Lobh 21

Pɔlʋ ya Zolizalɛmʋ mʋ

1Na, daa ‑aya Efɛzɩ 'la ncaakpasɩa ‑sasalɩ 'lɛ cɩ na, ‑a ya gɔlʋʋn 'tɔ, ‑a ya 'nyi 'kʋtaan 'plɩlɩ 'nyɩ ‑a ya 'lɛ 'lekpoa ma la 'lɛ 'Kɔsʋ na 'kʋ mʋ. ‑Zeli ze 'lɛ na, ‑a ya 'lekpoa ma la 'lɛ Wlodu na 'kʋ mʋ, 'nyɩ ‑a ya 'lɛ dɩpɩa 'wlʋlʋ, ‑a ya 'lɛ 'dua ma la 'lɛ Patalaa na 'kʋ mʋ. 2‑A ya dɩpɩa gɔlʋ ŋeni, ʋ mʋa Fenisiibhlɩa 'kʋ. ‑A yʋʋ nɩkplaan 'tɔ 'nyɩ ‑a ya 'nyi 'kʋtaan 'plɩlɩ. 3‑A ya mʋ ‑aan 'nyɩ a ‑jlɛanɩ 'lɛ Siplʋlekpoa. ‑A ya 'lekpoa 'la gozɔan 'plɩlɩ 'nyɩ ‑a ya Siliibhlɩa 'kʋ gbazɩ mʋnʋ. ‑A ya Tilidua 'kʋ 'pɛlɩ, sa dɩpɩa ma cɩ 'kaa 'lɛ gɔlʋa 'la nɩkplaan 'la lɩɩa kwlee na. 4‑A ya dɩpɩa clɩɩ ‑ngbɔɔsɔ li, sa ‑a ya 'yɛpɩ gɩlɩnya* ŋeni. ‑Kplɔkplɔ ‑Wugoa* ya maa flɩɩnzʋ 'nyɩ ma yaa Pɔlʋ solu lebhe ɔ 'la mʋa Zolizalɛmʋ. 5'Bhlɩmɔɔn, ‑ala mʋclɩɩa ŋeni 'lɛ na, ‑a ya 'kubho, ‑a ya namʋ, maya 'ŋwlɛɛ ɩya 'cuo ya ‑anyɩ ‑gugwie 'kʋ falɩ ‑aan 'nyɩ ‑a ya 'dua nɩkplaan 'wlʋ. ‑A ya dɩpɩa ‑kukoonplii sasla ‑gezɔan, ‑blaa nɩkplaan 'nyɩ ‑a ya bhibhie. 6Ɩla leen, ‑a ya 'kaze 'papalɩ, a ya cɩsasalɩ, ‑a ya gɔlʋʋn 'tɔ 'nyɩ maa, ma ya 'sleen cɔlɔ. 7Na, anyɩ, ‑a ya Tili 'wlʋ, ‑a ya 'nyi 'kʋtaan 'plɩlɩ ‑aan 'nyɩ ‑a ya 'lɛ 'dua ma la 'lɛ Potolemayisi na 'kʋ 'pɛ. ‑A ya gɩlɩnyaa ‑ayo 'pa 'nyɩ ‑a ya maa clɩɩ bhlo cɩ lili.

