Lobh 22

1Pɔlʋ ya ncɛlɩa 'cla lebhe: «Tocɩ ɩya bholiecɩnyɩ, a po 'nyukwliin ɩya n 'kanɩ 'na daa nyɩtɛ.» 2Daa ma 'nu 'lɛ lebhe ‑aghlameyɛɛnwɔlɩɩn ɔ solulua 'lɛ maa na, daa ya ‑awlɛ cɩɩ 'plɩ 'nyɩ ɩ ya ‑bɛkadaa 'kʋ zi. Na, Pɔlʋ ya 'kʋgɩ 'nyɩ ɔ ya maa 'cla lebhe: 3«N ‑glɩ Zifʋnyɔ*, Talɩsɩdua 'kʋ ma valɩlɩɩn 'lɛ, 'yɛpɩ Silisiibhlɩa 'kʋ. ‑Ma ‑da duu ‑naa 'kʋ ma loluluun 'lɛ. Nclɔɔa ma la 'lɛ Gamalɩɛlɩ na, 'ɔ ‑zɔn n calɩ 'lɛ ‑a tokadɔcɩa 'la ‑jlɩmaa ylɛɛylɛɛ. N ‑glɩa nclɔɔa ‑ɔ 'tɩtɔlʋa 'lɛ Laagɔ 'kʋ ‑gbɔɔn le saa anyɩa 'fɩan nʋ 'lɛ ‑yaka na. 4N ya maa ‑ɔ bhlia 'lɛ Zozii 'la ‑gugwiea na gbaylɩsa ‑aan 'kwɩɩn. N ya gba, ma ya 'ŋwlɛ ɩya ŋodie gʋa 'nyɩ ma ya maa ‑palʋʋn 'pa. 5‑Teyiyinyɔ ‑kpasaa ɩya ncaakpasɩa 'fɩan 'la ‑kandea cɩ 'na ‑danʋfʋɛ li. ‑Masa maa wlɩɩn ‑afluwia n famʋa 'lɛ ‑a bholiecɩa ‑ɔ ‑kʋ 'lɛ Damasɩdua 'kʋ na 'wlʋlʋa 'lɛ. Ka n mʋa 'lɛ le n 'kaa gɩlɩnya* ‑ɔ ‑kʋa 'lɛ 'yɛpɩ le na gʋa, n 'ka maa Zolizalɛmʋ ‑lamʋ ɩya ma 'ka maa gbaylɩsa.

6Na, n ‑kʋa ‑gugwie 'kʋ, 'nyɩ n yaanɩa Damasɩdua cɩmɛ, 'ylʋa mʋanɩa dɩdɩ slokan. 'Kplookʋ, zezezeli 'kadie ya 'lɛ ‑laagɔɔn 'wlʋlʋ 'nyɩ ɩla 'jɩa yaan 'lɛ didio. 7N ya ‑dʋdʋa 'kʋ bhlili 'nyɩ n ya ‑blɩɩzɔn bhlo 'nu, ʋ claa ‑amʋa lebhe: Sɔlʋ, Sɔlʋ 'lɩsaa 'la gbʋ ‑n saan 'lɛ gbaylɩ bha? 8N ya 'cla lebhe: ‑Kwlenyɔ, ncaasaa ‑n ‑glɩ 'lɛ bha? 'Nyɩ ‑blɩɩzɔan yaan 'cla lebhe: Nazalɛtɩnyɔ Zozii n ‑glɩ 'lɛ, ‑amʋ ‑n sa 'lɛ gbaylɩ. 9Ncɛlɩɛa n ya maasɔ namʋa 'lɛ na yaa zezezelia 'lɩ, ‑ma, ma 'taa ‑blɩɩzɔan ‑ʋ solua ‑amʋa 'lɛ na 'nu. 10N ya neencla lebhe: ‑Kwlenyɔ, 'lɩsaa n cɩ 'kaa 'lɛ nʋ bha? 'Nyɩ ‑Kwlenyɔa yaan 'cla lebhe: ‑Bho 'kʋ, mʋ Damasɩ, ‑ma cɩ 'kɔɔ 'yɛpɩ lobholia n cɩ ka 'lɛ nʋ na pala ylɛɛylɛɛ. 11‑Ma, zezezeli ‑naa 'la 'jɩa ya ‑amʋa 'ci wla. Na, 'na 'namʋyaa bhliin 'lɛ sɔ 'kʋ 'nyɩ ‑a ya 'lɛ Damasɩ ble.

