Salmos 103
103
Salmo 103
Sukan ndakuan‑ta'vi o nuu Su'si ma ndaka ja va'a táa ya ma
1Ini anua o a na ka'an ja vii ja va'a ja kuu Su'si o ma,
te ni‑ka'nu yikikuñu o a na ndachiñu'u iya ii ma.
2Na ka'an o ja vii ja va'a nuu Iya Tátnuni ma,
te máko ndunaa o ndaka ja vii ja va'a táa ya ma.
3Vaa maa ya kúu iya sákanu ini ndaka kuechi ni yo sa'a o ma,
te maa ya kúu iya ndásava'a ña'a ndenu u'vi o ma.
4Te maa ya kúu iya ndátava ña'a nuu ja u'vi ñunee o ma,
kuenda tnu'u ja ini yavi ma ñunee o,
te ja sukan kútoo ña'a ya ma te vivii kúnda'vi ini ña'a ya ma,
te táa kua'a ya nawa jiniñu'u o ma.
5Te maa ya táa ndaka nawa kaa nawa ko'o o,
te maa ya sa'a ja ndujaa o sukan kúu ya'a tioko ma.
6Maa Su'si Iya Tátnuni ma kúu iya sa'a ndaa,
te chíndee ya ñayii ka ndo'o ka neni
ja ka sa'a ndeva'a ña'a in‑ka ñayii ma.
7Vaa ichi maa ya ma ni kaxtnu'u ya nuu Moisés ma,
te ni kaxtnu'u ya nuu ñayii ñuu Israel ma
ndaka sukan sa'a sukan kúu ya ma.
8Iya nda'vi xeen ini kúu ya,
te ka'nu xen‑xeen ini ya te kuee ini ya,
vaa ñatuu ndákiti yachi ini ya.
9Te ni masu chú'un ini ya ja sa'a so'o ñayii ma,
te ni masu ndakiti ini ya ni‑kani ni‑jika.
10Visi ka sa'a o ndaka ja u'vi ma,
kovaa masu nde ndása'a ña'a ya sukan iyo
ja jin ndando'o jin ndaneni o ma,
vaa kua'a xeen ja u'vi ka sa'a o nuu ya,
kovaa kánda ya.
11Vaa sukan sukun andivi a,
sukan ka'nu ini ya te kúnda'vi ini ya ñayii ka yu'u i ya ma
te ñatuvi‑ka na ja u'vi ka sa'a i ma.
12Te jika jika ni jan skana ya ja u'vi ni ka yo sa'a o ma,
sukan jika onde nuu kána kandii ma te onde nuu kée kandii ma.
13Te sukan kúnda'vi ini ñayii sa'ya i ma,
sukan kúnda'vi ini Su'si Iya Tátnuni ma
nuu ndaka yo'o ja ka yu'u o ya
te ñatuu‑ka na ja u'vi ka sa'a o a.
14Vaa maa ya chi jini ya sukan‑ni ka kuu o a,
te maa ya chi na'a siki ya ja ñuyaka‑ni ka kuu o.
15Vaa ñayii ma chi sukan‑ni kúu yi'i ma‑ni kúu i,
te sukan‑ni kúu i ndaka kivi iyo i ñuu ñayivi a.
Vaa yi'i ma chi jáa ita i ma yuku ma,
16te yá'a in tachi yi'i nini'i,
sani te náa ita i ma nuu núkoo i ma,
te masu na in‑ka ndáka'án‑ka ña'a.
17Kovaa Su'si ma chi ni‑kani ni‑jika kúnda'vi ini ña'a ya
ndaka yo'o ja ka yu'u o
nasa yukan, te jin sa'a o in ja u'vi
te ndakan ya kuenda nuu o ma.
Te tnu'u ndaa tnu'u ndija ya ma koo nuu sa'ya tata o ma
ni‑kani ni‑jika,
18nuu ndaka ñayii ka sa'a sukan ni tatnuni ya ma
te ka ndi ini i ja jin sa'a i ndaka sukan ni tatnuni ya ma.
19Vaa Su'si Iya Tátnuni ma, onde sukun ma ni sa'a ya
nuu núkoo ya ma,
te tátnuni ya nuu ndaka ja iyo ñuu ñayivi a.
20Ndaka ro ja ka kuu ro ángel ka kandija sukan tátnuni Su'si ma
te ka sa'a ro sukan ká'an ya ma
te ka iyo tnu'u ndee tnu'u ndatnu ro a,
jin ndachiñu'u Su'si Iya Tátnuni ma.
21Ndaka ni ja ka jinukuechi ni nuu Su'si Iya Tátnuni ma
te ka sa'a ni sukan kúni ya ma,
jin ndachiñu'u ni ya.
22Ndaka ni ja ni sa'a ña'a ya ji'in nda'a ya ma,
jin ndachiñu'u ni ya ndaka nuu ka ndatna'a ni ma.
Te ndijin ja ka kukanu ini ni ja maa ya kúu Iya Tátnuni ma,
jin ndachiñu'u ni ya.
Ini anua, ndachiñu'u ndija Su'si Iya Tátnuni ma.
Currently Selected:
Salmos 103: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
