Lobh 20

Pɔlʋ ya Efɛzɩ 'wlʋ 'nyɩ ɔ ya Tlʋasɩ mʋ

1Na, 'kasɛ ‑naa 'fɩan ‑doon 'lɛ na, Pɔlʋ ya gɩlɩnyaa* 'wluwlalɩ 'nyɩ ɔ ya maa 'tɛtɩɩn zʋ. Ɩla leen, ɔ ya maa 'kaze 'pa 'nyɩ ɔ ya Masedʋanɩbhlɩa 'kʋ 'la ‑gugwie 'ma. 2Ɔ ya 'bhlɩ 'bhlɩ 'kʋ 'plɩlɩ, ɔ ya 'yɛpɩ 'la ‑laagɔnɩkplaa 'la ncɛlɩa 'tɛtɩɩn zʋ, 'nyɩ ɔ ya 'lɛ Glɛkɩbhlɩa 'kʋ ŋeni. 3Ɔ ya 'yɛpɩ 'cɩ ‑mɔta li. ‑Ma daa ɔ bhɔsʋa 'lɛ le ɔ 'kaa 'nyi 'kʋtaan 'plɩlɩ ɩya ɔ 'ka Siliibhlɩa 'kʋ mʋ 'nyɩ saa Zifʋnyaa* bhɔsʋaa 'lɛ le ma 'kaa ɔla 'bhlawɔlɩ gʋa na, ɔ ya 'kʋbho le ɔ 'ka cɔlɔ. 'Nyɩ ɔ ya Masedʋanɩbhlɩa 'kʋ 'plɩlɩ. 4Ɔla 'namʋnyaa ‑glɩa 'lɛ Beelenyɔa ma laa 'lɛ Sopatlɔsʋ, nclɔɔa ma la 'lɛ Pilusʋ na, ɔ ‑yowli, Asitakɩ ɩya Sekundusʋ, ma 'wlʋlʋ Tesalonikidua 'kʋ. Gayiusu, ɔ ‑glɩ Dɛlɩbeedua 'kʋ 'la nclɔɔ ɩya Timoti. 'Nyɩ Aziibhlɩa 'kʋ 'la ncɛlɩa ma laa 'lɛ Tisiki ɩya Tlofimʋ na, ‑gbɛa 'lɛ maa 'kʋ. 5Ncɛlɩ ‑naa ya 'kʋklʋʋn pʋ, ma ya mʋ 'nyɩ ma ya ‑anyɩ 'dua ma la 'lɛ Tlʋasɩ na ‑bɛlɩ. 6‑Ma ‑ɔ ‑glɩ 'lɛ ‑anyɩ na, daa 'flawia ‑ɩ 'ta 'lɛ 'zɩɩn* ‑ka na 'la 'fɛtlɩa 'plɩ na, ‑a ya Filipʋdua 'kʋ 'wlʋ, ‑a ya 'nyi 'kʋtaan 'plɩlɩ, ‑a ya mʋ 'nyɩ clɩɩ ‑ngbi 'plɩ 'lɛ na, ‑a ya 'lɛ maa 'dua ma 'lɛ Tlʋasɩ na 'kʋ ŋeni. ‑A ya dɩpɩa nyamaclɩɩ bhlo li.

Etiki ya 'kwɩɩnkʋbho

7Na, nyamaclɩɩ#20.7 Ncɛlɩa ‑anʋa gugu lebhe clɩɩ ‑naa ‑glɩa nylupuclɩɩ. bhlo 'kʋ, daa ‑anyɩa 'fɩan ‑a 'wlalɩa 'lɛ 'wlu le ‑a ka 'flawoa poli na, Pɔlʋ ‑ɔ bhɔsʋa 'lɛ le ‑zeli ‑ka ze na, ɔ 'ka 'plɩ, ɔ 'ka mʋ na, ɔ ya ‑laagɔnɩkplaa ya nyɩtɛ ‑aan dobhe 'la dɩdɩnandɩ. 8‑Kaniecɩ ‑zua ‑laagɔsidiin ‑palʋa ‑zɔan ‑a 'wlalɩa 'lɛ 'wlu na.

