Lobh 23

Pɔlʋ ‑kʋ 'tɩtɩplakandikadiea ‑deliin

1Pɔlʋ ya 'tɩtɩplakaandinyaa 'ciin kope 'cɩɩ, 'nyɩ ɔ ya 'cla lebhe: «Bholiecɩnyɩ, n ‑kaa 'lɛ Laagɔ lobholɩɛ bhɔ na, 'na wɔɔgugwiea 'ta ka kaan wɔlɩ bhlogbɩɩ 'kʋ gɩ ‑aan ‑yaka.» 2‑Teyiyinyɔ ‑kpasaa ma laa 'lɛ Ananɩasɩ na, ya ncɛlɩa ‑ɔ ‑kʋa 'lɛ Pɔlʋ cɩ na, 'cla lebhe ma 'sɛpɛ ɔla nea. 3Na, Pɔlʋ yɔɔ 'cla lebhe: «‑Mɔɔ 'titi Laagɔ cɩ 'ka 'lɛ 'sɛpɛ, ‑mɔa ‑naa gbɩa ‑kʋ 'lɛ le ‑gbudua ma ya 'lɛ pubha na. ‑N ‑kʋ sa le n kaan 'tɩtɩpla, ‑jlɩmaa 'la 'sasʋʋn, 'nyɩ n bu 'ta ‑jlɩmaa, 'nyɩ ‑n cla lebhe ma 'sɛpɛɛn bha?» 4Maa ‑ɔ ‑kʋa 'lɛ Pɔlʋ cɩ na, yɔɔ 'cla lebhe: «Laagɔ 'la ‑teyiyinyɔ ‑kpasaa ‑n vla 'lɛ bha?» 5‑Ma ɔ ya maa 'cla lebhe: «Bholiecɩnyɩ, n 'taa sɛɛ ‑ci lebhe ‑teyiyinyɔ ‑kpasaa ‑kʋ 'lɛ 'dɛ. ‑Masa, ɩ ‑zieo lebhe: ‑N cɩ 'ta ‑naa 'lɔlʋa to vla.»

6Na, Pɔlʋ ‑cia 'lɛ sɛɛ lebhe Saduseyɛɛnnya* ɩya Falizɩɛnnya* ‑kʋa 'lɛ 'tɩtɩplakandea nɩkplaan na, ɔ ya nɩkplaan ‑gaa 'nyɩ ɔ ya 'cla lebhe: «Bholiecɩnyɩ, Falizɩɛnnyɔ* n ‑glɩ 'lɛ, Falizɩɛnnya 'la 'cʋ n ‑glɩ 'lɛ. N 'tɛlɩ 'lɛ 'kwɩɩnkʋbhue pɔlɛ 'kʋ na, ɩla gbʋ dɛ ma zʋʋn 'lɛ 'tɩtɩ.» 7Ɔ 'ta ‑bhle 'nyɩ Falizɩɛnnyaa -ya Saduseyɛɛnnyaa ya 'lɛ wɔlɩ 'tɩtɔlɩɛ bhɔ, 'nyɩ ‑jleea yaan 'lɛ do. 8‑Masa, Saduseyɛɛnnya cla lebhe 'kwɩɩnkʋbhue 'ta ‑kʋ naa, 'bhlaandleecɩ* ɩya 'wugwi 'ta ‑kʋ. ‑Ma Falizɩɛnnyaa la 'lɛ ɩmɩ -naa ‑tɛtɛa ‑nʋawlɛ na, 9ɩ ya dlɛdlʋ 'kadie ‑lamʋ. Na, Falizɩɛnnyaa 'la ‑kandea nɩkplaan, 'la ‑jlɩmaazienya* ‑zlʋsaasa ya 'kʋbho, ma ya 'tɛtɩtɛtɩɩn nyɩtɛlɩ 'nyɩ ma ya 'cla lebhe: «‑A 'lɩ 'ta wɔɔnyinyia nclɔɔ ‑naa ya 'lɛ nʋ na. 'Nyɩ ‑ka 'wugo bhlo ‑aana 'bhlaandlee bhloo ‑kaa 'mɔɔ solua naa!» 10Wɔɔtʋtʋɛa ya nyla. Na, 'sojanyaa to 'kadiea ya 'lɩ lebhe ma cɩ 'kaa Pɔlʋ jlijlili ɩya ma 'kaa 'mɔɔ 'bhla. Na, ŋanɔ yɔɔ pla 'nyɩ ɔ ya ɔla 'sojaa 'cla lebhe ma kwli, ma ‑sɔɔ ncɛlɩa sidiin ɩya ma fɔɔ mala ‑gbangboa nɩkplaan.