12Nclɔɔ bhlo ‑kʋa 'yɛpɩ, ma laa 'mɔɔ Ananɩasɩ. Ɔ ‑glɩa Laagɔgɩlɩnyɔ*, 'nyɩ ɔ 'plɩlɩa 'lɛ Moyizi 'la ‑jlɩmaa 'kʋ. Damasɩdua 'kʋ 'la Zifʋnyaa* ‑tɛtɛa nyɩtɛa ɔla wɔɔnanɩ. 13Nclɔɔ ‑naa ci 'lɛ ‑ɔ yaan 'lɛ ŋeni 'nyɩ ɔ yaan 'lɛ 'cla lebhe: Sɔlʋ, n bholi, 'naa ‑naa 'cia kalɩ 'gbo! 'Nyɩ, dɩpɩa bhlogbɩɩ, 'na 'cia ya 'lɛ 'gbo kalɩ 'nyɩ n yɔɔ 'lɛ 'lɩ. 14Ananɩasɩ yaan 'cla lebhe: ‑A tokadɔcɩa 'la Laagɔa yaa ‑mɔɔ tooto ‑sa le ‑n ka ɩmɩ ɔ bhɔsʋa 'lɛ na cibhlili, ‑n ka 'Kʋnylugolunyɔa 'ciinlɩ ɩya ‑n ka ɔla ‑blɩɩzɔan 'nu. 15Ɔla, ‑danʋfʋɛlinyɔ ‑n cɩ ka 'lɛ 'plɩ ɩya ‑n ka ɩmɩa ‑naa 'ci 'lɩ 'lɛ 'nyɩ ‑na 'nyukwli 'nu 'lɛ na, ncɛlɩa 'fɩan 'ci 'kʋ nyɩtɛlɩ. 16Na, 'lɩsaa 'la gbʋ, n cɩ ka ‑awlɛ 'lɛ ‑bɛ bha! ‑Bho 'kʋ! Gba ɩya ma zʋɔ 'nyu 'wlu ɩya ‑naa nyinyia 'ka cɩwɔlʋlɩɛ 'lɩ, ɔla 'ŋlɩa nɩkplaan.

17Ɩmɩ ‑naa 'plɩ 'lɛ na, n ya Zolizalɛmʋ cɔlɔ. Na, clɩɩ bhlo, n ‑kʋa bhibhieda Laagɔpaakadiea* ‑zɔn, 'nyɩ wɔlɩ yaan 'ciin futolu. 18N ‑jlɛa ‑Kwlenyɔa, 'nyɩ ɔ 'cla ‑amʋa lebhe: 'Wlʋ Zolizalɛmʋdua nɩkplaan 'fan, sa ma cɩ 'ta 'na ‑danʋfʋɛa ‑n cɩ ka 'lɛ li na 'ma. 19N yɔɔ 'cla lebhe: ‑Kwlenyɔ, ma ‑ci sɛɛ wɩaan lebhe ‑amʋ mʋa 'lɛ bhibhiepalɩa* ‑zɔn, le ‑ɔ ka gba ɩya ma 'ka maa ‑ɔ zʋɔ 'lɛ mala pɔɔtɛtɛa 'kʋ na, ‑palʋʋn 'pa ɩya ma 'ka maa paan bhutili. 20N ‑kʋmʋa dɩpɩa, 'nyɩ ma ya 'lɛ ‑naa ‑danʋfʋɛlinyɔ Etɩɛnɩ 'la ‑dolua sakɔsɔ. N ‑ya ɔla 'bhlanyaa ‑plɔa 'nyɩ ‑amʋ zʋa 'lɛ mala nɩkplaanplalokua sa. 21‑Ma ‑Kwlenyɔa yaan 'cla lebhe: Mʋ, 'koonko n cɩ 'kɔɔ 'lɛ lobhu, maa ‑ɔ 'ta 'lɛ Zifʋnya ‑glɩ na 'bhlɩ.»

