Lobh 18

Pɔlʋ ya gba ‑laagɔnɩkplaa ‑kʋnɩ Kolɩntɩdua nɩkplaan

1Na, wɔlɩ ‑naa 'la leean, Pɔlʋ ya Atɛnɩ 'wlʋ 'nyɩ ɔ ya 'dua ma la 'lɛ Kolɛntɩ na mʋ. 2Ɔya Zifʋnyɔ* bhlo ya 'yɛpɩ 'cɩlɩ, ma laa 'mɔɔ Akilasɩ, ɔ ‑glɩa Aziibhlɩa 'kʋ, daa ma la 'lɛ Pɔɔn na 'la ‑dʋdʋvalɩnyɔ. Ɔya ɔ nʋŋlɔ Plisii ‑kaa 'lɛ Italiibhlɩa 'kʋ 'wlʋ 'nyɩ ma ‑kaa 'lɛ ci na, ɩ 'ta kaa ‑gwlɛlɩ. Sa goonvlaa ma laa 'lɛ Klodu na, ya 'cla lebhe Zifʋnyaa* 'fɩan ‑ɔ 'kʋa 'lɛ Wlɔmʋdua nɩkplaan na, ma 'wlʋa 'yɛpɩ. Pɔlʋ ya Akilasɩ ɩya ɔ nʋŋlɔ 'kʋpla. 3Akilasɩ ɩya ɔ nʋŋlɔ ‑glɩa -paaplinʋnyaa. 'Nyɩ Pɔlʋ ‑ma ‑glɩa 'lɛ ɩla nʋnyɔ na, ɔ ya maa 'kʋpla 'nyɩ ɔ nʋa 'yɛpɩ lobholi. 4Nyɔkwɛclɩɩa* ‑tɛtɛa 'kʋ, bhibhiepalʋa* ‑zɔn, ɔya Zifʋnyaa ɩya Glɛkɩnyaa 'tɩtɔa wɔlɩ 'nyɩ ɔ nʋa saa 'fɩan le ma 'maa ɔla wɔlɩa. 5‑Ma, daa Silasɩ ɩya Timoti 'wlʋ 'lɛ Masedʋanɩ 'nyɩ ma ci 'lɛ na, Pɔlʋ ya ɔcɩ 'kʋ 'wlʋ 'nyɩ Laagɔ lobholia ‑tɛɛ ɔ gɩɩnɩa 'lɛ 'ciin, ɔ nʋa 'lɛ. 'Nyɩ ɔ claa 'lɛ Zifʋnyaa lebhe Zozii ‑glɩ 'lɛ Laagɔ 'la ‑Sasanyɔa*. 6‑Ma saa ma mʋnʋa 'mɔɔ 'lɛ gbatlɩ 'nyɩ ma vlaa 'mɔɔ 'lɛ na, ɔ ya ɔla lokua 'la cɩa 'la pipia gbɔtɔ, 'nyɩ ɔ ya maa 'cla lebhe: «Ala ‑dolua ‑gbɛ anyɩ 'titi 'wlu, n 'ta ʋla 'wlu ‑ci, 'nyɩ ‑ɩ bhɔlʋnɩ 'lɛ ‑da na, maa ‑ɔ 'ta 'lɛ Zifʋnya ‑glɩ na, 'bɩɩn n cɩ kanɩ 'lɛ mʋnʋ.» 7Ɔ ya dɩpɩa 'wlʋ 'nyɩ ɔ ya nclɔɔ bhlo 'bhisleen mʋ. Nclɔɔ ‑naa, ma laa 'mɔɔ Titiusu Zusutusu, ɔ gʋgwlaa Laagɔ 'nyɩ ɔla 'slea ‑kʋa bhibhiepalʋa cɩ. 8Na, ‑palʋa toa ma laa 'lɛ Klisipusu na ya ɔla pɔɔtɛtɛa ‑Kwlenyɔa 'kʋ zʋ ɔya ɔla 'slinyaa 'fɩan ɩya ncɛlɩa 'fɩan ‑ɔ ‑kʋa 'lɛ ɔ 'bhisleen na. 'Nyɩ Kolɛntɩnyaa ‑bhutukpa ‑ɔ poa 'lɛ Pɔlʋ 'nyukwliin na ya pɔɔtɛtɩkalɩnya 'plɩ 'nyɩ ma ya maa 'nyuwluzʋ. 9Na, clɩɩ bhlo, dobhesa, ‑Kwlenyɔa ya Pɔlʋ 'claan futolu 'nyɩ ɔ yɔɔ 'cla lebhe: «‑Naa 'gulua nclɔɔ ‑ylɛylɛ, ‑ma nyɩtɛ na wɔlɩ clɩɩa 'fɩan, 10‑ofi lebhe n ‑kʋɔ cɩ. 'Nyɩ nclɔɔ bhlogbɩɩ cɩ 'ta mino ɩya ɔ 'kɔɔ gbaylɩsa, sa ncaabhutukpa ‑kʋ du ‑naa nɩkplaan 'nyɩ ma ‑glɩ 'naanʋa na.» 11Pɔlʋ ya Kolɩntɩdua nɩkplaan liowlu ɩya 'kle li. Ɔ caa ncɛlɩ Laagɔ 'la wɔlɩa.

