Lobh 19

Pɔlʋ ya Efɛzɩdua 'kʋ cɔlɔ

1Daa Apolɔsʋ ‑kʋa 'lɛ Kolɛntɩdua 'kʋ na, 'dɛ Pɔlʋ 'plɩlɩ 'lɛ 'kikibhlɩa 'kʋ 'nyɩ ɔ yaa 'lɛ Efɛzɩdua 'kʋ mʋ. Ɔ ya 'yɛpɩ Zozii 'la gɩlɩnya* ‑zlʋsaasa ŋeni 2'nyɩ ɔ ya maa neencla lebhe: «A 'ka 'lɛ pɔɔtɛtɩkalɩnya 'plɩ na, ‑Kplɔkplɔ ‑Wugoa* kwlilia anyɩ 'kʋ bha?» Ma yɔɔ neenŋonu lebhe: «‑Ma ‑a 'ta ‑ka ‑azla ‑bɛkada 'nu lebhe ‑Kplɔkplɔ ‑Wugo ya tooto ci!» 3Pɔlʋ ya maa neencla lebhe: «Na, 'nyuwluzʋlɩɛsaa a 'lɩa 'lɛ bha?» ‑Ma ma yɔɔ neeŋonu lebhe: «Zaan zʋ 'lɛ ‑anyɩ 'nyu 'wlu.» 4Pɔlʋ ya ‑awlɛ maa 'cla lebhe: «Ncɛlɩa ‑ɔ ŋonua 'lɛ 'nyɩ ‑ɔ cala 'lɛ kwla na, maa Zaan zʋa 'lɛ 'nyu 'wlu. 'Nyɩ ɔ claa 'lɛ ncɛlɩ lebhe ma zʋ mala pɔɔtɛtɛa nclɔɔa ɔ cɩ 'kaa 'mɔɔ 'lɛ leen 'wlʋlʋ ɩya ɔ 'ka ci na 'kʋ. 'Dɛ 'la nclɔɔa, ɔmɔ ‑glɩ 'lɛ Zozii.» 5Ma ya Pɔlʋ 'nyukwliinpo 'nyɩ ‑Kwlenyɔ Zozii 'la 'ŋlɩa nɩkplaan ɔ ya maa 'nyuwluzʋ. 6Pɔlʋ ya maa sɩ 'wlu ‑gbɛ 'nyɩ ‑Kplɔkplɔ ‑Wugoa ya maa 'kʋ kwlili: Ma nyɩtɛa ‑buun bhlɩ 'kʋ 'la wɔlɩ 'nyɩ ma nyɩtɛa Laagɔ ne 'kʋ. 7Ncɛlɩa ‑ɔ ‑kʋa 'lɛ 'dɛ na cɩa ‑sa ncaatabhli 'kʋgba ‑mɔsɔ 'wlʋ.

8Na, Pɔlʋ mʋa ‑azla bhibhiepalʋa* ‑zɔn. 'Nyɩ 'cɩ ‑mɔta nɩkplaan, ɔ nyɩtɛa 'yɛpɩ pɔɔtɛtɛ nɩkplaan Laagɔ 'la ‑kwleliea 'la cɩa wɔlɩa 'nyɩ ɔ nʋa saa 'fɩan le maa ‑ɔ poa 'mɔɔ 'lɛ 'nyukwliin na ma 'maa ɔla wɔlɩa. 9‑Ma maa nɩkplaan, ‑anʋa ŋonu 'taa 'lɛ lebhe ma 'ka Pɔlʋ 'la wɔlɩa 'ma 'nyɩ ma nyɩtɛ ‑Kwlenyɔ 'la ‑gugwiea 'la wɔɔnyinyi. Na, Pɔlʋ ya maa cɩɩnwlʋlʋ, ɔ yaa gɩlɩnyaa bhlobhlo 'ma 'nyɩ ɔ caa maa clɩɩa 'fɩan nclɔɔa ma laa 'lɛ Tilanusʋ na 'la ‑aflupalʋa ‑zɔn. 10Na, ɔ ‑kʋa sɛɛ nʋda ‑aan liowli ‑mɔsɔ. Ɩ yaa gba na, ncɛlɩa 'fɩan ‑ɔ ‑kʋa 'lɛ Aziibhlɩa 'kʋ na, Zifʋnya* ɩya maa ‑ɔ 'ta 'lɛ Zifʋnya ‑glɩ na, ya mino 'nyɩ ma ya ‑Kwlenyɔ 'la wɔɔnyɩtʋa 'nu.

