Idi Ufa 56
56
Anutuna saqarikira innaaru.
1Oo Anutu, anee qiniara qimudaoo qia.
Faiqí moomoo nimudaanai qimasee qini daru qifaqaa qidammia.
Qini namuqaa aiqama kari qini qifaqasee dariraridammia.
2Qiniara ataasataasa qimariasa faasaambaasaana qini daru qifaqaa qidammia.
Moomoosa qini dariraridaqa.
3Qinee rufiaunna kari Oo Yaawee, qinee ani kai saqarikidaqa.
4Qinee Anutuna saqarikdaqa sia moo ainainara rufiaidaqa.
Mina qima afeekaikira ufara irisee mina auqu quqeeraidaqa.
Faiqí faiqi nana mandaikee maqimaqaifaqa sia qinee rufiaanaura.
5Aiqama faasaana qini namuqaa ummaara qimidaqa.
Misa maqee maqee qini mandaikamma qimaqarara kai iridaqa maridaqa.
6Misa qini marirana nirana qiqafamasee qini darirara kukeeaqa maridaqa.
7Oo Anutu, anee misa manda oosana akiiqara aupurarana nimia.
Anee aneenna aanooqiranannai mimaqannaasa muqufisee rafaaqafunnisaa.
8Oo Anutu qini qiki raqarana aneenna papiqaki akararua.
Qini daukunu quminara papiqaki padimmasee akara rua.
9Qinee ani aaraanana anee irisee qinaqa namuqaa sandeefaranoo.
Anee miqinaqa qini Anutufa qini saaroo qidanoo fee qianaura.
10Qinee Anutuna saqarikidaqa mina qima afeekaikira ufara amooqidaqa.
11Qinee mi Anutunasaa kai qeeqa irirana rusidaqa.
Faiqí faiqi nana mandaikee maqimaqaifaqa sia qinee rufiaanaura.
12Oo Anutu qinee qima afeekaikiafanna ufanara irisee
dufi dufi qirana aandau tatufiranara foora suqamianaura.
13Oo Yaawee, qinee madika afaisaa oonuraunnana
uqeera qisaannanara dufi dufi qira tatufirana suqamianaura.
Qinee farindamaki saamurirara unana qini mara findifuma qisaananoo.
Qinee ani Anutuna afusaa kaqi marira kaaqa qaranasaa nuaneera mara findifuma qisaananoo.
Currently Selected:
Idi Ufa 56: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