Ma ya Pɔlʋ goonvlaa ma la 'lɛ Galiyɔɔn na ‑deliin fa

12Na, 'dɛ 'la 'bhlɛsʋa nɩkplaan, nclɔɔ bhlo ‑kʋa, ma laa 'mɔɔ Galiyɔɔn. Ɔ ‑glɩa Wlɔmʋnyɔ 'nyɩ ɔ ‑glɩa 'lɛ Akayiibhlɩa 'kʋ 'la goonvla. Na, Zifʋnya* ‑anʋa ya bhlo 'plɩ, ma ya wɔlɩ gʋa. 'Nyɩ ma ya Pɔlʋ 'tɩtɩpladaa fa. 13Ma claa lebhe: «Nclɔɔ ‑naa 'la saa ɔ ca 'lɛ ncɛlɩ Laagɔ ‑wɔlɩa na ɩya ‑ala ‑jlɩmaa 'ta 'wlʋlʋ.» 14Daa Pɔlʋ bhɔsʋa 'lɛ le ɔ 'kaa wɔɔnyɩtʋ 'ma na, Galiyɔɔn ya Zifʋnyaa* 'cla lebhe: «‑Amʋ, 'n ‑pla 'ta ‑sa 'la 'tɩtɩ. Ɩ ‑kaa ‑kʋ lebhe ncaabhlawɔlɩ ‑aana wɔɔkadie bhlo 'la gbʋ na, n cɩa 'mɩɩ 'nyukwliinpo 'nyɩ n cɩa 'mɩɩ nyɩtɛsa cibhlili. 15‑Ma ‑ɩ ‑glɩ 'lɛ anyɩ 'titi ala cacawɔlɩ, ala 'ŋlɩ ɩya ala ‑jlɩmaa 'la cɩa wɔlɩ na, 'dɛndlana 'dɛ 'la wɔlɩa ‑kʋ anyɩ 'titi wlɩɩn. ‑Ma ‑amʋ, 'n cɩ 'ta ‑sa 'la wɔlɩ nɩkplaan 'dɩ!» 16'Nyɩ ɔ ya gba ma ya maa 'tɩtɩpladaa tlɩ. 17Na, maa ‑tɛtɛa ya nclɔɔa ma laa 'lɛ Sɔsʋtɛnɩ, 'nyɩ ‑ɔ ‑glɩa bhibhiepalʋa* to na, 'kʋbhli. Ma yɔɔ 'tɩtɩpladaa 'la gbinea ne 'kʋ bhutili. ‑Ma Galiyɔɔn 'ta wɔlɩ ‑ylɛylɛ ne sa.