9Na nyɩgbɩɔ bhlo, ma laa 'mɔɔ Etiki, ɔ ‑gbɛa ‑finɛtlɩ bhlo 'wlu. Saa titia Pɔlʋ 'la nyɩtʋa gwlɛlɩa 'lɛ na, ɩ ya gba na, 'claa yɔɔ famʋ. Na, daa ɔ zili 'lɛ 'claa nɩkplaan na, ɔ ya ‑mɔta ‑laagɔsidiinpalʋa 'la ‑finɛtlɩa 'kʋa ɔ ‑kʋa 'lɛ na 'wlʋ, 'nyɩ ɔ ya ‑dʋdʋa 'kʋ bhlili. Ma mʋɔ 'lɛ 'kʋbhokan na, ɔ ‑kuoa. 10Pɔlʋ ya kwli, ɔ yɔɔ 'kʋgblii, ɔ yɔɔ 'ma 'nyɩ ɔ ya 'cla lebhe: «Pɔɔvʋ 'la 'bhlaa anyɩ, ɔ ‑ja ka!» 11Ɔ ya ‑palʋa 'wlu cɔlɔ, ɔ ya 'flawoa 'kliindɩdɩlɩ 'nyɩ ɔ ya li. Ɩla leen, ɔ ya ‑awlɛ nyɩtɛ ‑aan ‑zeli ya ze, 'nyɩ ɔ ya 'kʋbho, ɔ ya mʋ. 12‑Ɔ ‑glɩ 'lɛ ŋodicoa na, maya ɔla ‑jaja -naanɔa mʋ 'lɛ, 'nyɩ ɩ ‑glɩa pɔlɛɛnzʋlɩɛ 'kadie.

Pɔlʋ ya Tlʋasɩ 'wlʋ 'nyɩ ɔ ya Milee mʋ

13Na, ‑a ya Tlʋasɩdua 'kʋ 'wlʋ, ‑a ya gɔlʋʋn 'tɔ, ‑a ya 'nyi 'kʋtaan 'plɩlɩ 'nyɩ ‑a ya dua ma 'lɛ Asɔsʋ na gbazɩ mʋnʋ. 'Yɛpɩ a cɩ 'kaa 'lɛ Pɔlʋ, ɔmɔa ‑ɔ 'plɩlɩa 'lɛ ‑dʋdʋ 'kʋ na, 'manɩ, saa ɔ zʋɩ 'lɛ kpo 'kʋ na. 14Na, daa ɔ ŋeni 'lɛ ‑anyɩ Asɔsʋ na, ‑a yɔɔ ‑ala gɔlʋa nɩkplaan 'ma 'nyɩ ‑a ya 'lɛ dua ma la 'lɛ Mitilɛnɩ na 'kʋ 'pɛ. 15‑Zeli ze 'lɛ na, ‑a ya dɩpɩa 'wlʋ, ‑a ya 'nyi 'kʋtaan 'plɩlɩ ‑aan 'nyɩ ‑a ya 'lɛkpoa ma la 'lɛ Sioo na 'la 'kʋtakpaan ŋeni. ‑Mɔsɔ ‑zelia ze 'lɛ na, ‑a ya 'dua ma la 'lɛ Samɔsʋ na 'dɩlɩ, ‑a ya clɩɩ bhlo 'nyɩ 'kʋtaan li, ‑a ya mʋ 'nyɩ ‑a ya 'dua ma la 'lɛ Milee na ŋeni. 16Na, Pɔlʋ 'ta wabha lebhe ɔ 'ka Efɛzɩdua 'kʋ 'plɩlɩ ɔ 'la 'ka sɛ Aziibhlɩ 'kʋ ‑gbɔɔn didleli. Sa, ka ɔ 'matɩa 'lɛ le ɔ -kaa mino na, ɔ 'kaa Zolizalɛmʋ ŋeni 'fɩɔn ɩya ma 'ka Pantekɔtʋfɛtlɩa li.

