Lobh 26

Pɔlʋ ‑kʋ Aglipaa ‑deliin 'nyɩ ɔ nyɩtɛ ɔla da

1Aglipaa ya Pɔlʋ 'cla lebhe: «‑N nyɩɔ ‑jioli le ‑n nyɩtɛ ‑naa da.» Pɔlʋ ya sɔ 'kʋ 'bhli, ɔ ya ɔla da nyɩtɛlɩɛ bhɔ 'nyɩ ɔ ya 'cla lebhe: 2«Nyɩbhɛlʋ Aglipaa, ɩ mɛnɩɩn pɔlɛ 'kʋ ‑gbɔɔn le saa n ‑kʋɔ 'lɛ ‑sa ‑yaka ‑deliin le n 'ka 'na da nyɩtɛ ɩya n 'ka wɔlɩa ‑tɛtɛa Zifʋnyaa* gɩɩn 'lɛ 'kʋ na, n 'kɩɩ ncɩ 'wlusa. 3Sa ‑mɔ 'titi ‑n ‑ci Zifʋnyaa 'la nʋnʋgbɩa ‑tɛtɛa ɩya mala wɔlɩa ‑tɛtɛa ma ‑wa 'lɛ 'tɩtɔlɩɛ na. Na, n bhibhieo ‑gbɔɔn le ‑n kla pɔlɛ ɩya ‑n poon 'nyukwliin.

4N ‑glɩ 'kaa 'lɛ nyɩgbɩɔ na, 'na saa n namʋnamʋa 'lɛ n 'bhlɩnyaa sidiin 'yɛpɩ Zolizalɛmʋdua nɩkplaan 'titi na, Zifʋnyaa 'fɩan ‑cii. 5N ya ‑anyɩ, ‑ala gʋgwlalɩɛ 'la ‑jlɩmaa ylɛɛylɛɛ 'kʋplɩlɩ, sa ‑amʋ, n ‑kʋmʋa Falizɩɛnnyaa* 'la ‑kandea nɩkplaan na. 'Nyɩ Zifʋnyaa ‑kaa ‑nʋawlɛɛnyɩtɛnya ‑glɩ na, ma cɩa 'mɩɩ ŋonu. Sa ma ‑cia ‑amʋa tooto na. 6Na, ma ‑kaan ‑yaka 'tɩtɩ zʋ na, ‑ndanyɩa Laagɔ ta 'lɛ ‑a tokadɔcɩa na, ɩla pɔlɛkʋtɛlɔa 'la gbʋ ma zʋʋn 'lɛ 'tɩtɩ. 7‑Ala 'lɔkpʋcia 'kʋgba ‑mɔsɔa ‑ɩ lobho 'lɛ clɩɩa 'fɩan Laagɔ, zezezeliin ɩya bhlibhliylʋʋn na, 'tɛlɩ pɔlɛ 'kʋ lebhe ɩ cɩ 'ka ‑ndanyɩa 'lɩ ɩya ɩ 'ka 'kʋglalɩ. Nyɩbhɛlʋ Aglipaa, pɔlɛkʋtɛlɔ ‑naa 'la gbʋ, Zifʋnyaa gɩɩn 'lɛ wɔlɩ 'kʋ. 8'Lɩsaa 'la gbʋ anyɩ sidiin, ɩ slaa 'lɛ ncɛlɩ ‑anʋa nikpoo, 'nyɩ maa la 'taa 'lɛ ‑nʋawlɛ lebhe Laagɔ bho 'ku 'kwɩɩn 'kʋ bha?

9Na, ‑amʋ Pɔlʋ 'titi, n ya gugu lebhe ‑zaagbʋsa n cɩa saa 'fɩan nʋ 'nyɩ n cɩ ncɛlɩa ‑ɔ sla 'lɛ Nazalɛtɩnyɔ Zozii 'la 'ŋlɩa 'ŋlɩ na, gbatlɩmʋnʋ. 10'Nyɩ ɩmɩ ‑naa, n yɩɩ Zolizalɛmʋdua nɩkplaan nʋnʋ. N ya ‑jiolia ‑teyiyinyaa tocɩa 'nyɩa ‑amʋa 'lɛ na 'kʋ 'manɩ 'nyɩ n ya pɔɔtɛtɩkalɩnya ‑bhutukpa ‑palʋʋn 'pa. 'Nyɩ n ‑ya maa -ɔ zʋa 'lɛ mala 'bhlawɔlɩa kpo 'kʋ na ‑plɔa 'lɛ. 11N bia bhibhiepalɩa 'kʋ, n zʋlʋzʋlʋlʋa mala gbaylɩsalɩɛ 'kʋ, le ɩ 'ka gba ɩya ma 'kaa Laagɔ vla, 'nyɩ 'na dɔgbɛ 'kadiea nɩkplaan, n 'tlia 'lɛ maa ‑aan lowlubhlɩ 'kʋ 'la 'dia nɩkplaan.

