Salmos 118
118
Salmo 118
Sukan jin ndakuan‑ta'vi o nuu Su'si ma ja ni chindee ña'a ya te ni ka kaku o nuu ja u'vi ma
1Jín ndachiñu'u o Su'si Iya Tátnuni ma,
vaa iya va'a ini kúu ya,
vaa kúnda'vi ini ña'a ya ni‑kani ni‑jika.
2Na jin ka'an ñayii ñuu Israel ma
ja ni‑kani ni‑jika kúnda'vi ini ña'a ya.
3Sa'ya tata Aarón ma, na jin ka'an i
ja ni‑kani ni‑jika kúnda'vi ini ña'a ya.
4Ndaka ñayii ka yu'u Su'si ma te ñatuu‑ka na ja u'vi ka sa'a i ma,
na jin ka'an i ja ni‑kani ni‑jika kúnda'vi ini ña'a ya.
5Saña chi kivi ni ndo'o ni neni sa ma,
te ni ndakune'e sa Su'si Iya Tátnuni ma ja na chindee ña'a ya,
te ni ndakone'e ya, te ni ndanune nda'a nuu sa a, ni jini sa.
6Su'si Iya Tátnuni ma iyo ji'in sa,
te másu koyu'u sa nawa sa'a ña'a ñayii ma.
7Su'si Iya Tátnuni ma iyo ji'in sa,
te iyo sa ne'un ñayii ka chindee ña'a ma,
te chukan kúu ja kuni sa sukan jin ndo'o jin neni
ñayii ka saxiko ña'a ma.
8Ja va'a‑ka kúu ja kukanu ini o Su'si Iya Tátnuni ma
sana ja kukanu ini o ñayii ma.
9Ja va'a‑ka kúu ja kukanu ini o Su'si Iya Tátnuni ma
sana ja kukanu ini o tee ka tatnuni‑ka ma.
10Ndaka ñayii ndaka ñuu ma,
ni ka ndakonduu ña'a i ja jin sa'a ndeva'a ña'a i,
kovaa ja maa Su'si Iya Tátnuni ma, te ni xnaa sa i.
11Ni ka ndakonduu ndi'i kuiti ña'a i,
kovaa ja maa Su'si Iya Tátnuni ma, te ni xnaa sa i.
12Ni ka ndakonduu ña'a i kuenda tnu'u ja ñuñu,
kovaa ja ka ndakiti xeen ini i nuu sa ma ni naa
kuenda kúu ora káyu iñu ma‑ni,
kovaa ja maa Su'si Iya Tátnuni ma, te ni xnaa sa i.
13Ni ka tunda'a ndeva'a ndekuu ña'a i, sukan‑va'a nduva sa,
kovaa maa Su'si Iya Tátnuni ma ni chindee ña'a,
te ñatuu ni kotuu sa.
14Su'si Iya Tátnuni ma kúu iya táa tnu'u ndee tnu'u ndatnu,
te maa ya ni sa'a ja ni kaku sa nuu ja u'vi ma,
te chukan kúu ja kata sa nuu ya ja ndachiñu'u sa ya.
15Ve'e ñayii ka sa'a ja va'a ja ndaa ma
ka kayu'u i, ja ka jita sii ini i,
vaa ni ka kaku i nuu ja u'vi ma.
Kua'a xeen kúu ja ni sa'a ya ji'in tnu'u ndee tnu'u ndatnu ya ma.
16Masu kuu ndaka'an ndakachi o sukan sa'a ya ma
ji'in tnu'u ndee tnu'u ndatnu ya ma,
vaa ni kundee ya nuu ñayii ñatuu ka kunimani nuu o ma.
17Masu kûu sa chi su'va koteku sa,
te ko ndaka'an ko ndakachi sa ja sa'a ja kúu ya ma.
18Ni wa'a ya tnu'u ja ni ndo'o ni neni sa ma,
kovaa ñatuu ni wa'a ya tnu'u ja kûu sa.
19Jin ndakune ni ye'e nuu ka ndatna'a ñayii
ka sa'a ja va'a ja ndaa ma,
sukan‑va'a na kivi sa te ndákuan‑ta'vi sa nuu Iya Tátnuni ma.
20Te ye'e ya'a kúu ye'e Iya Tátnuni ma,
te ye'e ya'a jin kivi koo ñayii ka sa'a ja va'a ja ndaa ma.
21Chukan kúu ja ya'a iyo sa, vi Su'si, te ndákuan‑ta'vi sa nuu ni,
vaa ni jiniso'o ni ja ni ka'an sa ma,
te ni chindee ña'a ni ja ni kaku sa nuu ja u'vi ma.
22Vaa yuu ni ka saxiko ñayii ka sa'a ve'e ma,
ni nduu i yuu kanuu‑ka.
23Te sukan ni sa'a maa Iya Tátnuni ma,
te yo'o chi ni ka sa'vi‑nka ini o ja sa'a ya a.
24Vitna kúu kii ja ni sa'a Iya Tátnuni ma,
te jín koo sii ini xeen o nuu ya.
25Iya Tátnuni, sa'a ni ja jin kaku tna sa vitna.
Jikan‑ta'vi xeen sa nuu ni ja na chindee ña'a ni
ja na jin kundee sa vitna.
26Ja va'a kúu iya vee nuu Iya Tátnuni ma.
Te onde ve'e Iya Tátnuni ma ka iyo sa,
te ka ka'an sa ja vii ja va'a ja jin kuu ndaka ni ja ve koo ni a.
27Iya Tátnuni ma kúu Su'si o,
te xtnuu ya ñu'u maa ya ma nuu o a.
Te chukan kúu ja jín koo sii ini o,
te jín ndakua'a o kiti jin ka'mi o nuu altar ya ma
ja ka ndachiñu'u o ya.
28Su'si maa sa kúu ni, te ndáchiñu'u ña'a sa,
te ndákuan‑ta'vi sa nuu ni, vaa maa ni kúu Su'si sa.
29Jín ndachiñu'u o Su'si Iya Tátnuni ma,
vaa iya va'a ini kúu ya,
vaa kúnda'vi ini ña'a ya ni‑kani ni‑jika.
Currently Selected:
Salmos 118: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
