Salmos 102
102
Salmo 102
Sukan kakan‑ta'vi o nuu Su'si ma ora ni kenda in tnundo'o ma te kúxii kúnda'vi ini o ma
1Su'si Iya Tátnuni, koniniso'o ni ja jikan‑ta'vi sa ya,
sukan‑va'a na kenda ja ká'an nda'vi ká'an kee sa ya
nuu iyo ni a.
2Te máko chu'u ni kivi kúxii kúnda'vi ini sa ma,
su'va ndakone'e kunu ni nawa jikan‑ta'vi sa ma.
3Vaa kivi iyo ja koteku sa ya chi ve ndi'i
sukan naa ñu'ma ma,
te yiki sa ya chi kuenda tnu'u ja nuu ñu'u tikayi ma
ka kayu i.
4Te ini anua sa ya chi ve kuita i sukan kúu yi'i ma,
vaa masu na nde jaa‑ka sa xita.
5Te ja kuechi ja tnána u'vi sa ma te ni kuxii xeen sa,
te ûni kuu ka'vi o yiki sa a.
6Vaa ndó'o sa sukan ndó'o in lasaa kiti ndute ma
te ni kenda ti nuu ñu'ú yichi ma nuu ñatuu nawa iyo ma,
xi sukan kúu tiñumi ma ja kúu maa kúu in‑ni ti ma.
7Te ni ñatuu kúu kusu sa,
te sukan kúu lasaa kiti núkoo maa núkoo in‑ni ti xini ve'e ma,
sukan kúu sa.
8Te ndi‑kivi ndi‑kivi ka ka'an ndeva'a ñayii
ñatuu ka kunimani nuu sa ma ja kuu sa,
te ñayii ka ndakiti ini nuu sa ma, ni ka ndatna'a i,
te ni ka ndatnu'u tna'a i naxe jin sa'a ña'a i ja u'vi.
9Te chukan kúu ja saña chi kuenda tnu'u ja xita sa ndeyu sa
kúu yaa nuu ñu'u ma,
te ndute nuu sa ma, ndásakanuu de ji'in ndute ji'i sa ma.
10Te kuechi ja ni ndakiti ini ni nuu sa ma kúu
ja ni ndokani ña'a ni,
te ni ndaskana tuku ña'a ni nuu ñu'ú a.
11Te chukan kúu ja kivi iyo ja koteku sa ma
chi kua'an i sukan kúu kati kuanda'vi ma,
te kuenda tnu'u ja sukan ve yichi yi'i ma,
sukan‑nka‑ni kúu sa.
12Kovaa maa ni, vi Su'si, chi ni‑kani ni‑jika koo ni,
te jin ndaka'án ña'a ndaka sa'ya tata ñayii ma.
13Te ndijin, vi Su'si, chi ndokuiñi ni,
te kunda'vi ini ni ñuu Sion ma,
vaa jâ ni kenda kivi ja kunda'vi ini ni ñayii ñuu yukan,
te jâ ni kenda kivi ja ni jani ini ni ma.
14Vaa ñayii ka jinukuechi nuu ni ma
chi ka kuxii ini i ja ni tnana ñuu i ma,
te ka nde'ya i ja ni nukoxtna'a ndaka yuu ma kaa i ma,
te ka kunda'vi ini i.
15Te ndaka ñayii ka iyo ni‑ka'nu ñuu ñayivi a,
jin koyu'u i maa ni, vi Iya Tátnuni,
te tee ka kuu rey ma,
jin koyu'u de ja jin kuni de jayiñu'u ni ma.
16Vaa nuna ndakani va'a ni ñuu Sion ma,
te ndaka ñayii ma jin kuni jayiñu'u ni ma.
17Vaa kuniso'o ni ja ka jikan‑ta'vi ñayii nda'vi ñayii kee
ka iyo yukan ma,
te masu saxiko ni ja ka ka'an ka kachi i ma.
18Te ndaka cha'a jakondee nuu tutu ni a, vi Su'si,
sukan‑va'a jin kuni ndaka ñayii kenda koo‑ka ma,
te jin ndachiñu'u ña'a i,
te jin ko kuu i ñuu maa ni, vi Yuva sa Su'si.
19Vaa Su'si ma, onde sukun ma onde veñu'u ii ya ma iyo ya,
te nde'ya ya nuu ñu'ú ya,
20sukan‑va'a kuu kuniso'o ya ja ka tnana u'vi ñayii ka iyo
ja sani te jin ka'ni ña'a ñayii ma,
21sukan‑va'a ñayii ka iyo ñuu Sion ma,
jin ndaka'án i sukan sa'a ya ma,
te koo jayiñu'u ya ñuu Jerusalén ma.
22Kivi jin ndututu ñayii ndaka ñuu kuechi‑ka ma
ji'in ñayii ka iyo ñuu na'nu‑ka ma,
te jin kunukuechi i nuu Su'si ma
kuenda tnu'u ja in‑nka‑ni ñayii ka kuu i.
23Maa ya ni sa'a ja ni kuita sa ichi kua'an sa a
te jaku‑ni kivi koteku sa.
24Ni jiña'a sa ya:
“Su'si maa sa, máko ndaka'nu sava ni kivi koteku sa ma,
vaa ndijin chi ni‑kani ni‑jika iyo ni”,
kúu sa jiña'a sa ya.
25Vaa onde xinañu'u ma,
te nda'a maa ni, ni sa'a ni ñu'ú a,
te nda'a maa ni, ni sa'a ni andivi ma,
te nda'a maa ni a, ni sa'a ni ndaka ma.
26Te ndaka cha'a chi jin naa i,
kovaa maa ni chi koo ni ni‑kani ni‑jika.
Te ndaka cha'a chi jin yii i kuenda kúu sa'ma ne'nu sa ma,
te kuenda sukan ndáxsama sa sa'ma sa ma‑ni,
sukan‑ni ndaxsama ni, te jin ndujaa i.
27Kovaa maa ni chi suni maa ni koo,
te masu nama ndi'i kuiya ni a,
vaa ni‑kani ni‑jika koo ni.
28Te sa'ya ñayii ka jinukuechi nuu ni a chi jin koo va'a i,
te ndaka sa'ya tata i ma, jin koo i nuu ni a ni‑kani ni‑jika.
Currently Selected:
Salmos 102: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
