Lobh 24

Tɛtulusu gɩ Pɔlʋ wɔlɩ 'kʋ

1Daa ma fa 'lɛ Pɔlʋ Sezaleedua 'kʋ, 'nyɩ clɩɩ ‑ngbi 'cɩlɩ 'lɛ 'kʋ na, ‑Teyiyinyɔ ‑kpasaa ma laa 'lɛ Ananɩasɩ na ya 'yɛpɩ mʋ, ɔya ncaakpasɩ ‑zlʋsaasa ɩya ncɛlɩ 'la danyɩtɛnyɔ bhlo, ma laa 'lɛ Tɛtulusu na. Ma ya Pɔlʋ goonvlaa 'bhlɩ tʋ kulu. 2Goonvlaa ya gba, ma ya Pɔlʋ la. Na, Tɛtulusu ya wɔɔnyɩtʋ 'ma Felisi deliin 'nyɩ ɔ yɔɔ 'cla lebhe: «‑A to Felisi, ‑mɔ ‑bɔɔ ‑ɔ gba 'lɛ 'nyɩ ‑anyɩa ‑tɛtɛa ‑kʋ 'lɛ pupueen bhlɩɩ ‑naa 'kʋ, wɔɔlelia n 'ma 'lɛ dɩgalɩ, ‑n zʋ 'lɛ kpo 'kʋ 'nyɩ ‑n 'nyɩ 'lɛ 'lɔlʋa na, ɩla gbʋ. 3‑A to Felisi, clɩɩa 'fɩan ɩya daa ‑tɛtɛa ‑a cibhlili ‑naa 'nanɩnʋlɩɛa, 'nyɩ ‑a bhɔlʋɔ ‑gbɔɔn ɩla gbʋ. 4‑Ma n 'la kɔɔ 'lɛ ‑bʋalɩ na, n cɩ 'ta 'na wɔɔnyɩtʋa nɩkplaan tlʋbhalɩ. N bhibhieo le ‑n falɩ ɩmɩa n cɩ 'ka 'lɛ 'kʋbhli na pɔlɛ cɩ, ‑naa dananɔa ‑anyɩa 'fɩan ‑a ‑ci 'lɛ na 'la gbʋ. 5‑A ya 'lɩ lebhe nclɔɔ ‑naa ‑glɩ 'lɛ gunyunyua ‑ʋ bhla 'lɛ ‑anyɩ na. Ɔmɔ ‑ɔ kokolu 'lɛ ‑laagɔzɔan 'la Zifʋnyaa* ‑tɛtɛa 'wlu, 'nyɩ ɔ ‑glɩ 'lɛ Nazalɛtɩnyaa 'la ‑kandea 'la 'kʋklʋʋnpʋnyɔ. 6Ɔ ya 'matɩ lebhe ɔ 'ka Laagɔpaakadiea* 'dʋʋn ‑sa, 'nyɩ ‑a yɔɔ 'lɛ 'nylugolu. [#24.6 ‑Godogodofluwia ‑anɩ ya wɔɔkle ‑naa Zieziewɔlɩa nɩkplaan ‑pla: «‑A yaa wabha lebhe ‑a kaa ‑ala ‑jlɩmaa 'kʋ 'plɩlɩ ɩya ‑a kɔɔ 'tɩtɩpla,» 7]#24.7 ‑Godogodofluwia ‑anɩ ya wɔɔkle ‑naa Zieziewɔlɩa nɩkplaan ‑pla: «‑Ma 'soja 'la ‑kwletoa ma la 'lɛ Lizɩasɩ na, ya ‑bluu, ɔ ya wɔlɩa nikplaan slo, 'nyɩ ɔ yɔɔ 'lɛ ‑anyɩ wlɩɩn ‑sa 'tɛtɩ nɩkplaan.» 8‑Mɔɔ 'titi, n ‑kɔɔ neencla na, n cɩ 'ka 'lɩ lebhe wɔlɩa 'fɩan ‑a gɩɔ 'lɛ 'kʋ na ‑glɩ ‑nʋawlɛ.» 9Na, Zifʋnyaa ya wɔlɩ ‑naa kɔɔn zʋ 'nyɩ ma yaa 'cla lebhe ɩ ‑glɩa ‑nʋawlɛ.