Pɔlʋ ya Efɛzɩ 'la ncaakpasɩa 'kaze 'pa

17Na, daa Pɔlʋ ‑kʋa 'lɛ Mileedua nɩkplaan na, ɔ ya Efɛzɩ 'la ‑laagɔnɩkplaa 'la ncaakpasɩa 'dɩ tlɛlɩ le ma 'wlalɩ 'wlu. 18Daa ɔ la 'lɛ maa 'nyɩ ma ci 'lɛ na, ɔ ya maa 'cla lebhe: «A ‑ci saa n ‑ya anyɩsɔ namʋnamʋnʋ 'lɛ clɩɩa 'kʋ n zʋ 'lɛ kple Aziibhlɩa 'na ‑bɛkada ‑aan 'nyɩ ‑yaka ya 'lɛ ŋeni na. 19N ya ‑Kwlenyɔ lobho, ‑ncɩdʋdʋkʋlalɩɛ, 'mɩɔ ɩya 'kwlɩbhɩɛa n 'lɩlɩ 'lɛ 'na 'bhlawɔlɩa Zifʋnyaa* gʋa 'lɛ ɩla gbʋ na nɩkplaan. 20N 'ta anyɩ wɔlɩ bhlogbɩɩ zizieli. ‑Ma, n ya anyɩ plici, n ya anyɩ ca ‑owe ‑owe‑aana ‑asule. 21'Na wɔɔnyɩtʋa nɩkplaan, ka n laa 'lɛ Zifʋnyaa ɩya Glɛkɩnyaa le ma cala kwla, ma tla Laagɔ 'klʋ ɩya ma zʋ mala pɔɔtɛtɛa ‑ala ‑Kwlenyɔ Zozii 'kʋ.

22Na, ‑pɔtɔnʋ, saa ‑Kplɔkplɔ ‑Wugoa* kpɛɛn 'lɛ 'kʋ na, 'lɩka, n ‑kʋnɩ Zolizalɛmʋ ‑gugwie 'kʋ. N 'ta ɩmɩa ‑ɩ ‑bɛlɩɩn 'lɛ 'yɛpɩ na ‑ci. 23‑Ma, sa 'fɩan ɩ 'ka 'lɛ ‑kʋkʋlʋ na, ‑Kplɔkplɔ ‑Wugoa* palaan lebhe 'di 'di 'kʋ, ‑palʋʋnpalɩɛ ɩya gbaylɩsalɩɛ ‑bɛlɩɩn 'yɛpɩ. 24Na, n bu 'ta ‑amʋ 'titi 'na jabhʋa. ‑Ma ɩmɩa ‑ɩ kalɩɩn 'lɛ gbʋ na, ɩmɩ ‑glɩ lebhe n bhɩalɩ lobholia ‑Kwlenyɔ Zozii 'nyɩɩn 'lɛ nʋda na: N 'ka Dɩnanɩa* ‑sa ɩya Laagɔ 'la dananɔa 'la ‑danʋfʋɛ li.

25'Lɩka, -ɩ bhɔlʋ 'lɛ ‑da na, n ‑ci sɛɛ wɩaan lebhe anyɩa 'fɩan n 'plɩlɩ 'lɛ 'bhlɩ 'nyɩ n plici 'lɛ ‑Kwlenyɔ 'la ‑Kwlelie na, 'a cɩ 'tanɩ 'na 'klʋa 'ciinlɩ. 26Na, ‑yaka, anyɩa 'fɩan 'ci 'kʋ, n cla anyɩ lebhe: Gbazɩ anyɩ nɩkplaan, bhlo ‑ka mlɔ na, n 'tɩɩ 'wlu ‑ci. 27Sa, ‑zaagbʋsa, n 'ta anyɩ wɔlɩ bhlogbɩɩ zizieli: ‑Ma, ɩmɩa ‑tɛtɛa Laagɔ bhɔsʋa 'lɛ na, ɩmɩ n ‑salɩ 'lɛ anyɩ 'dɩ kʋ. 28Na, a 'lɩ acɩ 'klʋ ɩya 'lɩ mlakpaa ‑Kplɔkplɔ ‑Wugoa 'nyɩ 'lɛ anyɩ ‑bɛda na, 'klʋ. A 'plɩ Laagɔ 'la ‑palʋa ɔ ma 'lɛ ɔla 'Cʋa 'la ‑dolua 'nyɩ ɔ ya 'lɛ nɩkplaankplɩ na, 'la kpanya.