8Na, ‑zeli ze 'lɛ na, ‑a ya 'kʋbho 'nyɩ ‑a ya 'dua ma la 'lɛ Sezalee na 'kʋ mʋ. ‑A ŋeni 'lɛ 'yɛpɩ na, ‑a ya nclɔɔa ma la 'lɛ Filipʋ, ma la 'lɛ Dɩnanɩa* 'la ‑Sanyɔ na, 'bhisleen mʋ. Ɔ ‑glɩa ncɛlɩa ‑ngbɔɔsɔa ma slalɩ 'lɛ Zolizalɛmʋ de na, mala nɩkplaan bhlo. Ɔmɔ ‑a ‑plaa 'lɛ 'kʋ. 9Ɔ ‑kaa ŋlʋgbɩa ‑nmɔɔna. Ma 'ta ŋodi ‑ci 'nyɩ ma nyɩtɛa wɔlɩa Laagɔ 'nyɩ 'lɛ maa nyɩtɛda na. 10Na, ‑a yaa dɩpɩa clɩɩ ‑zlʋsaasa li 'nyɩ Laagɔnekʋnyɩtɛnyɔ* bhlo ‑ɔ 'wlʋlʋa 'lɛ Zudeebhlɩa 'kʋ na ya 'lɛ ci. Ma laa 'mɔɔ Agabusu. 11Na, ɔ ci 'lɛ, ɔ ŋeni 'lɛ anyɩ na, ɔ ya Pɔlʋ 'la 'bɛtʋa 'ma, ɔ ya ɔmɔ 'titi ɔla sɩa ɩya ɔla bhɩa gʋa 'nyɩ ɔ ya 'cla lebhe: «'Lɩka ɩmɩa ‑Kwlenyɔa nyɩtɛ 'lɛ na, ɔ nabhe: 'Lɩka ɩmɩa ‑Kplɔkplɔ ‑Wugoa nyɩtɛ 'lɛ nclɔɔa ‑ɔ nɩnɩ 'lɛ 'bɛtʋ ‑naa na, 'la 'sasʋʋn lebhe, 'lɩka saa 'yɛpɩ Zolizalɛmʋ, Zifʋnyaa* cɩ 'kɔɔ 'lɛ gʋa ɩya ma 'kɔɔ maa ‑ɔ 'ta 'lɛ Laagɔ ‑ci na wlɩɩn 'pɛlʋzʋlʋ na.» 12‑A 'nu 'lɛ wɔlɩ ‑naa na, ‑anyɩ ɩya Sezaleedua 'la ‑laagɔnɩkplaa ya Pɔlʋ cɩ zɩzla le ɔ 'la mʋa Zolizalɛmʋ. 13Na, ɔ ya ‑anyɩ 'cla lebhe: «'Lɩsaa 'la gbʋ a tua 'lɛ 'nyɩ a 'matɩa 'lɛ lebhe a 'kaan 'nyɛkɛ cɩ 'kɔtɔ bha? ‑Amʋ, n ‑bhɔsʋa, ‑n 'ta le ma 'kaan gʋa ‑tɛɛ, ‑ma n ‑bhɔsʋa le n 'ka Zolizalɛmʋ 'kulu, ‑Kwlenyɔ Zozii 'la 'ŋlɩa 'la gbʋ.» 14Na, saa ‑a bhibhie 'mɔɔ 'lɛ 'nyɩ ɔ ŋonu 'ta 'lɛ na, ‑a 'tanɩ wɔlɩ bhlogbɩɩ nyɩtɛ. 'Nyɩ, ‑a ya 'cla lebhe: «'Naa ‑Kwlenyɔa nʋ ɔla pɔɔsa!»

15Na, clɩɩ ‑zlʋsaasa 'plɩ 'lɛ, ‑a bhɔsʋa 'lɛ 'nyɩ ‑a bhɩalɩ 'lɛ na, ‑a ya 'lɛ Zolizalɛmʋ mʋ. 16Na, gɩlɩnyaa ‑ɔ ‑kʋ 'lɛ Sezaleedua 'kʋ na -ya ‑anyɩsɔ ya mʋ 'nyɩ ma ya anyɩ nclɔɔ bhlo 'bhlɩ fa le ɔ 'ka ‑anyɩa pʋda zʋ. Ma laa nclɔɔ ‑naa Mʋnasɔɔn. Ɔ ‑glɩa Siplʋlekpoa 'kʋ 'la nclɔɔ 'nyɩ ‑glɩ ‑bɛka gɩlɩnyaa 'la nɩkplaan bhlo.

