Lobh 25

Pɔlʋ nyɩtɛ ɔla da goonvla Fɛsɩtusu ‑deliin

1Na, goonvla Fɛsɩtusu li 'lɛ clɩɩ ‑mɔta ɔla ‑kwlekpoa 'kʋ na, ɔ ya 'dua ma la 'lɛ Sezalee na 'kʋ 'wlʋ 'nyɩ ɔ ya Zolizalɛmʋ ‑gblaa. 2‑Teyiyinyaa tocɩa ɩya Zifʋnyaa* tocɩa ya 'kʋbho, ma yɔɔ 'bhlɩ mʋ le ma 'kaa Pɔlʋ tʋ kulu. Ma ya goonvlaa cɩ zɩzlalɩ 3'nyɩ ma yɔɔ 'clalɩ le ɔ gba ɩya ma ‑lamʋ Pɔlʋ Zolizalɛmʋ. Ma yaa wɔlɩ gʋa le ma 'kaa 'mɔɔ ‑gugwiea 'kʋ 'bhlalɩ. 4‑Ma Fɛsɩtusu ya maa 'cla lebhe Sezaleedua 'la ‑palʋʋnpapalʋa ‑zɔn Pɔlʋ cɩ 'ka 'lɛ kʋ. ‑Awlɛ, ka ɔmɔ 'titi cɩ 'ka 'lɛ ‑clɩɩ -klipɛ nɩkplaan cɔlɔ. 5Na, ɔ ya maa 'cla lebhe: «Ka ɩ ‑ka ‑kʋ lebhe nclɔɔ ‑naa ya wɔɔnyinyi nʋ na, 'naa a 'bhlɩtocɩa gɩlɩɩn ‑a ka Sezalee kwli ɩya ma 'kɔɔ 'yɛpɩ tʋ kulu.»

6Clɩɩ ‑ngbata ‑aana 'kʋgba ‑tɛɛ Fɛsɩtusu li 'lɛ maa cɩ. Ɔ kwli 'lɛ Sezalee 'nyɩ ‑zeli ze 'lɛ na, ɔ ya 'tɩtɩpladaa sakʋkan mʋ. 'Nyɩ ɔ ya gba ma ya Pɔlʋ ‑lamʋ. 7Daa ma ‑lamʋɔ 'lɛ na, Zifʋnyaa ‑ɔ 'wlʋlʋa 'lɛ Zolizalɛmʋ na yɔɔ didio 'nyɩ ma yɔɔ wɔɔnyinyi ‑bhutukpa 'kʋ gɩ. ‑Ma ma mino 'taa ɩya ma 'kaa 'mɩɩ ‑zɔn ‑sa. 8Pɔlʋ ya ɔla da nyɩtɛ 'nyɩ ɔ yaa 'cla lebhe: «N 'ta ka wɔɔnyinyi ‑ylɛylɛ nʋ, n 'ta ka Zifʋnyaa 'la ‑jlɩmaa, Laagɔpaakadiea* ‑aana 'bhlɩa 'la ‑kwletoa gbatlɩmʋnʋ.» 9Fɛsɩtusu ‑waa 'lɛ lebhe ɔ 'kaa Zifʋnyaa 'la pɔlɛkʋmɛnɔmɛnɔgbɩ nʋ na, ɔ ya Pɔlʋ neencla lebhe: «‑N ‑wa lebhe ‑n cɩ Zolizalɛmʋ ‑gblaa ɩya n 'kɔɔ 'yɛpɩ 'tɩtɩplalɩ bha?» 10Pɔlʋ ya 'cla lebhe: «'Tɩtɩplajlee ‑naa ‑kʋ Sezalɩ 'la ‑kwleliea ‑zɔn. Na, ‑da ɩ ‑fata 'lɛ lebhe ma ‑plalɩɩn 'tɩtɩ. ‑Mɔɔ 'titi ‑n ci sɛɛ lebhe n 'ta ka Zifʋnyaa wɔɔnyinyi ‑ylɛylɛ cɩ nʋ. 11Ɩ ‑ka ‑kʋ lebhe ‑zaagbʋsa, n ‑glɩ wɔlɩa ma nyɩtɛ 'lɛ na 'la nʋnyɔ, ɩ ‑ka ‑kʋ le n ya wɔɔnyiyia ‑tɛtɛa ‑ɩ ya 'kwɩ ‑fata 'lɛ na nʋ na, n ŋonu lebhe n cɩ ɩla gbʋ 'ku. ‑Ma wɔlɩa ‑tɛtɛa ma nyɩtɛ 'lɛ 'na gbʋ 'nyɩ ‑nʋawlɛ 'tɩɩ nɩkplaan ‑kʋ na, nclɔɔ bhlogbɩɩ 'ta ‑jioli ‑ka ɩya ɔ 'kaan maa 'nyɩnɩ le ma ‑saan gbaylɩ. ‑Anɩ ‑naa 'la gbʋ na, n ‑wa lebhe n cɩ Sezalɩ ‑deliin mʋ ɩya ɔ 'ka 'na 'tɩtɩa ‑pla.» 12Na, Fɛsɩtusu ɩya ɔla dɩgalɩnyɩnyaa ya neennununu 'nyɩ ɔ ya 'cla lebhe: «‑N ‑wa lebhe ‑n cɩ Sezalɩ ‑deliin mʋ: N cɩ ka Sezalɩ ‑deliin mʋ.»

