
145Vaa ni‑yu'u ni‑ini sa ndákune'e ña'a sa, vi Su'si Iya Tátnuni,
te chindee ña'a ni, te kó sa'a sa sukan tátnuni ni ma.
146Vaa maa ni ndákune'e sa, te sa'a ni ja kaku sa nuu ja u'vi ma,
te chindee ña'a ni ja na sa'a sa sukan ká'an káchi ni nuu sa a.
147Ne'e xeen ma ndákoo sa, te jikan‑ta'vi sa ja na chindee ña'a ni,
te kúkanu ini sa ja sa'a ni sukan ká'an ni nuu tnu'u maa ni a.
148Te niñu masu nde kixi sa,
vaa ndákani ndáka'vi ini sa sukan ká'an tnu'u tátnuni ni ma.
149Su'si, koniniso'o ni ja ká'an sa ya,
te sukan nda'vi ini ni a,
te sukan sa'a va'a sa'a ndaa ni a,
te sa'a ni ja koteku sa.
150Vaa ndaka ñayii ka sondikin ña'a i saña ma,
ni ka jan tu'va maa i nuu ja u'vi ma,
te ni ka ndunaa i sukan ká'an tnu'u tátnuni ni ma.
151Kovaa maa ni, vi Su'si, chi iyo yatni ni ji'in sa,
te ja ndaa kúu ndaka tnu'u tátnuni ni nuu sa a.
152Te jâ ni kuu kii ja ni jaku'ni ini sa sukan ká'an sukan káchi ni a,
te tnu'u ká'an ni a chi koo maa i ni‑kani ni‑jika.
153Konde'ya ña'a ni, te kuni ni sukan ndó'o néni sa ya,
te chindee ña'a ni ja na kaku sa,
vaa saña chi ñatuu nde ndunaa sa tnu'u tátnuni ni ma.
154Nuu nda'a maa ni a na koo ndaka sukan ndó'o néni sa a,
te maa ni ndatava ña'a nuu tnundo'o a,
te sa'a ni ja koteku sa sukan ká'an tnu'u maa ni a.
155Te ñayii ka sa'a ja u'vi ma chi jika‑ni ka iyo i nuu ni a,
te masu jin kaku i nuu ja u'vi ma,
vaa masu nde ka ndanduku i tnu'u tátnuni ni ma, vi Su'si.
156Kua'a xeen tnu'u nda'vi ini neva'a ni ja jin kuu sa, vi Su'si,
te sukan ká'an tnu'u ndaa tnu'u ndija ni a,
te sa'a ni ja koteku sa.
157Kua'a xeen ñayii ka kuni u'vi nuu sa, te ka sondikin ña'a i,
kovaa saña chi masu nde ndunaa sa
ndaka tnu'u ká'an tnu'u káchi ni nuu sa a, vi Su'si.
158Kovaa nde'ya sa ndaka ñayii ñatuu ka kandija i ja ká'an ni ma,
te ndákiti ini sa nuu i.
159Iya Tátnuni, konde'ya maa ni ja saña
chi kútoo sa ndaka sukan ká'an tnu'u tátnuni ni ma,
te ja sukan kútoo ña'a maa ni ma, te sa'a ni ja koteku sa.
160Te ja ndaka sukan ká'an tnu'u tátnuni ni ma
chi nanimaa tnu'u ndaa tnu'u ndija kúu,
te ká'an i sukan ndakan ni kuenda nuu ñayii ma ni‑kani ni‑jika.
161Tee ka kuu sa'ya rey ma, ja ka kuu de tee ka tatnuni ma,
ni ka sondikin ña'a de,
te masu na kuechi sa,
kovaa ini anua sa ya chi na'a sa
sukan ká'an tnu'u tátnuni ni ma,
te yu'u sa nasa yukan, te masu sa'a sa sukan kúni ni ma.
162Kovaa kúu sii ini sa nuu tnu'u tátnuni ni ma.
Kuenda kúu in ñayii ja ni ndani'i i kua'a xeen xu'un,
sukan kúu sa.
163Te ndaka tnu'u xnda'vi tna'a ñayii ma chi saxiko sa
te kúkini ini sa nuu i,
kovaa kúu sii ini sa nuu tnu'u tátnuni ni ma.
164Saña chi uja jichi ndáchiñu'u ña'a sa in nduu ma,
ja kuechi ja sukan káxtnu'u ndaa káxtnu'u ndija ni
sukan jin ko sa'a jin ko kuu sa ma.
165Te ñayii ka jatna ini te ka sa'a i sukan tátnuni ni ma
chi ka iyo sii ini xeen i, te ñatuu‑ka nawa ja'nu ndee
ja jin konukuiñi va'a i nuu ni.
166Saña chi ndetu sa ja sa'a ni ja kaku sa nuu ja u'vi ma, vi Su'si,
te ndaka tnu'u tátnuni ni ma chi sa'a sa sukan ká'an i ma.
167Te kándija sa sukan ká'an tnu'u tátnuni ni ma,
te ûni játna ini xen‑xeen sa sukan ká'an ma.
168Te saña chi ndí ini sa ja sa'a sa ndaka
sukan ká'an tnu'u tátnuni ni ma,
vaa maa ni chi jini ni nawa sa'a nawa kúu sa
ndenu kua'an ndenu vee sa.
169Su'si maa sa, na kenda nuu maa ni ndaka ja ká'an kachi sa ya,
te sa'a ni ja na jaku'ni ini sa sukan ká'an tnu'u maa ni a.
170Ndaka ja jikan‑ta'vi sa nuu ni a na kenda nuu maa ni, vi Su'si,
te sa'a ni ja na kaku sa, sukan ká'an tnu'u maa ni a.
171Vitna chi ni ndusii ini sa, te kata sa,
te ndachiñu'u ña'a sa, vi Su'si,
vaa káxtnu'u ni ndaka tnu'u tátnuni ni ma.
172Te ndaka'an ndakachi sa sukan ká'an tnu'u tátnuni ni ma,
vaa tnu'u ndaa tnu'u ndija kúu.
173Te koo ñama nda'a ni a ja ki chindee ña'a ni
ja na kaku sa nuu ja u'vi ma,
vaa saña chi jatanuu sa ja sa'a sa sukan ká'an tnu'u maa ni a.
174Te ja kúu ini xeen sa kúu ja na chindee ña'a ni
te káku sa nuu ja u'vi ma, vi Su'si,
vaa játna ini xeen sa sukan ká'an tnu'u tátnuni ni ma.
175Te sa'a ni ja kóteku sa te káta sa te ndáchiñu'u ña'a sa,
te tnu'u ndaa tnu'u ndija ni a na jin chindee ña'a
ja na koo va'a sa nuu ni.
176Vaa saña chi kua'an vee sa kúu sa.
Sukan kúu in ndikachi ni ski'in maa ti kúu sa.
Te ndanduku ña'a ni ja kúu sa ñayii jinukuechi nuu ni a, vi Su'si,
vaa ñatuu nde ndúnaa sa sukan ká'an tnu'u tátnuni ni ma.
Currently Selected:
Salmos 119: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