11Daa 'ylʋ bhli 'lɛ na, ‑Kwlenyɔa ya Pɔlʋ 'ciinfutolu 'nyɩ ɔ yɔɔ 'cla lebhe: «Zʋ 'tɛtɩ! 'Na ‑danʋfʋɛlida ‑n wlʋ 'lɛ Zolizalɛmʋdua nɩkplaan, ‑ma ɩ ‑fata lebhe ‑n limʋ 'na ‑danʋfʋɛ Wlɔmʋdua ‑ma nɩkplaan.»

Pɔlʋ 'la gbatlɩmʋnʋyaa yɔɔ ‑gbosu -tla

12Na, daa ‑zeli ze 'lɛ na, Zifʋnyaa* ya wɔlɩ gʋa 'nyɩ ma ya ta lebhe maa cɩ 'ta li, maa cɩ 'taa 'mla, ɩ ka ‑kʋ lebhe ma 'ta 'kaa Pɔlʋ 'bhla na. 13Maa ‑ɔ gʋa 'lɛ wɔlɩ ‑naa na, ma zia ncaagwlɩɩ ‑mɔsɔ 'kʋ. 14Ma ya ‑teyiyinyaa tocɩa ɩya ncaakpasɩa ŋeni 'nyɩ ma ya maa 'cla lebhe: «‑A ya ta lebhe ‑a 'ta ka Pɔlʋ 'bhla na, ‑a cɩ 'ta ‑lʋʋ bhlogbɩɩ neen zʋ. 15Na, anyɩ ‑ma, aya 'tɩtɩplakandea 'plɩ bhlo ɩya a 'clalɩ 'sojanyaa to 'kadiea le ɔ gba ɩya ma ‑lamʋɔ anyɩ, a ple wɔlɩ le a 'ka ɔla wɔlɩa 'nanɩ nɩkplaan kope. ‑Ɔ ‑glɩ 'lɛ -anyɩ na, ‑a bhɔsʋɔ lebhe 'fɩɔn ɔ 'ka 'lɛ anyɩ cɩ ŋeni na -a kɔɔ 'bhla.» 16‑Ma, Pɔlʋ 'la ‑golio ya ‑gbosua ma tlɔɔ 'lɛ na 'la wɔlɩa 'nu. Na, ɔ ya 'sojaa 'la ‑gbangboa nɩkplaan ble 'nyɩ ɔ yɔɔ jlopla. 17Pɔlʋ ya 'sojanyaa to bhlo la 'nyɩ ɔ yɔɔ 'cla lebhe: «'Maa fa nyɩgbɩɔ ‑naa a to 'kadiea 'bhlɩ, ‑ma ɔ ‑ka wɔlɩ ɩya ɔ 'kɔɔ solu.» 18Na, 'sojanyaa toa yɔɔ 'ma, ɔ yɔɔ ma to 'kadiea 'bhlɩ fa 'nyɩ ɔ yɔɔ 'cla lebhe: «‑Palʋʋnpapanyɔ Pɔlʋ laan 'lɛ 'nyɩ ɔ yaan 'lɛ 'cla lebhe n ‑lɔɔ nyɩgbɩɔ ‑naa, ‑ma ɔ ‑ka wɔlɩ ɩya ɔ kɔɔ solu.» 19Na, 'sojanyaa to 'kadiea ya nyɩgbɩɔa sɔ 'kʋ bhli, ɔ ‑yɔɔsɔ ya ‑asule mʋ 'nyɩ ɔ yɔɔ neencla lebhe: «Wɔɔsaa ‑n ‑kaa 'lɛ ɩya ‑n kaan 'lɛ solu bha?» 20Nyɩgbɩɔa yɔɔ neenŋonu lebhe: «Zifʋnyaa ya neennunu le ma 'kɔɔ 'clalɩ le cɩpa, ‑n ka gba ɩya ma 'ka Pɔlʋ 'tɩtɩplakandea ‑deliin fa, ɩya ma 'ka ɔla wɔlɩa 'nanɩ kope. 21‑Naa laa mala wɔlɩa ‑nʋawlɛ. Ma zi ncaagwlɩɩ ‑mɔsɔ 'kʋ. Ma cɩ 'ka Pɔlʋ ‑gbosu ‑tla. Ma ya ta lebhe ma 'ta 'kɔɔ 'bhla na, maa cɩ 'ta ‑lʋʋ ‑ylɛylɛ li naa, ma cɩ 'ta ‑lʋʋ ‑ylɛylɛ 'mla. Ma ya tooto bhɔsʋa, ‑mɔɔ ‑tɛɛ ma ‑bɩɔnɩ 'lɛ 'ciin.» 22Na, sojayaa to 'kadiea ya nyɩgbɩɔa 'cla lebhe: «‑Naa solua nclɔɔ bhlogbɩɩ lebhe ‑n yaan jlopa.» Ɩla leen, ɔ yɔɔ 'cintalɩ 'nyɩ ɔ ya mʋ.