Pɔlʋ ‑kʋ nyɩbhɛlʋ Aglipaa ‑deliin

13Na, clɩɩ ‑zlʋsaasa 'plɩ 'lɛ na, nyɩbhɛlʋ Aglipaa ɩya ɔ mɛnɔ Belenisi ya Sezaleedua 'kʋ ci 'nyɩ ma ya goonvla Fɛsɩtusu kope mʋ. 14Ma ya 'yɛpɩ clɩɩ ‑zlʋsaasa li, 'nyɩ Fɛsɩtusu ya nyɩbhɛlʋa Pɔlʋ 'la cɩa wɔlɩ solu. Ɔ yɔɔ 'cla lebhe: «Nclɔɔ bhlo ‑kʋ ‑da, Felisi yɔɔ ‑palʋʋnpapalʋ ‑zɔn te. 15Daa n mʋa 'lɛ Zolizalɛmʋ na, ‑teyiyinyaa tocɩa ɩya Zifʋnyaa* 'la ncaakpasɩa yaan 'bhlɩ ci, ma yɔɔ tʋ kulu 'nyɩ ma yaan 'clalɩ le n ‑saa 'mɔɔ gbaylɩ. 16‑Ma n ya maa neenŋonu lebhe nclɔɔa ma ya 'lɛ wɔlɩ 'kʋ gɩ na, ma 'ta 'ka ɔya ɔla wɔlɩkʋgɩnyaa saazʋ ɩya ma 'kɔɔ ‑jioli 'nyɩ le ɔ nyɩtɛ ɔla da na, ɩ 'ta Wlɔmʋnya 'la nʋnʋgbɩ ‑glɩ le ma ‑sɔɔ gbaylɩ. 17Na, dɛ ma 'cɩlɩ 'lɛ ‑wɔlʋ 'wlu. 'Nyɩ n 'ta clɩɩ zʋ, ‑ma daa ‑zeli ze 'lɛ na, n ya 'tɩtɩplajlea nɩkplaan ci, n ya sakʋ, 'nyɩ n ya 'lɛ 'cla lebhe ma ‑lamʋ nclɔɔa. 18‑Ma daa ɔla wɔlɩkʋgɩnyaa 'wlalɩ 'lɛ 'wlu na, ma 'ta gbawɔlɩa 'titia n cɩa 'lɛ gugu lebhe ɔ yaa nʋ na, ‑ylɛylɛ nyɩtɛ. 19Wɔlɩa ‑tɛɛa ma ‑yɔɔsɔ 'tɩtɔ 'lɛ na, ɩ ‑glɩ maa 'titi mala gʋgwlɛa 'la wɔlɩ, ɩya nclɔɔ bhlo ma lɔɔ Zozii, ɔla wɔlɩ. Nclɔɔ ‑naa ya 'ku, ‑ma Pɔlʋ nabhe ɔ ‑ja, ɔ ‑kʋ ka ‑azla. 20Na, n 'lɩ 'ta 'lɛ saa 'titia n 'ka 'lɛ ‑sa 'la wɔlɩa klaklalɩ na, dɛ n 'cla 'lɛ Pɔlʋ le ɔ ‑ka wa na, ɔ mʋ Zolizalɛmʋ ɩya ma 'ka 'yɛpɩ ɔla 'tɩtɩa ‑plalɩ. 21‑Ma, ɔ 'ta ŋonu, ɔ ya 'clalɩ le Wlɔmʋ 'la ‑kwletoa 'titi ‑pla ɔla 'tɩtɩa. Na, n ya 'cla lebhe ma zʋɔ ‑palʋa ‑zɔn ‑aan ɩya clɩɩa 'kʋa ma cɩ 'kɔɔ 'lɛ ‑kwletoa ‑deliin fa na, ɩ 'ka ŋeni.» 22Aglipaa ya Fɛsɩtusu 'cla lebhe: «‑Amʋ ‑masɛ, n ‑wa lebhe n cɩ nclɔɔ ‑naa neen 'nu.» Fɛsɩtusu yɔɔ 'cla lebhe: «‑Cɩpa, ‑n cɩ ‑kɔɔ neen 'nu.»