Pɔlʋ ya Zolizalɛmʋ 'la ncaakpasɩa 'bhlɩ mʋ

17Na, ‑a mʋ 'lɛ 'nyɩ ‑a ŋeni 'lɛ Zolizalɛmʋ na, pɔlɛkʋmɛnɔ nɩkplaan ‑laagɔnɩkplaa kla 'lɛ ‑anyɩ. 18Na, ‑zeli ze 'lɛ na, Pɔlʋ ɩya ‑anyɩsɔ ya Zakɩ 'bhisleen mʋ. ‑Laagɔnɩkplaa 'la ncaakpasɩa 'fɩan ‑masɛ ‑kʋa dɩpɩa. 19Pɔlʋ 'pa 'lɛ maa ‑ayo na, ɔ ya maa saa Laagɔ 'plɩplɩlɩɔ 'lɛ 'kʋ 'nyɩ ɔ ya 'lɛ ɩmɩa ‑tɛtɛa ɔ nʋnʋnʋ 'lɛ maa ‑ɔ 'ta 'lɛ Zifʋnya* ‑glɩ na sidiin nʋ na, yɛɛylɛɛ 'dɩkʋsalɩ. 20Na, maa ‑ɔ poa 'mɔɔ 'lɛ 'nyukwliin na ya Laagɔ ‑evli wo, ma ya bhlo 'plɩ 'nyɩ ma yɔɔ 'cla lebhe: «‑A bholi, ‑n ‑ci sɛɛ lebhe Zifʋnya ‑bhutukpa ya pɔɔtɛtɩkalɩnya 'plɩ, ‑ma 'bhlɩmɔɔn maa 'fɩan 'plɩlɩ kaka Moyizi 'la ‑jlɩmaa 'kʋ. 21'Bhlɩmɔɔn, ma ya ‑naa cɩ 'la wɔlɩ 'nu. Ma cɩ sɛɛ lebhe ‑n ya Zifʋnyaa ‑ɔ ‑kʋ 'lɛ maa ‑ɔ 'ta 'lɛ Zifʋnyaa* ‑glɩ na 'la 'bhlɩa 'kʋ na ca 'nyɩ ‑n ya maa 'cla lebhe ma 'la 'dɩanɩ mala ŋodicuoa 'kʋ ɩya ma 'la 'plɩlɩanɩ ɔla ‑jlɩmaa 'kʋ. 22Na, 'nsasa ‑a ‑cɩ kaa 'lɛ nʋnʋnʋ bha? Ma cɩ 'ka 'nu lebhe ‑n ya ci. 23Na, 'maa nʋ ɩmɩa ‑a cɩ 'kɔɔ 'lɛ solu na. ‑A ‑ka ‑da ‑acɩ cɩ ncɛlɩ ‑nmɔɔna, ma ya Laagɔ ‑deliin ‑ndanyɩ ta. 24Na, ‑a clɔɔ lebhe 'maa gba ɩya ncɛlɩ 'ka cibhlili lebhe wɔlɩa 'fɩan ma nyɩtɛlɩɔ cɩ na, ɩ ‑glɩ yodi. ‑Ma, ‑mɔɔ ‑masɛ, ‑n 'plɩlɩmʋ Moyizi 'la ‑jlɩmaa 'kʋ. Na, 'ma maa, gba ɩya Laagɔ 'ci 'kʋ, -n ‑ya maasɔ 'ka -kplɔ. ‑Plʋ ma 'la dlua ɩya ma 'ka mala 'nyɩa ‑sa. 25‑Ma, ‑ɔ ‑glɩ 'lɛ maa ‑ɔ 'ta 'lɛ Zifʋnya ‑glɩ, 'nyɩ ‑ɔ zʋ 'lɛ mala pɔɔtɛtɛa Zozii 'kʋ na, ‑a ya maa ‑afluwa zie 'nyɩ ‑a ya maa 'cla lebhe: Ma 'la lia mlɛa ma ya 'lɛ 'ma 'nyɩ ma ya 'lɛ 'slaka ‑sa na. Ma 'la lia mladolu. Ma 'la lia mlaa ma 'ta 'lɛ ‑blɩɩ 'dɩ na. Ɩya ma 'la lia ‑badaaglu.» 26Na, ‑zeli ze 'lɛ na, Pɔlʋ ya ncɛlɩ ‑naa ‑nmɔɔna 'ma, ɔ ya gba ɔ ‑ya maasɔ ya Laagɔ 'ci 'kʋ ‑kplɔ 'nyɩ ɔ ya Laagɔpaakadiea* ‑zɔn mʋ le ma -ka Laagɔ ci 'kʋ 'la ‑kplɔlɩɛa bhɩalɩ na, ɔ 'ka clɩɩ 'kʋa nclɔɔ nclɔɔ cɩ 'ka 'lɛ, ɔla vavalʋʋa ‑sa na, zʋ.

