Idi Ufa 57
57
Dadaaqiani fee innaaru.
1Qiniara qimudaoo qimisee dadaaqiannee qidaqa.
Oo Anutu qiniara qimudaoo qimasee dadaaqia.
Qinee anee iannannai dadaaqianeera
animarunnanara irisee qimudaoo qia.
Qinee ani aqoosa ameemaanai itita qisaina kuqirafa aiqaramafinaqa akoonnai anianaura.
2Qinee Anutuna aiqama afeeka faqaana aaraidaqa.
Qini didimari aiqama ainainna qimimari Anutuna aaridaqa.
3Mifa innaarunaindari qini innaaru qirana iriseenoo qini asumu maraannoo.
Mifa qini mandaikamma qimaqee mariasa rafaaqafidanoo.
Anutufa narí sia taikaaninna amuqusirana faqa narí
mapukusee marira oosana faqa qini uqaqifiqaidanoo.
4Qinee kaasau aandau raioonnara foora fiqu fiqu iqa mariana qambaanai maridaqa.
Misa nifai fannoo feefara foora faqa faaqaanara foora faqa kaaqa aaruqirausa qambaanai maridaqa.
Misa nifauru fannoo aseemara foora raiqarafa faiqí ateekee marisa qambaanai maridaqa.
5Oo Anutu, aneenna uriqararana innaarunai uqannifiqaa.
Aneenna qareenarana aiqama maqa maaqaki mariasa uqannifiqaa.
6Qini namuqaa qini qiku ufana fufidammia.
Qini daundurai rufiarafa marinara mapamidaqa.
Misa qini qimaara madika indufuseeqa nariqa sia
irirai nári indufuqaanaki nári kai doo aqufia.
7Oo Anutu miqiqa maridaqa aniara irunanoo qini qimuqusa mapukinoo maridanoo.
Minara qinee idi raidaqa ani amooqianaura.
8Qinee findifiqa.
Qinee piripuna faqa ufireena faqa arimariananoo iaqainanoo suani afu uruani.
9Oo Yaawee qinee moomoo maqannaasa qambaanai kikiqamafi amooqianaura.
Qinee moomoo fasiqa anaasee qambaanai idi raida ani amooqianaura.
10Oo Yaawee ani maasara amuqusirafa firaatia innaaruna amana kai ooru maridanoo.
Ani mapukusee marira oosana fannoo kudimanda mariqoo ooru maridanoo.
11Oo Anutu, aneenna uriqararana innaarunai uqannifiqaa.
Aneenna qareenarana aiqama maqa maaqaki mariasa uqannifiqaa.
Currently Selected:
Idi Ufa 57: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