22Zifʋnyaa ‑ɔ poa 'lɛ Pɔlʋ 'nyukwliin na, daa ma 'nu 'lɛ wɔlɩ ‑naa na, ma ya nɩkplaan ‑gaalɩɛ bhɔ 'nyɩ ma claa lebhe: «A ‑sa -sa 'la nclɔɔa ‑dʋdʋa 'kʋ! Ɩ 'ta ‑fata le ɔ kʋ!» 23Na, saa 'titia ma saa 'lɛ 'kasɛa, ma 'paa 'lɛ mala lokua 'kwlaan 'nyɩ ma 'paa 'lɛ pipia ‑laagɔɔn na, 24'sojanyaa toa ya ɔla 'sojaa 'cla lebhe ma blee Pɔlʋ ‑gbangboa nɩkplaan ɩya ma dio ‑ngblie ɩya ɔ 'ka wɔlɩa 'la gbʋa ma slɔɔ 'lɛ 'kasɛa na 'kʋbhli. 25Ma ya Pɔlʋ nɩkplaanglɔ 'nyɩ ma bhɔsʋanɩa lebhe ma 'kaa 'mɔɔ ‑ngblieen bhutili. Na, ɔ ya 'sojanyaa toa ‑ɔ ‑kʋa 'lɛ dɩpɩa na 'cla lebhe: «Wlɔmʋnyɔa ma 'ta 'lɛ 'tɩtɩpla ‑ylɛylɛ na, a ‑ka ‑jioli ɩya 'kɔɔ ‑ngblieen bhutili bha?» 26'Sojaa toa 'nu 'lɛ wɔlɩ ‑naa na, ɔ ya ma to 'kadiea cɩmɛ 'nyɩ ɔ yɔɔ 'cla lebhe: «Wɔɔsaa -a cɩ kaa 'lɛ ‑sa nʋ bha? Wlɔmʋnyɔ nclɔɔa ‑glɩ 'lɛ!» 27'Sojanyaa to 'kadiea ya Pɔlʋ ŋeni 'nyɩ ɔ yɔɔ neencla lebhe: «Solu kakaan, wlɔmʋnyɔ n ‑glɩ 'lɛ ‑zaagbʋsa bha?» Pɔlʋ nabhe: «‑Ghɛɛ.» 28Na, 'sojanyaa to 'kadie yɔɔ 'cla lebhe: «‑Amʋ, 'fɩɔn ɩya n 'ka 'lɛ ‑jioli ‑naa 'lɩ na, 'dala ‑bhutukpa n ‑sa 'lɛ.» ‑Ma Pɔlʋ yɔɔ 'cla lebhe: «‑Amʋ, ka ma valɩɩn 'lɛ n ‑nyɩɩsɩ.» 29'Kplookʋ, maa ‑ɔ cɩ kaa 'mɔɔ ‑ngbliea nɩkplaan bhutili le ɔ 'ka nyɩtɛ na, ka ma 'talɩɔ 'cin. ‑Ɔ ‑glɩ 'lɛ 'sojanyaa to 'kadiea na, daa ɔ cibhlili 'lɛ lebhe wlɔmʋnyɔ ɔ ‑zʋa 'lɛ ‑abhluakɩa nɩkplaan na, ŋanɔ yɔɔ pla.

30Daa ‑zeli ze 'lɛ na, 'sojanyaa to 'kadiea ya wabha lebhe ɔ 'kaa wɔlɩa 'titia Zifʋnyaa gɩa 'lɛ Pɔlʋ 'kʋ na 'la -zɔɔn cibhlili. Na, ɔ ya gba ma ya ɔla ‑abhluakɩa ‑blulu, 'nyɩ ɔ ya 'clalɩ lebhe ‑teyiyinyaa tocɩa, maya 'tɩtɩplakandea ‑tɛtɛa 'wlalɩ 'wlu. Ɔ ya gba, 'nyɩ ma ya Pɔlʋ maa ‑deliin fa.

Currently Selected:

Lobh 22: NTLD13

Highlight

Copy