12Ɩmɩ ‑naa nɩkplaan ‑teyiyinyaa tocɩa 'nyɩnɩɩn 'lɛ ‑jioli 'nyɩ ma yaan 'lɛ 'dua ma la 'lɛ Damasɩ na 'kʋ lobhu. 13Na, n ‑kʋa ‑gugwie 'kʋ, 'na ‑kwleto. Daa 'ylʋa slo 'lɛ dɩdɩ na, n ya zezezeli 'lɩ. Ɩ 'wlʋlʋa ‑laagɔa nɩkplaan. Ɩla 'jɩa ‑kaa 'tɛtɩ, ɩ zia 'ylʋbhoa 'nɩa 'kʋ 'nyɩ ɩ yaan didio. 'Na ncɛlɩa, n ‑ya maasɔ bhlia 'lɛ ‑gugwiea na ‑masɛ. 14‑Anyɩa 'fɩan ya ‑dʋdʋ 'kʋ bhlili. 'Nyɩ n ya ‑blɩɩzɔn bhlo 'nu ‑aghlameyɛɛnwɔlɩ nɩkplaan. ‑Blɩɩzɔn ‑naa cla ‑amʋa lebhe: Sɔlʋ, Sɔlʋ, 'lɩsaa 'la gbʋ ‑n saan 'lɛ gbaylɩ bha? Lʋʋa ‑naa 'tɛtɩa cɩ 'ta 'lɛ mino na, ‑naa mʋnɩʋ gbatlɩ. 15‑Ma, n yʋʋ neencla lebhe: ‑Kwlenyɔ, ncaasaa ‑n ‑glɩa 'lɛ bha? ‑Kwlenyɔa yaan neenŋonu lebhe: ‑Amʋ Zozii ‑kʋ 'lɛ, ‑amʋ ‑n sa 'lɛ gbaylɩ. 16‑Ma, bho 'kʋ ɩya ‑n 'nylugolu ‑naa kplia 'kʋ! Ɩmɩa 'la gbʋa n futoluo 'lɛ na, n cɩ 'kɔɔ mɩ solu: Ɩmɩ ‑glɩ 'lɛ le n yɔɔ desla le ‑n ka 'na lobhoco 'plɩ. Ɩya n 'ka ɩmɩa n 'lɩ 'lɛ ɩya wɔlɩa n cɩ 'ka 'lɛ gba ɩya ɩ 'ka ‑awlɛɔ 'lɛ 'ciinfutolu na, 'la ‑danʋfʋɛ li. 17Na, n yɔɔ tooto Zifʋnya ɩya maa ‑ɔ 'ta 'lɛ Zifʋnya ‑glɩ 'la gbazɔ 'klʋlɩ. ‑Awlɛ n lobhuo maa 'bhlɩ 18le n ka mala 'cia 'gbo kalɩ. N ka maa 'tutua nɩkplaan ‑sa ɩya ma 'ka zezezelia nɩkplaan ble. N ka maa Sataan* 'la ‑kwleliea ‑zɔnsa le ma 'ka Laagɔ 'klʋtla ɩya mala pɔɔtɛtɛa ma cɩ 'kaan 'lɛ 'kʋ zʋ 'la gbʋ, n 'ka mala nyinyia va ɩya ma 'kanɩ 'naanʋa 'plɩ.

19Na, ‑kwleto Aglipaa, n 'ta wɔlɩa ‑ɩ 'wlʋlʋ 'lɛ ‑laagɔɔn 'nyɩ ‑ɩ futoluun 'lɛ 'ciin na, 'bɩsalɩɛ mino ‑ylɛylɛ. 20‑Ma, n ya maa solu lebhe ɩ ‑fata lebhe ma kacinɩ, ma ‑tlanɩ Laagɔ 'klʋ ɩya ma nʋnɩ nʋnʋgbɩ 'nanɩa ɩ 'ka 'lɛ pala lebhe ‑zaagbʋsa ma ya kwlacala na. N ya wɔlɩ ‑naa ‑bɛɛ Damasɩ ɩya Zolizalɛmʋdua 'kʋ 'la ncɛlɩa solu. Ɩla leen, n yɩɩ 'lɛ Zudeebhlɩa 'kʋ ‑tɛtɛa ɩya ‑buun bhlɩ 'kʋ 'la ncɛlɩa 'dɩkʋsalɩ. 21Na, 'lɩka ‑anɩ ‑naa 'la gbʋ na, dɛ Zifʋnyaa bhlili 'lɛ Laagɔpaakadiea* ‑zɔn 'kʋ le ma 'kaan 'bhla. 22‑Ma, Laagɔ 'la sɔa ‑kʋkaan 'lɛ 'kʋ ‑aan ‑yaka na, dɛ n likaka 'lɛ ɔla ‑danʋfʋɛ ncaakadɩ ɩya ‑da -naanʋaa 'fɩan ‑deliin. Laagɔnekʋnyɩtɛnya* ɩya Moyizi yaa ɩmɩa ɩ cɩ 'kaa 'lɛ ci na tooto nyɩtɛ. Na, n 'ta ‑amʋ ‑ɔ cɩ 'tanɩɩ 'lɛ 'kʋzʋlʋ: 23Ma yaa 'cla lebhe 'kwlɩ cɩ 'kaa Laagɔ 'la ‑Sasanyɔa* bhɩa. Ɔmɔ cɩ 'kaa 'lɛ ‑bɛka nclɔɔa ‑ɔ ‑bho 'lɛ 'ku sidiin 'kwɩɩn 'kʋ na 'plɩ. Ɔ cɩ 'ka Izlayɛlɩlɔlʋa* ɩya ‑buun bhlɩa 'kʋ 'la ncɛlɩa gbʋʋnsalɩɛa 'la zezezelia 'dɩkʋsalɩ.»