Pɔlʋ nyɩtɛ ɔla da

10Na, goonvlaa ya sɔ 'kubho, ɔ ya Pɔlʋ ‑jioli 'nyɩ le ɔ nyɩtɛ ɔla da. Na, Pɔlʋ ya ne ‑sa 'nyɩ ɔ ya 'cla lebhe: «‑A to, n ‑ci sɛɛ lebhe ‑n 'ta ‑yaka ‑n 'ta 'lɛ bhlɩ ‑naa 'kʋ 'tɩtɩ‑plalɩɛ bhɔ. Na, ‑naa ‑delikʋtɛlɔ nɩkplaan, n cɩ 'ka 'lɛ 'na da nyɩtɛ. 11Daa ‑n ‑kaa 'lɛ Zolizalɛmʋdua 'kʋ gʋgwlakan mʋ na, ɩ 'ta ka clɩɩ 'kʋgba ‑mɔsɔ cɩplɩ. ‑N cɩ mino 'nyɩ ‑n cɩ wɔlɩa n nyɩtɛ 'lɛ na ‑zɔn bi. 12'Nyɩ Laagɔpaakadiea* ‑zɔn, bhibhiepalɩa* ‑zɔn ‑aana 'dua nɩkplaan 'titio, nclɔɔ bhlogbɩɩ 'ta ka ‑azlaan 'lɩ ɩya n ‑ya nclɔɔ 'ka wɔlɩ 'tɩtɔ ‑aana n ya ‑alawlee gbɩ zʋ le a ‑bho acɩ 'kʋ. 13Na, ncɛlɩ ‑naa cɩ 'ta mino ɩya ma 'ka pala lebhe wɔlɩa ma gɩɩn 'lɛ ‑da 'kʋ na, ɩ ‑glɩ ‑nʋawlɛ. 14'Lɩka wɔlɩa n cibhlili 'lɛ lebhe n ya nʋ na. ‑A tokadɔcɩ 'la Laagɔa ɔmɔ n lobho 'lɛ, ‑gugwiea, ma cla 'lɛ le ɛ ‑glɩ ‑kande na, ɛmɛ n bhli 'lɛ. N la ‑tɛtɛa 'fɩan ‑ɩ ‑zieo 'lɛ ‑jlɩmaa ɩya Laagɔnekʋnyɩtɛnyaa* 'la ‑afluwia nɩkplaan na ‑nʋawlɛ.

15Maa 'bhisa, n 'tɛlɩ Laagɔ pɔlɛ 'kʋ lebhe ɔ cɩ gba 'nyɩ 'kʋnylugolunya ɩya maa ‑ɔ 'taa 'lɛ 'kʋnylugolunya ‑glɩ na cɩ clɩɩ bhlo 'kwɩɩnkʋbho. 16Na, ɩmɩ ‑naa 'la gbʋ na, dɛ ‑amʋ ‑masɛ, clɩɩa ‑tɛtɛa n 'sɩslɩlɩ 'lɛ le 'na nʋnʋgbɩa 'ka ‑kplɔ Laagɔ ɩya ncɛlɩ 'ci 'kʋ. 17N ‑kawa 'lɛ Zolizalɛmʋ 'wlʋ na, ɩ ya ‑gwlɛlɩ. Na, ka n cɔlɔa 'lɛ le n 'kaa 'na 'lɔlʋa ɩya Laagɔ lɩɩ va. 18Ɩmɩ ‑naa ma 'lɩɩn 'lɛ nʋda Laagɔpaakadiea ‑zɔn, 'na 'zɩcɩsaclɩɩa* 'kʋ. Ncɛlɩa 'taa 'dɛ 'wluwlalɩ, 'nyɩ 'kasɛ gba 'taa. 19Aziibhlɩa 'kʋ 'la Zifʋnya* ‑zlʋsaasa ‑tɛɛ ‑kʋa 'lɛ 'dɛ. Maa ‑naa ‑ɔ cɩ 'kaa ‑mɔɔ 'lɛ ‑deliin ci ɩya ma 'ka ‑amʋa wɔlɩ 'kʋ gɩ, ɩ ‑kaa ‑kʋa lebhe ma ‑kaa wɔlɩa ma cɩ ‑kaa ‑amʋa 'lɛ 'kʋ gɩ na 'lɩ na! 20‑Aana, maa ‑naa ‑ɔ ‑kʋ 'lɛ da na, 'naa ma 'bhli 'kʋ ɩya ma soluun wɔɔnyinyia ma 'lɩlɩɩn 'lɛ nɩkplaan, daa ma faan 'lɛ 'tɩtɩplakandea ‑deliin na. 21Wɔɔkle ‑naa, n 'nylugo 'lɛ maa sidiin, n nyɩtɛ 'lɛ 'nyɩ n 'cla 'lɛ lebhe: 'Kwɩɩnkʋbhue 'la gbʋ ma zʋʋn 'lɛ ‑yaka 'tɩtɩ anyɩ ‑deliin na, ala gbʋ bha?»