23Na, ‑zeli ze 'lɛ na, Aglipaa ɩya ɔ mɛnɔ Belenisi ya ci. Ma bhɔsʋa 'nanɩ, 'nyɩ maya 'sojaa tocɩ ɩya 'dua tocɩa ‑ɔ gɩlɩa 'lɛ maa na, ya 'tɩtɩpladaa ble. Fɛsɩtusu ya gba, ma ya Pɔlʋ ‑lamʋ. 24Ɔ ya wɔɔnyɩtʋ 'ma 'nyɩ ɔ ya 'cla lebhe: «Nyɩbhɛlʋ Aglipaa, ɩya anyɩa 'fɩan ‑ɔya ‑anyɩsɔ ‑kʋ 'lɛ da na, a ‑jlɛ nclɔɔ ‑naa. Ɔla gbʋ, Zifʋnyaa ‑tɛtɛa ya Zolizalɛmʋ ci, ma yaan ŋeni, 'nyɩ ma ya ‑awlɛɛn 'lɛ ‑wɔlʋ gɩlɩ. Ma ‑gaa nɩkplaan 'nyɩ ma cla 'lɛ lebhe ɩ 'tanɩ ‑fata lebhe nclɔɔ ‑naa kʋ ‑awlɛ ‑laagɔzɔn. 25‑Ma ‑amʋ, n 'ta ɔla nʋnʋgbɩa nɩkplaan wɔlɩ bhlogbɩɩ, ‑ɩya 'kwɩ ‑fata 'lɛ na, 'lɩlɩ. ‑Masa, ɔmɔ 'titi ya 'lɛ 'clalɩ le ɔ cɩ ‑kwletoa ‑deliin mʋ na, dɛ n 'cla 'lɛ lebhe n cɩɔ mɔ ‑deliin fa. 26'Bhlɩmɔɔn, n 'lɩ 'ta wɔlɩa 'titia n cɩ 'ka 'lɛ ‑kwletoa zie ɔla 'sasʋʋn na, ɩla gbʋ dɛ n gba 'lɛ 'nyɩ ma yɔɔ 'lɛ anyɩ ‑deliin ‑la, ka n nabhe n 'ka 'lɛ 'cla le ‑mɔ, nyɩbhɛlʋ Aglipaa ‑deliin ɩya n ‑kɔɔ neen 'nu na, n 'ka sɛnɩ mino ɩya n 'ka ‑kwletoa ziesa cibhlili. 27Sa, n gugu lebhe ma ‑ka ‑palʋʋnpapanyɔ ‑kwletoa ‑deliin fa, 'nyɩ ma 'tɔɔ wɔlɩa 'titia ma gɩɔ 'lɛ 'kʋ na, ‑zɔn ‑sa na, ɩ 'ta 'ciingɩlɩɔ.»

Currently Selected:

Lobh 25: NTLD13

Highlight

Copy