Salmos 104
104
Salmo 104
Su'si ma, jito va'a ya ndaka ja ni sa'a ya ma
1Ni‑yu'u ni‑anua sa ndachiñu'u sa Iya Tátnuni ma.
Su'si maa sa, Iya Tátnuni, iya ka'nu xeen kúu ni,
te kanuu xeen ni, te iyo xeen jayiñu'u ni.
2Te ndíi ni in sa'ma yé'e ni'ni,
te kuenda tnu'u ja ni skuili ni in sa'ma jite xeen,
sukan‑ni ni sa'a ni andivi a.
3Te siki ndute iyo onde andivi ma ni sunkani va'a ni ve'e ni ma,
te siki viko ma yoxtnee ni kua'an vee ni kúu ni,
ja kánaa ni ji'in ja ñatuu kúnimani nuu ni ma,
te sukan yi'i kajin ma, sukan kua'an vee ni kúu ni.
4Te sa'a ni ja kajin yi'i ma káxtnu'u
nawa kúni ni ja káxtnu'u ni nuu ñayii ma,
te sa'a ni ja ñu'u i'ni ma chi ka kandija i ja ká'an ni ma
nú nawa iyo ja jin ka'mi i.
5Te vivii sa'a ni, vi Su'si,
vaa ni sa'a ni ja ni jinkuiñi vava'a ñuu ñayivi a,
te masu na in skanda ña'a i nuu iyo i a.
6Te ni sa'a ni ja ni chitu ndute ma ñuu ñayivi a,
te ni ka sa'vi ndaka yuku ma,
kuenda tnu'u ja in sa'ma ni jasi ni siki ndaka i ma.
7Sani te nuu ni tatnuni ni ja na yichi ndute ma,
te ja ni jiniso'o ndute ma sukan ni ka'an ni ma,
te ñama ñama ni yichi de.
8Sani te ni ka ndatuu yuku ma,
sani te ni ka ndatuu ndaka ñu'ú ma,
te ni nduu tuku sukan ni sa'a ni onde xinañu'u ma.
9Sani te ni jasi ni ndute ma,
sukan‑va'a masu yanduu‑ka de ja ndii de in‑ka jichi
te ndachitu de ñuu ñayivi a.
10Te vivii ni sa'a ni, vi Su'si,
vaa ni sa'a ni ja vivii jika ndute yute ma,
te kívi nduu kívi ni'ni de ne'un yuku ma.
11Te ka ni'i ndaka kiti ka iyo yuku ma ndute ka ji'i ti,
te onde burru yuku ma, kúndee ndute ma
ja ka ya'a ini ti ja ka yichi ti ma.
12Te lasaa ma, ka sa'a ti taka ti
ne'un nda'a yutnu ka nukoo yu'u yute ma,
te ka jita ti ja ka iyo sii ini ti.
13Te onde sukun nuu iyo ni a,
te skuun ni savi te yoso ni ndute ni‑ka'nu yuku ma,
te ndaka ja sa'a ja kúu ni a,
te kúu sii ini ñu'ú a vaa masu nawa ja'ni ña'a i.
14Te sa'a ni ja ka ja'nu ndaka yi'i ma,
sukan‑va'a jin kaa kiti ma,
te sa'a ni ja ka ja'nu ndaka ja súnkoo ñayii ma,
sukan‑va'a jin ni'i i ja jin kaa i.
15Te sa'a ni ja ka ni'i ñayii ma ndute nde'ya uva ma
ka ji'i i te ka iyo sii ini i,
te sa'a ni ja iyo aceite tnu olivo ma
te ndúvii ndúsii ini yikinuu ñayii ma,
te sa'a ni ja ka ni'i ñayii ma ja jin kaa i
te ka iyo tnu'u ndee tnu'u ndatnu i.
16Te maa ni, vi Su'si, sa'a ni ja jika ndute xuu tnu itni
ni sunkoo ni ñuu Líbano ma,
te ka iyo yute tnu ma.
17Te yukan ka tnaa lasaa ma taka ti,
te in‑ka jichi tnu itni ka nukoo yukan ma
ka sa'a lasaa ka nani cigüeña ma taka ti.
