Idi Ufa 25
25
Rakisinnimaqaranara faqa itita nimaqaranara faqa innaaru qirufa.
1Oo Yaawee qeeqa innaaru qirana ani amidaqa.
2Oo qini Anutu, qinee ani saqarikidaqa.
Namuqaa darifaqa qisauruanoora anee mi dariranasaa ititaqisaa.
Anee dadaaqinaqa qini namuqaa sia qiniara ataasa ataasa qiaqa.
3Ani saqariki mariasa namuqaa rafaaqafu nimaqarafa sia maridanoo.
Qusufa qimasee ani Yaaweenara kaukaata qimariasa namuqaa misa rafaaqafu nimaqaidaqa.
4Oo Yaawee anee fimarianna aanna qini uqaqifiqaina fua.
Anee fimarianna aannara qini daamuaqinaqa iria.
5Anee qini Anutufa qini asumu maree marianafa
mariannanara ani anoona ufa mau firana daakapa.
Qinee aiqama kari ani saqarikidaqa.
6Oo Yaawee aneenna qimudaoo qirana faqa aneenna
naaru marira amuqusirana quqannifiqoonnanara oonu mafi iria.
7Qinee kumaaraasaa auqaafanna aaqarana akiiqara minniqisaa.
Oo Yaawee, aneenna naaru marira amuqusiranannoo
faqa aneenna amiqi amiqirannoo faqa qiniara oonu mafi iriqisaa.
8Yaaweefa andeeqara marirana faqaafa marinara aaqee mariasa andeeqara aanara naamua qidanoo.
9Nári nifaaqa mara maree qumi mariasa Yaaweefa andeeqara aatata nifiqee fidanoo, narí aidiranara qimannimidanoo.
10Mina moodaanaki kira ufa faqa mina sandufa faqa afaqee mariasa Yaaweefa narí mapukusee marira
oosanannoo faqa narí amuqusiranannoo faqa nifiqee fidanoo.
11Oo Yaawee, aneenna qima afeekai kiranara oonumafi irisee qini moomoo aaqarana akiiqara minniqisaa.
12Yaaweenara naaquqee marisa mifa amiqira aanara qimannimiannoo.
Qima niminaqa mi mau fifaranoo.
13Misa aiqama ainaina amanaikiranaki amiqiranaki marifaranoo.
Misa faiqi namu maqa maaqa mareefaranoo.
14Yaaweefa mina ufa qaindusi mariasa niqoondi maridanoo.
Mifa narí moodaanaki kira ufa qimaqoona kafaa qimannimidanoo.
15Qinee aiqama kari dadaaqianifeera Yaaweefinnai qifu maqaidaqa.
Miqi marunanoo mifa qini manda ainainakinaana itita qisee marifa maridanoo.
16Qinee qeeqaraa marida ummooquki marunnanara Yaawee anee qinnee unnannai quandafi qiniara qimudaoo qia.
17Qini qimuqusakina oosana oosana ummaarauqa maraqu qisasee qini oosana oosana ummaarakinaana mara kaqinni quqaqisaa.
18Oo Yaawee, qini aiqama aaqarana akiiqara minni qiseenana aupurarana faqa fitinnarana faqa dadaaqia.
19Oo Yaawee anee qafaa qini namuqaa moomoo uqanna maridaqa.
Misa firaaqoo uqanna qiniara fidiaqaa idaqa.
20Qini titaqisaidana qini marirana mara afeedamma qisaa.
Anee itita qimaqaanneera qinee anee iannannai anidaqa.
Namuqaa qini rafaaqafu qimaqee marianasaa itita qisaa.
21Qinee ani mandaaqee marunnanara qini andeeqarafa
faqa anoona qiramau firafa faqa qini rakisiqimaqaani.
22Oo Anutu, Isaraee maqannaa aneenna faiqí anaasee
nariqa oosana oosana ummaara kinaana mara kaqinni quqannisaa.
Currently Selected:
Idi Ufa 25: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
