Idi Ufa 55
55
Faiqí moo fannoo mina aqoondi fannoo ueeqasoofanoo Anutufa dadaaqianifeera innaaru qinau.
1Oo Anutu qini innaaruqirana iria.
Qinee ani iramirianana sia aaqoosaa ititasee kaqinni oori rafusu aqua.
2Anee qini ufa irisee dadaaqinnanara qima qimia.
Qini ummaara irirafa qini daruaqaa midanoo.
3Qini namuqaa qini mandaikamma qimaqarara sandanainai qidaqa.
Mi manda oosanna maree mariasa qini rafaaqafu qimaqaidaqa.
Misa ummaara mareeqee qinisaa quqaidaqa.
Misa qiniara aanoo qimasee fidiqaamaqisaidaqa.
4Qinee firaaqoo rufiee marunanoo mi irirafa qini kuqirafa qimaqaa idanoo.
Kuquanna daaquqarafa firaafa daakinoo maridanoo.
5Firaaqoo rufiee marunanoo daindiri raidanoo.
Kuqira daaquqarafa qini rafaaqfinoo maridanoo.
6Qinee nakipuruna miqirausa qiqoosa faqaasa
maridau qaqamaree moosaa oonuree idooaranaki marini.
7Qinee qaqamaree nianai faiqí sia mariannai maaqa marunaiqini.
8Ufainamu faqa aakuasaa namufaqara foora
namuqaa darimariafaqa ufini maridau kai kaqi mooatinai auqaanaira foora asooarannai fini.
9Oo Yaawee anee qini namuqaa ufa qirana furufaramma nimaqa.
Narirafa faqa aanooqirafa faqa qini maqusaki
marinara miqimmannisaaneera qinee ani iraidaqa.
10Eendaki faqa faasaana faqa maqusa faandaamura
afaimau oonuree aniree idaqa manda ainaina faqa ummaara faqa uqeeraidaqa.
11Kuridinnimaqara oosana fannoo maasa maqusaki aiqama tinai maridanoo.
Narira ufa faqa unna qira ufa faqa maasa maqusaki aiqama tinai qumbiqanoo maridanoo.
12Qini namuqaa qifasaasa ufa qimi naqau kaqi maraunaiqini.
Qini namuqaa darirari faqau qinee miqooqari kukeeqafini.
13Sia qini namuqaa fau miqidau anee qini fooqaa ira
fasiqa qini qifaaqasaa qiqoondi fannoo qini qiqoonafa qiniara ueeqee mariananoo.
14Maaqanda moomoosa faqa moodaanaki Anutuna
amaana maqaki keeqafiqa amiqira ufa narí
qimami narí qimami qimari qiafana.
15Kuqirafa qini namuqaauqa tautumasee naruani.
Misa kaqi marifaqa misa mareeqee kuqirausa marianaki quqaaqa.
Aaqarafa misa maaqaki faqa misa nimuqusaki faqa marinara miqiaqa.
16Qinee Anutuna aaraananoo mifa qini asumu maraannoo.
17Eeneemarinaqa faqa kananaana faqa faasaana
qambaana faqa qinee qeeqa aupuraranakiqari aaraananoo mifa qini ufa iriannoo.
18Rakiranaki moomoo namuqaa darirariafanoo
Yaaweefa minakinaana amiqimmasee qifiqaifaqa oonurandee qimaaqa anianaura.
19Misauqa nári manda nirana sia minnisee andeeqarannai quandaidaqa.
Misa Anutunara rufiarafa sia maridanoo.
Anutufa naaru mariranakiqari uriqararafa marifa qini innaaru iriseenoo misa aupurarana nimiannoo.
20Qini ooqeenaa qiqoondi fannoo narí aqoondiuqa naridanoo.
Narí aqoondikira qima afeekaikira ufa rukiasee naridanoo.
21Mina afaurusaa ufa fannoo fadameenara foora amiqi
amiqi qimarifanoo mina amuqusaki qari rakirafa kai kambiqee marifa maridanoo.
Mina ufa fannoo fadameenara foora farindaidanoo
mi ufana anoona aseema miqirafa maridanoo.
22Aneenna ummaara Yaaweenasaa quqasainanoo mifa aufadama amaqaannoo.
Yaaweefa andeeqarausa mandainainaki aqufifanoo
irinoo siamma mininnisaannoo dadaaqammiannoo.
23Oo Anutu anee faiqí kuqa nárí mariasa faqa unna
ufa qiqanuasa faqa sia asooqa qeefaranoo, fukasaa kuqifaranoo.
Misa miqifaqa qinee ani kai saqarikinaura.
Currently Selected:
Idi Ufa 55: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