18Te suni ni sa'a tna ni ja onde yuku sukun‑ka ma
ka iyo ndixi'yu yuku ma,
te ne'un toto ma ka sa'a tna iso ma ve'e ti.
19Te vivii ni sa'a ni, vi Su'si,
vaa ni sa'a ni yoo ma ja xtnuu i jakuaa ma,
te káxtnu'u i na tiempo na kivi kúu ma,
te ni sa'a ni kandii ma,
te na'a maa i na ora kána i na ora kée i ma.
20Te maa ni sa'a ja kúnee ora jakuaa ma,
te ora yukan ka ke koo ndaka kiti ka iyo yuku ma,
te ka sondikin tna'a ka sondikin tna'a ti kuan koo ti.
21Te ndika'a kuechi ma, ka nda'yu nda'vi ka nda'yu kee ti
ja ñatuu nawa ka ni'i ti ja jin kaa ti,
sukan‑va'a kunda'vi ini ni ti, vi Su'si.
22Sani te ora ve kana kandii ma, te ka ndututu ti,
te ka ndivi koo ti yavi ti ma.
23Sani te kée ñayii ma kua'an i
ja satniñu i nii nduu ma onde ñini kuiti ma.
24¡Saa vi, Iya Tátnuni,
te ûni kua'a xen‑xeen kúu ja ni sa'a, ni kuu ni!
Te ndaka ni jani, ni ka'vi ini ni, te ni sa'a ni,
te ni‑ka'nu nuu ñu'ú a iyo ja vii ja luu ni sa'a ni ma, vi Su'si.
25Te ka'nu ka'nu ni sa'a ni mar ma
nuu ñu'u kua'a xen‑xeen ndute ma,
te ka ñu'u kua'a xen‑xeen kiti ndute ma,
ka kuu ti kiti na'nu, ka kuu ti kiti kuechi.
26Te yukan kuan koo ve koo barcu ma ka kuu tnu,
te yukan ñunee kiti ka'nu kiti xeen nani leviatán ma,
te maa ni sa'a ja kasiki ti nuu ndute ma.
27Te ndaka ti ka kukanu ini ña'a maa ni,
ja kua'a ni ja jin kaa ti ora ka kokon ti ma.
28Maa ni wa'a ja jin kaa ti, te yika‑ni ja ka ndaxtutu ti.
Ndákune ni nuu nda'a ni a,
te ka ni'i ti ndaka ja ka jiniñu'u ti ma.
29Te nuna ma sanuu ni ja kua'a ni ja jin kaa ti ma,
te ka ndi ini xen‑xeen ti.
Te nuna kasi ni ja masu kuu jin xtatachi‑ka ti,
sani te jin kûu ti, te jin nduu ti ñuyaka‑nka‑ni.
30Kovaa kivi tetniñu ni Xtumani maa ni ma,
te ndujaa nuu ñu'ú ya,
te jin nduva'a jaa ndaka tuku ti, vi Su'si.
31Te jayiñu'u Iya Tátnuni ma na koo ni‑kani ni‑jika,
te kóo sii ini ya nuu ndaka ja ni sa'a ya a.
32Vaa nde'ya ya ñu'ú ya, te tnáa,
te yika‑ni ja kaki'i nda'a ya yuku ma, te ka kana ñu'ma.
33Nuu maa Su'si Iya Tátnuni ma kata sa
ndaka kivi nani téku sa a.
34Ora ndákani ndáka'vi ini sa ja sa'a ja kúu ya a,
te na jatna ini ya sukan ndása'a sa kuenda ja ni sa'a ya ma,
vaa maa sa chi kúu sii ini xeen sa nuu Iya Tátnuni ma.
35Te na xnaa maa Su'si ma ñayii ka sa'a ja u'vi ma,
te máko jin koo‑ka i ñuu ñayivi ya.
Kovaa ini anua sa a na ndachiñu'u Iya Tátnuni ma.
¡Jayiñu'u kóo nuu Iya Tátnuni ma!
Currently Selected:
Salmos 104: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