Seva 'la 'cuoa ya cla le ma 'ka 'wugwi ‑nyinyi 'tli

11'Nyɩ Laagɔ 'plɩlɩa Pɔlʋ 'kʋ 'nyɩ ɔ nʋa 'ciinzizielilobholia ‑ɩ 'taa 'lɛ 'sɛ ‑naanɩ ‑glɩ na. 12‑Anɩ ‑naa 'la gbʋ na, ma 'maa lokwi ‑aana ‑afluwa ‑ɛ yaa 'lɛ Pɔlʋ 'la 'nyɛkɛa ko na 'nyɩ ma zʋa 'mɛɛ guzenya 'kʋ. Na, ncɛlɩ ‑naa jabhaa 'nyɩ 'wugwi ‑nyinyi wlʋa maa nɩkplaan. 13Na, Zifʋnya* ‑zlʋsaasa ‑ɔ ‑glɩa 'lɛ tɩtɔnʋnya na, maa ‑masɛ ya bhɔ le ma 'ka ‑Kwlenyɔ Zozii 'la 'ŋlɩa la ɩya ma 'ka 'wugwi ‑nyinyia ‑ɩ ‑kʋa 'lɛ ncɛlɩ nɩkplaan na 'tli. Ma claa lebhe: «N cla anyɩ, Zoziia Pɔlʋ plici 'lɛ na 'la 'ŋlɩa nɩkplaan, lebhe a 'wlʋ nclɔɔ ‑naa nɩkplaan!»

14Na, ma laa Zifʋnyaa 'la ‑teyiyiynyɔkpasa bhlo Seva, ɔ ‑yowliecɩ ‑ngbɔɔsɔɔ nʋa 'lɛ sɛɛ. 15'Wugo ‑nyunyua ya maa 'cla lebhe: «‑Amʋ, n ‑ci nclɔɔa ‑ɔ ‑glɩ 'lɛ Zozii na 'nyɩ n ‑ci 'lɛ Pɔlʋ. ‑Ma anyɩ, ncaasaacɩ a ‑glɩa 'lɛ bha?» 16'Nyɩ, nclɔɔa 'wugo ‑nyunyua ‑kʋa 'lɛ nɩkplaan na ya ‑bluu, ɔ ya maa 'kʋbhli, ɔ ya maa gbasa bhuti, ma ya 'gu, ma ya 'slea nɩkplaan 'wlʋ, ‑abaan ɩya maya cɩ 'la 'ji. 17Na, Efɛzɩdua 'la ncɛlɩa ‑tɛtɛa, Zifʋnya ɩya Glɛkɩnya, ya wɔlɩ ‑naa 'nu. Ŋanɔ ya maa 'fɩan pla 'nyɩ ma zʋanɩa ‑Kwlenyɔ Zozii 'la 'ŋlɩa.

18Na, maa ‑ɔ 'plɩ 'lɛ pɔɔtɛtɩkalɩnyaa na, ‑bhutukpa ya mala ‑ngasia ‑owe ‑owe ‑sakan ci. 19Maa ‑anʋa ‑ɔ ‑glɩa 'lɛ ‑abhobhoyanʋnya na, ‑bhutukpa ‑ya mala ‑afluwia 'wluwlalɩ 'nyɩ ma yɩɩ ncɛlɩa 'fɩan 'ci 'kʋ ‑sieli. Daa ma bu 'lɛ ɩla ‑pɩadalaa na, ma ya 'lɩ lebhe a cɩa ‑sa 'dala 'la ‑baagɩ cʋ ‑gwlɩɩ ‑mɔsɔ ɩya 'kʋgba nʋ. 20Na, ‑Kwlenyɔ 'la wɔɔnyɩtʋa mʋa 'kʋklʋʋn 'nyɩ ma lɩa ʋla nʋnʋgbɩa ncɛlɩa sidiin.