24Pɔlʋ ‑kʋ kaa ‑sa ɔla nyɩtɛda, daa Fɛsɩtusu 'ma 'lɛ wɔɔnyɩtʋ, ɔ nyɩtɛlɩ 'lɛ nikadieen 'nyɩ ɔ 'cla 'lɛ lebhe: Pɔlʋ, ka pɔlɛ bhlɔɔ bha? Ka ‑afluwa 'kadiea ‑n ‑ci 'lɛ na, ‑lalɩɔ 'lɛ pɔlɛ 'kʋ bha? 25‑Ma Pɔlʋ yɔɔ 'cla lebhe: «‑A to Fɛsɩtusu, ‑n 'ta pɔlɛ 'bhla 'taan 'lɛ. ‑Ma, wɔlɩa ‑ɩ ‑glɩ 'lɛ ‑nʋawlɛ 'nyɩ ɩ gɩlɩɔ 'lɛ 'ciin na, ɩmɩ n nyɩtɛ 'lɛ. 26Nyɩbhɛlʋa 'titia n solu 'lɛ na, n ‑ci sɛɛ lebhe ɔ ‑ci ɩmɩ ‑naa wɩaan, dɛ n 'tɛlɩ 'lɛ ncɩ ‑deli 'kʋ, 'nyɩ n nyɩtɩɩ 'lɛ. 'Nyɩ ɩmɩ ‑naa 'fɩan 'la gbʋ, n gugu lebhe wɔlɩ ‑ylɛylɛ cɩ 'tɔɔ 'wlubi, sa wɔlɩ ‑naa 'ta ziziekoteen 'plɩlɩ na. 27Nyɩbhɛlʋ Aglipaa, ‑n la ɩmɩa Laagɔnekʋnyɩtɛnyaa nyɩtɛ 'lɛ na, ‑nʋawlɛ bha? N ‑ci lebhe ‑n lɩɩ ‑nʋawlɛ.» 28Aglipaa ya Pɔlʋ 'cla lebhe: «‑A ‑to 'pɛpɛ ɩya n kaan Klisi 'la gɩlɩnyɔ* ple!» 29‑Ma, Pɔlʋ yɔɔ 'cla lebhe: «Ka ɩ ‑ka clɩɩ -klipɛ, ‑aana clɩɩ ‑gbɔɔn 'mao na, 'naa Laagɔ gba ɩya ‑n 'ta le ‑mɔ bhlogbɩɩ ‑tɛɛ, ‑ma maa ‑tɛtɛa ‑masɛ ‑ɔ ‑poo 'lɛ ‑yaka 'nyukwliin na, anyɩa 'fɩan 'plɩ ‑amʋ 'bhisa. ‑Abhluakɩa ma ‑zʋɔn 'lɛ na ‑tɛɛ 'nyɩ a 'la kalɩmʋa!»

30'Nyɩbhɛlʋa, goonvlaa, Belenisi ɩya maa 'fɩan ‑ɔ ‑ya maasɔ ‑kʋa 'lɛ sa na ma ya 'kʋbho. 31Daa ma ‑kʋa 'lɛ ‑zɔnwlʋda na, maa bhlobhlo ya nyɩtɛ 'nyɩ ma claa lebhe: «‑A 'lɩ 'ta wɔlɩa 'titia nclɔɔ ‑naa ya 'lɛ nʋ 'nyɩ ɩ ya 'kwɩ ‑aana ‑palʋʋnpalɩɛ ‑fataa 'lɛ na.» 32Na, Aglipaa ya Fɛsɩtusu 'cla lebhe: «Nclɔɔ ‑naa 'taa 'clalɩ lebhe ma faa 'mɔɔ Sezalɩ ‑deliin na, n cɩa 'mɔɔ 'cintalɩ.»

Currently Selected:

Lobh 26: NTLD13

Highlight

Copy