Salmos 116
116
Salmo 116
Sukan ndakuan‑ta'vi o nuu Su'si ma ja ni chindee ña'a ya te ni kaku o ja ñatuu ni ji'i o ma
1Kútoo sa Su'si o Iya Tátnuni ma,
vaa ni jiniso'o ya ja ni jikan‑ta'vi xeen sa nuu ya ma.
2Vaa ni yo niniso'o ñukuun ya ja ni jiña'a sa ya ma,
te chukan kúu ja ndaka kivi ja koteku sa ma,
te ko ndakune'e sa ya.
3Vaa vala‑nka ja kûu sa nkuu, vaa ni kundee kue'e ma nuu sa,
te vala‑nka ja kûu sa, te kúxii kúnda'vi ini sa nkuu.
4Kovaa sani te ni ndakune'e jajaa sa Su'si Iya Tátnuni ma,
te sa'a ni jiña'a sa ya:
“Su'si sa Iya Tátnuni, sa'a ni ja kaku ini anua sa ya
nuu ja u'vi ma”,
kúu sa jiña'a sa.
5Ja ndaa kúu ja Su'si o ya chi iya kuee ini kúu ya,
te sa'a ya ja va'a ja ndaa.
Saa vi, Su'si o a chi iya kúnda'vi ini ña'a kúu ya.
6Iya Tátnuni ma chi jito va'a ya ñayii ndákunitnuni
ja jiniñu'u i ya ma.
Ni kuita kuiti sa ja sani te kûu sa nkuu,
te ni sa'a ya ja ni kaku sa.
7Te sa'a ni jani ini sa:
“Ini anua, ndatatu, vaa Su'si Iya Tátnuni ma,
ni sa'a ña'a ya ja va'a.”
Sa'a ni jani ini sa.
8Vaa maa ni, vi Su'si, ni sa'a ni ja ni kaku sa te ñatuu ni ji'i sa,
te ni chindee ña'a ni ja masu konda'yu‑ka sa,
te jito ña'a ni ja masu kendeka‑ka sa, vi Su'si.
9Chukan kúu ja ndimaa ko kandija sa nuu Iya Tátnuni ma
ndaka kivi koteku sa ñuu ñayivi a,
10te kúkanu ini sa Su'si ma.
Chi vaa kivi nuu ni yo ndo'o, ni yo neni sa ma,
11te ñatuu ni'i ini‑ka sa nawa sa'a sa ma,
te ni jani ini sa ja ndaka ñayii ma,
masu inundija i ja ka ka'an i ma.
12¿Naxe ndachunaa sa nuu Iya Tátnuni ma
ndaka ja vii ja va'a ja ni sa'a ya ja kuu sa a?
13Masu nawa kuu sa'a sa, nú masu ja koo sii ini xeen sa
ja ni sa'a ya ja ni kaku sa nuu ja u'vi ma,
te ndakune'e sa Su'si Iya Tátnuni ma.
14Te suni sa'a sa tna'a ja ni skuiso sa nuu ya ma,
te jin kuni ndaka ñayii kúu ñuu ya ma.
15Ja nde'ya Su'si o Iya Tátnuni ma
ja ji'i in ñayii iyo va'a iyo ndaa nuu ya ma,
chi kúxii xeen ini ya.
16Su'si Iya Tátnuni, saña ja jinukuechi sa nuu ni a,
te suni si'i sa ma,
ni yo jinukuechi ña nuu ni a,
te maa ni ni ja'nde yo'o kaa ni yo nu'ni sa ma.
17Te chukan kúu ja kata sa nuu ni, te ndataa sa jayiñu'u,
te ndakune'e ña'a sa, ja kúu ni Su'si Iya Tátnuni.
18Nuu Su'si Iya Tátnuni ma sa'a sa tna'a
ja ni skuiso sa nuu ya ma,
te jin kuni ndaka ñayii kúu ñuu ya ma.
19Onde nuke'e veñu'u nuu iyo Iya Tátnuni ma,
ja iyo i sasava ñuu Jerusalén ma, koo sa,
te ndakua'a sa tna'a ja ni skuiso sa nuu ya ma.
¡Aleluya!
Currently Selected:
Salmos 116: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