Ma ya Pɔlʋ 'kʋbhli Laagɔpaakadiea ‑zɔn

27Na, clɩɩa ‑ngbɔɔsɔa ma 'maa 'lɛ le ma 'kaa macɩ ‑kplɔ Laagɔ 'ci 'kʋ na mʋanɩa bhɩakan. 'Nyɩ Zifʋnyaa* ‑ɔ ‑kʋa 'lɛ Aziibhlɩa 'kʋ na ya 'lɛ ncaalawlee 'wlu nyumo 'nyɩ ma ya 'lɛ Pɔlʋ 'kʋbhli. 28Ma ‑gaa nɩkplaan 'nyɩ ma claa lebhe: «Izlayɛlɩnyanyɩ*, a ci ‑anyɩ 'kʋ! A 'lɩkɔɔ, nclɔɔa ‑ɔ plɩ 'lɛ daa ‑tɛtɛa 'nyɩ ‑ɔ ca 'lɛ ncɛlɩ wɔlɩa ‑ɩ mʋnʋ 'lɛ ‑ala 'lɔlʋa, Moyizi 'la ‑jlɩmaa ɩya Laagɔpaakadie ‑naa gbatlɩ na. Ɔ ya ncɛlɩa ‑ɔ 'ta 'lɛ Zifʋnya ‑glɩ na, Laagɔpaakadie ‑naa ‑zɔn ‑lamʋ, ‑sa ɔ ‑pla 'lɛ ‑kplɔkplɔda ‑naa ‑bhʋbhɔlɩ.» 29Sa, ma yaa Pɔlʋ ɩya Efɛzɩnyɔa ma laa 'lɛ Tlofimʋ na 'dua nɩkplaan nebhlo 'plɩda 'lɩ 'nyɩ ma gugua lebhe Pɔlʋ yaa 'mɔɔ Laagɔpaakadiea* ‑zɔn famʋa. 30Na, 'dua ‑tɛtɛa ya 'dɩdɔ 'nyɩ ncɛlɩ ya daa 'fɩan 'wlʋlʋ. Ma ya Pɔlʋ 'kʋbhli, ma yɔɔ sajlijlili, ma yɔɔ Laagɔpaakadiea ‑zɔn ‑sa 'nyɩ ma ya ʋla gbinia kpaslɩlɩ 'kplookʋ. 31Ma 'matɩa ɔla 'bhlada 'nyɩ 'dɩ ya 'lɛ 'sojaa to 'kadiea cɩ ŋeni lebhe: «Zolizalɛmʋdua ‑tɛtɛa 'dɩdɔ!» 32'Kplookʋ, ɔ ya 'sojaa ɩya 'soja ‑gwlɩɩ ‑ngbi tocɩa 'wluwlalɩ 'nyɩ ɔ ya gba ma ya ‑alawleea gbatlɩmʋnʋ. Ncɛlɩa 'lɩ 'lɛ 'sojaa to 'kadiea ‑ya 'sojaa na, ma ya Pɔlʋ 'la bhutilɩɛa 'nylugolu. 33Na, 'sojaa to 'kadiea ya Pɔlʋ cɩmɛ, ɔ ya gba ma yɔɔ 'kʋbhli 'nyɩ ɔ ya 'cla 'lebhe ma 'ma ‑abhluakɩ ‑mɔsɔ ɩya ma gʋɔ. Ɩla leen, ɔ ya wabha lebhe ɔ 'kaa nclɔɔa Pɔlʋ ‑glɩa 'lɛ ɩya wɔlɩa ɔ 'nʋa 'lɛ na cibhlili. 34‑Ma ‑alawleea sidiin, nclɔɔ nclɔɔ nyɩtɛa 'lɛ ɩmɩa ɔ ‑cia 'lɛ na. 'Nyɩ ‑wuyuwuyu ‑naa 'la gbʋ, 'sojaa to 'kadiea mino 'taa 'lɛ ɔ 'kaa wɔlɩ 'titi bhlogbɩɩ 'nu na, ɔ ya 'sojaa ‑jioli 'nyɩ le ma famʋ Pɔlʋ mala ‑gbangboa nɩkpaan. 35Na, daa ma ‑ya Pɔlʋ mʋ 'lɛ 'nyɩ ma ‑yɔɔsɔ ‑kʋa 'lɛ ‑palʋa 'wlu 'tɔda na, 'sojaa yɔɔ kuku ‑alawleea 'la ‑bhɩakpaa 'la gbʋ, 36sa, ‑alawleea ‑tɛtɛa gɩlɩa 'mɔɔ, a ‑gaa nɩkplaan 'nyɩ a claa lebhe: «A 'bhlɔɔ!»

