Salmos 115
115
Salmo 115
Su'si ndija ma chi téku ya
1Masu nuu saña jin koo jayiñu'u ma, vi Su'si.
Masu nuu saña, su'va nuu maa ni na koo jayiñu'u ni ma
ja sukan kútoo ña'a ni a, ji'in sukan ká'an ndaa ni ma.
2¿Nava'a jin ka'an ñayii ñuu ñayivi a:
“¿Ndenu iyo Su'si ka ndachiñu'u i ma?”?
3Kovaa Su'si o ma chi iyo ya onde andivi ma,
te maa ya kúu iya ni sa'a ndaka nde a ni kuu ini ya
ja sa'a ya ma.
4Kovaa tna'a ja ka ka'an ñayii ñuu ñayivi a ja su'si i ka kuu ma
chi oro xi plata‑ni ka kuu i, te másu Su'si ka kuu ma.
Tna'a ja ni sa'a ñayii ma ji'in nda'a i ma‑ni ka kuu.
5Vaa ka iyo yu'u i, kovaa masu nde kúu jin ka'an i,
te ka iyo nduchinuu i, kovaa masu nde kúu jin konde'ya i.
6Ka iyo so'o i, kovaa masu nde ka jiniso'o i nawa ká'an o ma.
Ka iyo xitni i, kovaa masu nde kúu jin ni'i i xiko.
7Ka iyo nda'a i, kovaa masu nde kúu jin tnii i,
te ka iyo ja'a i, kovaa masu nde kúu jin kaka i,
va ni a in tnu'u masu nde kúu jin ka'an i.
8Te sukan‑ni kúu tna'a ja ni sa'a ñayii ma ji'in nda'a i ma,
sukan‑ni kúu tna maa ñayii ni sa'a ma,
te sukan ka kuu tna ndaka ñayii
ka kukanu ini ja su'si i ka kuu ma.
9Ndijin ja ka kuu ni ñayii ñuu Su'si ma,
jin kukanu ini ni Iya Tátnuni ma,
vaa suu ya kúu iya chíndee ña'a,
te kasi ndee kasi ndoso ya ja ni‑in ja u'vi
ma kenda nuu ka iyo ni a.
10Ndijin ja ka kuu ni sa'ya tata tee ni yo kuu Aarón ma
ja ka jinukuechi ni nuu Iya Tátnuni ma,
jin kukanu ini ni ya, vaa suu ya kúu iya chindee ña'a,
te kasi ndee kasi ndoso ya
ja ni‑in ja u'vi ma kenda nuu ka iyo ni a.
11Ndaka ni ja ka yu'u ni Iya Tátnuni ma
vaa ndakan ya kuenda nuu ni a,
jin kukanu ini ni ya, vaa suu ya kúu iya chíndee ña'a,
te kasi ndee kasi ndoso ya
ja ni‑in ja u'vi ma kenda nuu ka iyo ni a.
12Vaa Iya Tátnuni ma chi ndáka'án ña'a ya ndaka o a,
te táa ya ja vii ja va'a ja jin ni'i o,
te sukan sa'a ya ji'in ñayii ñuu Israel ma,
ji'in sa'ya tata tee ni yo kuu Aarón ma.
13Te sukan sa'a ya ji'in ñayii ka yu'u ja ká'an ya ma
te ñatuu‑ka na ja u'vi ka sa'a i ma,
ka kuu i ñayii nija'nu, ka kuu i suchi kuechi.
14Te maa Iya Tátnuni ma na taa kua'a xeen ja vii ja va'a nuu ni,
ji'in nuu in in sa'ya ni ma.
15Ja vii ja va'a ka kuu ni nuu Iya Tátnuni ma,
iya ni sa'a andivi a ji'in ñu'ú ya.
16Kovaa andivi ma kúu nuu iyo maa ya ja tátnuni ya ma,
te nuu ñu'ú ya ni wa'a ya ja jin koo sa'ya tata ñayii ma.
17Te ñayii ni ka ji'i ma chi másu kuu jin ndachiñu'u‑ka i
Iya Tátnuni ma ñuu ñayivi ya,
vaa ka iyo nañii nañii‑nka i chii ñu'ú ma.
18Kovaa yo'o ja ka teku o a chi jín ka'an o ja vii ja va'a ja kuu ya,
sukan‑va'a na koo jayiñu'u nuu ya onde vitna,
te ni‑kani ni‑jika jín ko sa'a o sukan.
¡Jayiñu'u na koo nuu ya! ¡Aleluya!
Currently Selected:
Salmos 115: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