Pɔlʋ ya Antɩɔsʋ cɔlɔ

18Pɔlʋ ya Kolɛntɩ clɩɩ ‑zlʋsaasa li. 'Fɩɔn ɩla leen, ɔ ya 'lɛ ‑laagɔnɩkplaa 'cɩɩnwlʋlʋ, ɔ ya 'lɛ gɔlʋʋn 'tɔ 'nyɩ ɔya Plisii ɩya Akilasɩ ya 'lɛ Siliibhlɩa 'kʋ mʋ. Ɔla ‑ndanyɩtalɩɛa 'la gbʋ na, ma ya Pɔlʋ 'la 'nyɩa ‑sa 'yɛpɩ 'dua ma la 'lɛ Sanklee na. 19Na, ma mʋ 'lɛ 'nyɩ ma ŋeni 'lɛ 'dua ma la 'lɛ Efɛzɩ na, Pɔlʋ ya Akilasɩ ɩya Plisili 'cɩɩnwlʋlʋ. Ɔ ya bhibhiepalʋa* ‑zɔn ble 'nyɩ ɔya Zifʋnyaa* ‑ɔ ‑kʋa 'lɛ 'yɛpɩ na ya wɔɔnyɩtʋ 'tɩtɔ. 20Maa ‑naa yɔɔ 'clalɩ le ɔ ‑kʋ maa cɩ clɩɩ ‑zlʋsaasa, ‑ma ɔ 'ta ŋonu. 21Na, ɔ 'kaa 'lɛ maa 'cɩɩnwlʋlʋ na, ɔ ya maa 'cla lebhe: «Gbazɩ Laagɔ ‑ka ŋonu na, n cɩ 'ka ‑awlɛ anyɩ 'ciinlɩkan ci.» Ɔ ya Efɛzɩ gɔlʋʋn 'tɔ, ɔ ya 'nyɩkʋtaan 'plɩlɩ, 22ɔ ya Sezalee 'pɛ, ɔ ya kwli, ɔ ya 'yɛpɩ 'la ‑laagɔnɩkplaa ‑ayo 'pa 'nyɩ ɔ ya Antɩɔsʋ mʋ. 23Ɔ ya dɩpɩa clɩɩ ‑zlʋsaasa li. 'Nyɩ ɩla leen, ɔ ya ‑awlɛ mʋ, ɔ ya Galasii ɩya Fliziibhlɩa 'kʋ 'plɩlɩ 'nyɩ ɔ zʋa gɩlɩnyaa* 'fɩan 'tɛtɩɩn le mala pɔɔtɛtɛa 'kaa 'kʋ zʋlʋ.

Apolɔsʋ ya Efɛzɩnyaa ɩya Kolɛntɩnyaa plici

24Na, 'dɛ 'la clɩɩa nɩkplaan, Zifʋnyɔ* bhlo ya Efɛzɩdua 'kʋ ci. Ma laa 'mɔɔ Apolɔsʋ, 'nyɩ ɔ ‑glɩa 'dua ma la 'lɛ Alɛzandlii na 'kʋ 'la ‑dʋdʋvalɩnyɔ. Ɔ ‑cia wɔɔnyɩtɛsa 'nyɩ ɔ ‑cia 'lɛ Zieziewɔlɩa* ‑gbɔɔn. 25Ma yɔɔ ‑Kwlenyɔa 'la ‑gugwiea 'la wɔlɩa ca. Ɔ via ‑nwɔ, ɔ plicia 'nyɩ ɔ caa 'lɛ Zozii 'la cɩa wɔlɩa ‑nʋawlɛ nɩkplaan. 'Bhlɩmɔɔn Zaan 'la 'nyua ɔ zʋa 'lɛ ncɛlɩ 'wlu na 'la cɩa wɔlɩa ‑tɛɛ ɔ ‑cia 'lɛ. 26Na, pɔɔtɛtɛ nɩkplaan, ɔ ya bhibhiepalʋa* ‑zɔn nyɩtɛlɩɛ bhɔ. ‑Ma, da Plisii ɩya Akilasɩ 'nuo 'lɛ neen na, ma yɔɔ 'ma, ma yɔɔ ma 'bhisleen famʋ 'nyɩ ma yɔɔ ‑awlɛ Laagɔ 'la ‑gugwiea 'la wɔlɩa 'nanɩ ‑zɔn ‑sa 'nyɩ ma yɔɔ pala. 27Ɩmɩ ‑naa 'la leen, ɔ ya wabha lebhe ɔ 'kaa 'bhlɩa ma la 'lɛ Akayii na 'kʋ mʋ. Bholiecɩa yɔɔ 'tɛtɩɩn zʋ 'nyɩ ma ya gɩlɩnyaa* ‑ɔ ‑kʋa 'lɛ 'yɛpɩ na ‑afluwaa zie le ma klɔɔ 'nanɩ. Ɩla leen, ɔ mʋ 'lɛ 'nyɩ ɔ ŋeni 'lɛ 'yɛpɩ na, ɔ ya Laagɔ 'la klalɩɛ nɩkplaan pɔɔtɛtɩkalɩnyaa klalɩ ‑gbɔɔn. 28Ɔya Zifʋnyaa 'tɩtɔa wɔlɩ ncɛlɩa 'fɩan 'ci 'kʋ, 'nyɩ ɔ 'plɩlɩa Zieziewɔlɩa kʋ 'nyɩ ɔ palaa maa lebhe Zozii ‑glɩ 'lɛ Laagɔ 'la ‑Sasanyɔa*. Ɩ gba na, ɔla wɔlɩ ‑sɩa maa.

Currently Selected:

Lobh 18: NTLD13

Highlight

Copy