Pɔlʋ nyɩtɛ ɔla da

37Daa 'sojaa 'matɩa 'lɛ lebhe maya Pɔlʋ 'kaa mala lobholinʋda 'kadiea ble na, Pɔlʋ ya 'sojaa to 'kadiea 'cla lebhe: «‑N cɩɩn ‑jioli 'nyɩ, n cɩɔ wɔɔkle bhlo solu bha?» 'Sojaa to 'kadiea yɔɔ 'cla lebhe: «‑N nyɩtɛ Glɛkɩwɔlɩ bha? 38‑N 'ta ‑mɔ ‑ɔ 'ta 'lɛ Ejibhitinyɔa, ‑ɔ gba 'lɛ 'nyɩ clɩɩkli ‑naa nɩkplaan, ncaabhlanyaa ‑tabhlia ‑nmɔɔnaa ‑bho 'lɛ macɩ 'kʋ, 'nyɩ -ɔ famʋ 'lɛ maa 'pʋpʋa nɩkplaan na ‑glɩ bha?» 39‑Ma, Pɔlʋ yɔɔ 'cla lebhe: «‑Amʋ bha? Zifʋnyɔ* n ‑glɩ 'lɛ, n ‑glɩ 'dua ma la 'lɛ Talɩsɩ, Silisiibhlɩa 'kʋ 'la du 'kadie, 'la ‑dʋdʋvalɩnyɔ. N bhibhieo le ‑n 'nyɩɩn ‑jioli ɩya n 'ka ‑alawleea solu.» 40'Sojaa to 'kadiea yɔɔ 'dɛ 'la ‑jiolia 'nyɩ. Na, Pɔlʋ ya 'kʋbho, ɔ ya ‑palʋa 'la 'tɔlʋdaa 'nylugo, ɔ ya sɔ 'kʋbho 'nyɩ ɔ ya ‑alawleea wɔɔnyɩtʋ 'clalɩ. Daa ‑tɛtɛa ya 'cɩɩ 'plɩ, ɔ ya Zifʋnyaa* 'bhlɩwɔlɩ 'ma 'nyɩ ɔ ya maa solulɩɛ bhɔ.

Currently Selected:

Lobh 21: NTLD13

Highlight

Copy