22‑Ma Felisi, ‑cia 'lɛ ‑gugwiea ɔ sa 'lɛ na, 'la cɩa wɔlɩa 'nanɩ na, ɔ ya 'tɩtɩaplaclɩɩa 'kʋklʋʋn fa 'nyɩ ɔ ya maa 'cla lebhe: «Clɩɩ 'kʋ Liziasɩ, 'sojaa 'la to 'kadiea ‑ka ‑wɔlʋ ci na, 'nyɩ n cɩ ala 'tɩtɩa ‑pla.» 23Na, ɔ ya 'sojaa 'la ‑gwlɩɩngbito 'cla le ɔ 'pa Pɔlʋ ‑palʋʋnpapalʋa ‑zɔn. ‑Ma ɔ 'la zʋɔ ‑abhluakɩ nɩkplaan ɩya ɔ te ɔla ncɛlɩ ne ma 'kɔɔ kopekan ci.

Pɔlʋ ‑kʋ ‑palʋʋnpapalʋ ‑zɔn

24Daa clɩɩ ‑zlʋsaasa 'plɩ 'lɛ na, Felisi ‑ya ɔ nʋŋlɔ Dlusili, -ɔ ‑glɩa 'lɛ Zifʋŋlɔ na ya ci. Ɔ ya gba ma ya Pɔlʋ ‑lamʋ. Ɔ yɔɔ 'nyukwliinpo, 'nyɩ ɔ ya ɔla pɔɔtɛtɛa ɔ ‑zʋɔ 'lɛ Zozi Klisi 'kʋ na 'la wɔlɩ nyɩtɛ. 25‑Ma, saa Pɔlʋ nyɩtɛa ɩmɩa ɩ ‑fata 'lɛ lebhe nclɔɔ nʋ, saa ɩ ‑fata 'lɛ lebhe ɔ klaklalɩ ɔcɩ ɩya saa Laagɔ cɩ 'ka 'lɛ ncɛlɩa 'fɩan 'tɩtɩplaplalɩ na, la cɩa wɔlɩ na, ŋanɔ yaa Felisi pla 'nyɩ ɔ ya Pɔlʋ 'cla lebhe: «'Maa mʋka leen. ‑Ma ‑buun clɩɩ ‑kʋ 'nyɩ n cɩ ‑awlɛɔ la.» 26'Bhlɩmɔɔn, -n 'ta Pɔlʋ 'la 'nyukwliinpolɩɛ bhlobhlo 'la gbʋʋ ɔ nʋ 'ta 'lɛ sɛɛ gba. ‑Ma ɔ gugua lebhe Pɔlʋ cɩ 'kaa 'mɔɔ 'dala 'nyɩ ɩya ɔ 'kaa 'mɔɔ 'cintalɩ. ‑Anɩ ‑naa 'la gbʋ na, ɔ laa 'mɔɔ klɛɛklɛɛ le ɔ ci ɩya ma 'kaa 'dɩ zʋ. 27Na, liowli ‑mɔsɔ 'plɩ 'lɛ na, nclɔɔa ma laa Pɔsɩyusʋ Fɛsɩtusu na, ɔ ya Felisi 'la 'jeen 'plɩ. ‑Ma ɔ ‑waa 'lɛ lebhe ɔ 'kaa Zifʋnyaa* 'tʋpla na, ɔ ya Pɔlʋ ‑palʋʋnpapalʋa ‑zɔn te.

Currently Selected:

Lobh 24: NTLD13

Highlight

Copy