Efɛzɩnyaa mʋnʋ ‑laagɔnɩkplaa gbatlɩ

21Daa wɔlɩ ‑naa 'fɩan 'plɩ 'lɛ na, Pɔlʋ ya bhɔsʋa ‑Kplɔkplɔ ‑wugoa* 'la 'ŋlɩa nɩkplaan le ɔ 'ka Masedʋanɩhlɩa ɩya Akayiibhlɩa 'kʋ 'plɩlɩ ɩya ɔ 'kaa Zolizalɛmʋ mʋ. Ɔ nabhe: «Daa n cɩ 'ka 'lɛ mʋ ɩya n 'ka 'lɛ 'yɛpɩ ŋeni na, ɩ ‑fata lebhe n mʋ Wlɔmʋdua 'kʋ ‑masɛ.» 22Ɔ ya Timoti ɩya Elasɩ, ɔla klalɩnya ‑mɔsɔ Masedʋanɩbhlɩa 'kʋ lobhu. ‑Ma ɔmɔ 'titi, ɔ ya Aziibhlɩa clɩɩ ‑zlʋsaasa li.

23'Dɛ 'la 'bhlɛsʋa nɩkplaan, dɛ wɔɔkadɩa 'plɩ 'lɛ Laagɔ 'la wɔlɩa 'la gbʋ. 24Na, ma laa nclɔɔ bhlo Demetliyusu, ɔ ‑glɩa ‑asɩkɛpinyɔ. Nclɔɔ ‑naa 'maa 'dalapɔpʋa, ɔ nʋa gʋgwlapaacʋ ‑ɩ gbaa 'lɛ Atemisi#19.24 Atemisi ‑glɩa ‑zliiŋlɔ. Ncɛlɩ gʋgwlaa 'mɔɔ le mala gologololɩɩa 'kaa nama ɩya ma 'kaa 'cuo ‑gbɔɔn valɩ. 'klʋ na 'nyɩ ɩ nyɩa lobholinʋnyaa 'dala ‑bhutukpa. 25Na, Demetliyusu ‑naa ya lobholinʋnya ‑naa 'fɩan ɩya maa ‑ɔ nʋa 'lɛ lobholi ‑lɔkpa ‑naa na 'wluwlalɩ 'nyɩ ɔ ya maa 'cla lebhe: «Ncɛlɩnyɩ, anyɩ 'titi a ‑ci sɛɛ lebhe lobholi ‑naa nɩkplaan ‑ala 'nanɩkʋlɩɛa 'fɩan 'wlʋlʋ 'lɛ. 26‑Ma, a ‑jlɛ 'nyɩ ‑a ‑ŋlɛ ɩmɩa ‑ɩ plɩ 'lɛ na. ‑N 'ta Efɛzɩbhlɩa 'kʋ ‑tɛɛ, ‑ma Aziibhlɩa ‑tɛtɛa 'kʋ, Pɔlʋ ‑naa ya ncaabhutukpa 'cla lebhe ‑ala ‑zliia 'ta lɩɩa ma cɩ 'ka 'lɛ gʋgwla na ‑glɩ, 'nyɩ ɔ ya gba mala wɔɔgʋgwie ya kaci. 27Na, ‑n 'ta ‑ala lobholia ‑tɛɛ ‑ɩ cɩ 'ta 'lɛ nyumo, ‑ma ‑ala ‑zlii 'kadiea ‑ɔ ‑glɩ 'lɛ Atemisi na 'la gʋgwlapalʋa cɩ we 'nyɩ ɔmɔa Aziibhlɩa ɩya ‑laagɔzɔn bhuoa gʋgwla 'lɛ na 'la 'ŋlɩa cɩ 'kʋ ŋomu!»

28Na, daa ‑alawleea 'nu 'lɛ wɔlɩ ‑naa na, dɔgbɛ ya maa pla, ma ‑gaa nɩkplaan 'nyɩ ma claa lebhe: «‑Anyɩ Efɛzɩnyaa, ‑ala ‑zleea ‑a ‑glɩ 'lɛ Atemisi na, a 'ghli!» 29Na, 'dua 'fɩan ya neengba, ncaabhutukpa ya ‑zɔnwlʋ, ma ya Masedʋanɩnyaa ma laa 'lɛ Gayiusu ɩya Asitakɩ, 'nyɩ ‑ɔ ‑glɩa 'lɛ Pɔlʋ 'la 'namʋnya na, 'kʋbhli 'nyɩ maya maasɔ ya 'dua 'la 'clikpoa nɩkplaan mʋ. 30Pɔlʋ ya wabha lebhe ɔ 'kaa 'yɛpɩ mʋmʋ, ‑ma gɩlɩnyaa* yɔɔ mɩ tie. 31'Nyɩ Aziibhlɩa 'kʋ 'la -tlɩkpɛlobholinʋnya 'kadɩ ‑zlʋsaasa, ɔ ‑glɩa 'lɛ Pɔlʋ 'nagwɩɛcɩ na ‑masɛ yɔɔ 'cla lebhe ɔ 'la mʋa 'yɛpɩ.