Ma ya Pɔlʋ Sezaleedua 'kʋ fa

23Na, 'sojanyaa to 'kadiea ya 'sojanyaa tocɩ ‑mɔsɔ la 'nyɩ ɔ ya maa 'cla lebhe: «A 'ma 'sojanya ‑gwlɩɩ 'kʋgba, ‑kpangwɩkʋgbɛnya ‑gwlɩɩ ‑mɔta ɩya 'kʋgba ɩya 'lipanya ‑gwlɩɩ 'kʋgba. Ma bhɔsʋa, ɩya ma 'ka 'ylʋvanɩ 'la 'ŋwacɩ ‑nvɔɔna, 'dua ma la 'lɛ Sezalee na 'kʋ mʋ. 24A bhɔsɔa ‑kpangwɩ ‑masɛ ‑ɩ cɩ ka 'lɛ Pɔlʋ goonvlaa ma 'lɛ Felisi na 'bhlɩ fa na. Ɩ ‑fata lebhe ɔla ‑jaja -naanɔa ŋenɩɔ cɩ.» 25Na, ɔ ya ‑afluwa zie 'nyɩ ɔ ya maa 'kʋ ‑gbɛ. A cla lebhe: 26«Goonvla Felisi, ‑ala ‑kwleto 'kadie, ‑amʋ Klodu Liziasɩ ‑ɔ pɔɔ 'lɛ ‑ayoka! 27Nclɔɔa n lɔɔ 'lɛ na, Zifʋnyaa* yɔɔ 'kʋ bhli 'nyɩ ka ma cɩ 'kaa 'mɔɔ 'bhla. ‑Ma, n ya gba 'nyɩ 'sojaa yɔɔ maa wlɩɩn ‑sa, sa n yaa 'nu lebhe Wlɔmʋnyɔ ɔ ‑glɩ 'lɛ na. 28N ya wabha lebhe n 'kaa wɔlɩa 'titia ma gɩa 'mɔɔ 'lɛ 'kʋ na cibhlili. Na, n ya gba 'nyɩ ma yɔɔ mala 'tɩtɩplakandea ‑deliin fa. 29'Nyɩ n ya 'lɩ lebhe wɔlɩa ma gɩa 'mɔɔ 'lɛ 'kʋ na, ‑glɩa mala ‑jlɩmaa 'la wɔlɩ, ‑ma wɔlɩa ‑ɩya 'kwɩ ‑aana ‑palʋʋnpalɩɛ ‑fata 'lɛ na, 'taa 'mɩɩ nɩkplaan ‑kʋ ‑ylɛylɛ. 30N 'nu 'lɛ lebhe ma ya nlɔɔ ‑naa 'la 'bhlawɔlɩ gʋa na, dɛ n lɔɔ 'lɛ mɔ. 'Bhlɩmɔɔn, n ya ɔla wɔlɩkʋgɩnyaa 'cla lebhe ma kuluo tʋ ‑mɔɔ ‑deliin.»

31Na, 'sojaa yaa ma to 'kadiea 'la wɔlɩa ɔ solua 'lɛ maa na 'kʋplɩlɩ. Ma ya Pɔlʋ dobhe 'ma 'nyɩ ma ‑yɔɔsɔ ya 'dua ma la 'lɛ Antipatlii na 'kʋ mʋ. 32Daa ‑zeli ze 'lɛ na, 'sojaa ‑ɔ namʋnʋa 'lɛ ‑dʋdʋ 'kʋ na ya maa ‑ɔ ‑gbɛa 'lɛ ‑kpangwɩa 'kʋ na 'cintalɩ 'nyɩ maya Pɔlʋ ya mʋ. 'Nyɩ maa, ma ya mala ‑gbangboa nɩkplaan cɔlɔ. 33Daa ma ŋeni 'lɛ Sezaleedua 'kʋ na, ‑kpangwɩkʋgbɛnyaa ya ‑afluwaa goonvlaa 'nyɩnɩ 'nyɩ ma yɔɔ Pɔlʋ ‑masɛ pala. 34Goonvlaa ya ‑afluwaa zɛlɩ 'nyɩ ɔ ya Pɔlʋ 'la 'wlʋlʋda bɩ 'kʋ 'cla. Ɔ 'nu 'lɛ lebhe Pɔlʋ ‑glɩa Silisiinyɔ na, 35ɔ yɔɔ 'cla lebhe: «‑Naa wɔlɩkʋgɩnyaa ‑ka ci na 'nyɩ n cɩɔ neecla.» Na, ɔ ya 'cla le ma zʋ Pɔlʋ, Ewlɔdʋ 'la goonvlapalʋa ‑zɔn.

Currently Selected:

Lobh 23: NTLD13

Highlight

Copy