29N ‑ci sɛɛ lebhe daa n cɩ 'ka 'lɛ anyɩ cɩɩnwlʋlʋ ɩya n 'ka 'lɛ mʋ na, ncɛlɩa ‑ɔla gbɩa ‑kʋ 'lɛ le 'kɔɔngoye na cɩ 'ka anyɩ nɩkplaan bhlili ɩya ma 'ka mlakpaa a ‑glɩ 'lɛ na dlolu. 30Ncɛlɩ cɩ 'ka anyɩ 'titi ala ‑dɔlʋa nɩkplaan 'wlʋ, ma 'ka yooyo -wɔlɩ nyɩtɛ, ‑ɩ cɩ ka 'lɛ gba ɩya gɩlɩnyaa* 'ka 'lɛ maa gɩlɩ na. 31Na, a 'la ŋɔmʋa. Ɩya a luoli lebhe zezezeli ɩya bhlibhliylʋʋn, n 'kʋ anyɩa 'fɩan, 'mɩɔ nɩkplaan, nclɔɔ nclɔɔ 'bɩsada ‑aan liowli ‑mɔta 'wugo. 32‑Pɔtɔnʋ, n zʋnɩ anyɩ Laagɔ ɩya ɔla dananɔa 'la wɔɔnyɩtʋa wlɩɩn. Ɔ ‑ka 'tɛtɩ ɩya ɔ 'ka gba ‑ala pɔɔtɛtɛa 'ka 'ghlibholi ɩya maa 'fɩan ‑ɔ ‑glɩ 'lɛ ɔ 'nʋa na, 'ka 'nanɩa ɔ ‑bhɔsʋa 'lɛ mala gbʋ na, ‑aja 'kʋ lili.

33N 'ta 'dala, ‑asɩkɛ ‑aana lokwi nclɔɔ bhlogbɩɩ wlɩɩn 'matɩlɩ. 34'Lɩka 'na sɩa ‑mɔsɔa, anyɩ 'titi, a ‑ci sɛɛ lebhe ɩmɩ n 'ma 'lɛ 'nyɩ n ya 'lɛ lobholi nʋ le n ‑ya 'na 'namʋnyaa 'la 'ka sɛ ‑lʋʋ ‑mie. 35'Nyɩ n ya anyɩ clɩɩa 'fɩan pala lebhe ɩ ‑fata lebhe a kplaslo ɩya a 'ka ŋaazɩnyaa klalɩ. Ɩya a luoli ɩmɩa ‑Kwlenyɔ Zozii 'titi nyɩtɛa 'lɛ 'nyɩ ɔ 'cla 'lɛ lebhe: Nclɔɔa ‑ɔ nyɩ 'lɛ na, ɔ -kʋ 'nanɩ ɔ zi ɔmɔa ma 'nyɩ 'lɛ na 'kʋ.»

36Ɔ nyɩtɛ 'lɛ wɔlɩ ‑naa 'nyɩ ɔ bhɩalɩ 'lɛ na, ɔ ya maasɔ ya ‑kukoonkplii sasla 'nyɩ ɔ ya bhibhie. 37Na, ncɛlɩa 'fɩan ya 'nʋgbʋ 'tu 'nyɩ ma ya Pɔlʋ ‑blɩɩn bhlili 'nyɩ ma yɔɔ gbʋgbʋa. 38Mala cɩɩnkalɔa 'titi 'wlʋlʋa wɔɔklea nɩkplaan ɔ solua 'lɛ maa lebhe ma cɩ 'tanɩa ɔla 'klʋa 'lɩ na. 'Nyɩ ɩla leen, ma yɔɔ ‑gugwie 'kʋ falɩ ‑aan 'nyigboa cɩ.

Currently Selected:

Lobh 20: NTLD13

Highlight

Copy