32Na, nclɔɔ nclɔɔ nyɩtɛa ɔla sa, ‑alawleea gblogblolua: ‑Bhutukpa 'taa wɔlɩa 'la gbʋa 'titia ma 'wlalɩa 'lɛ 'wlu na ‑ci. 33Ncɛlɩ ‑zlʋsaasa ya nclɔɔa ma la 'lɛ Alɛzandlɩ, Zifʋnyaa* zʋ 'lɛ macɩ 'kʋklʋʋn na wɔlɩa ‑zɔnsa. Alɛzandlɩ ya sɔ 'kʋ 'bhli ncɛlɩa 'fɩan 'ci 'kʋ le ɔ 'kaa nyɩtɛ. 34‑Ma, ma 'nu 'lɛ lebhe ɔ ‑glɩa Zifʋnyɔ* na, ‑blɩɩzɔn bhlo nɩkplaan ma 'fɩan yaan ‑gaa ‑aan 'ŋwacɩ 'wlu ‑mɔsɔ 'nyɩ ma claa lebhe: «‑Anyɩ Efɛzɩnya 'la ‑laagɔa ‑ɔ ‑glɩ 'lɛ Atemisi na 'ghli!» 35'Bhlɩmɔɔn, 'dua toa 'la 'kʋgbɛnyɔa ya mino, ɔ ya ‑alawleea pɔlɛ ‑dʋdʋ 'kʋ ‑la 'nyɩ ɔ ya maa 'cla lebhe: «Efɛzɩnyanyɩ, ncaasaa ‑ɔ ‑kʋa 'lɛ ‑da, 'nyɩ ɔ 'ta 'lɛ ‑ci lebhe Efɛzɩdua ‑glɩ ‑a nɔ Atemisi ɩya tɛlɩtɛlɩlʋʋa ‑ʋ palalɩɔ 'lɛ na, 'la ‑kplɔkplɔdu bha? 36Masa ncɛlɩa 'fɩan ‑ci 'lɛ sɛɛ na, ɩ ‑fata lebhe a -la pɔlɛ ‑dʋdʋ 'kʋ ɩya a gugu 'fɩɔn ɩya a 'ka nʋ. 37Sa, a ya da ncɛlɩa ‑ɔ 'ta 'ka 'lɛ wɔlɩ bhlogbɩɩ nyɩtɛ naa ‑aana ‑ɔ 'ta 'ka 'lɛ wɔlɩ bhlogbɩɩ nʋ ‑ɩ ka 'lɛ ‑ala ‑laagɔa vla na -la. 38Ka Demetliyusu ɩya ncɛlɩa ‑ɔ gɩlɩɔ 'lɛ na, ma ya nclɔɔ ‑ka gbʋ kalɩ na, a ‑ka 'lɛ 'tɩtɩplanya 'nyɩ 'tɩtɩpla clɩɩ ‑kʋ 'lɛ na, a mʋ 'tɩtɩplanyaa 'bhlɩ! 39'Nyɩ gbazɩ a ‑ka ‑wa lebhe ma 'ka ‑awlɛ wɔlɩa ‑mɔsɔ ‑mɔsɔ nyɩtɛ na, ma cɩ wɔlɩa 'tɩtɩplakandea ‑deliin fa. 40Na, ‑a 'ta pɔlɛ 'kʋ zʋlʋ na, ɩmɩa ‑ɩ 'plɩ 'lɛ ‑yaka na, ma cɩ ‑anyɩ ɩla gbʋa slo 'nyɩ ‑a cɩ 'ta wɔlɩ 'lɩ ɩya a ka 'wluwlalɩɛ ‑naa 'la wɔlɩa ‑zɔnsa.» Daa 'duatoa nyɩtɛ 'lɛ sa na, ɔ ya gba 'nyɩ ‑alawleea ya dlolu.

Currently Selected:

Lobh 19: NTLD13

Highlight

Copy