Lobh 17

Pɔlʋ ɩya Silasɩ ya Tesaloniki mʋ

1Pɔlʋ ɩya Silasɩ ya 'dia ma la 'lɛ Anfipolii ɩya Apolonii na 'kʋ 'plɩlɩ 'nyɩ ma ya 'lɛ 'dua ma la 'lɛ Tesaloniki na 'kʋ ŋeni. Zifʋnyaa* ‑kaa 'yɛpɩ mala bhibhiepalʋ*. 2Na, Pɔlʋ ya mʋ 'nyɩ ɔ ya maa 'yɛpɩ ŋeni, saa ɔ ‑ka 'lɛ 'du 'kʋ mʋ 'nyɩ ɔ nʋ ‑azla 'lɛ na. Nyɔkwɛclɩɩ* ‑mɔta ‑gbaaglɩɩn, ɔya maasɔ ya nyɩtɛ. Ɔ kopea Zieziewɔlɩa* nɩkplaan, 3ɔ saa 'mɩɩ maa ‑zɔn 'nyɩ ɔ palaa maa lebhe Laagɔ 'la ‑Sasanyɔa*, 'kwlɩ cɩ 'kaa 'mɔɔ bhɩa, ɔ 'kaa 'ku, ɩya ɔ 'kaa 'kwɩɩnkʋbho. Ɔ claa maa lebhe: «Zozii ‑naa 'la wɔlɩa n solu 'lɛ anyɩ na, ɔmɔ ‑glɩ 'lɛ Laagɔ 'la ‑Sasanyɔa.» 4Zifʋnyaa ‑anʋa ya ɩmɩa Pɔlʋ nyɩtɛa 'lɛ na ‑nʋawlɛ la 'nyɩ ma ‑ya Pɔlʋ ɩya Silasɩ ya ‑plɔ. 'Sɛtɛɛ bhlogbɩɩ, Glɛkɩnya ‑bhutukpa ‑ɔ gʋgwla 'lɛ Laagɔ na ɩya 'ŋlɩkalɩŋwlɛ ‑bhutukpa ‑masɛ ‑ya maasɔ ya 'lɛ ‑plɔ.

5‑Ma -daa Zifʋnyaa, woze ‑kʋa 'lɛ nɩkplaan na, ma ya yooyo ncɛlɩa ‑ɔ 'kʋa 'lɛ 'clikpua nɩkplaan na 'ma 'nyɩ ma ya macɩ 'kʋgbɛ. Ma ya ‑alawleea gbɩ zʋ 'nyɩ ma ya ‑wuyuwuyu 'dua nɩkplaan ‑lamʋ. Na, ma yaa nclɔɔa ma laa 'lɛ Zasɔɔn na 'bhisleen 'wluwlalɩ le ma 'kaa Pɔlʋ ɩya Silasɩ 'kʋbhli ɩya ma 'kaa maa dunyaa fa. 6‑Ma, ma 'ta 'lɛ maa 'lɩ na, ma ya Zasɔɔn ɩya Laagɔpaaya ‑zlʋsaasa 'kʋbhli 'nyɩ ma ya maa 'dua 'la 'tɩtɩplanyaa ‑deliin fa. Ma ‑gaa nɩkplaan 'nyɩ ma claa lebhe: «Ncɛlɩ ‑naa ‑ɔ ya 'lɛ 'bhlɩa ‑tɛtɛa gblogblolu na ‑kʋnɩ ‑pɔtɔnʋ ‑wɔlʋ. 7'Nyɩ Zasɔɔn ya maa 'kʋplada zʋ! Ncɛlɩ ‑naa 'plɩlɩ 'ta nyɩbhɛlʋ Sezalɩ 'la ‑jlɩmaa 'kʋ. Ma nabhe ‑buun ‑kwleto bhlo ‑kʋ, ma lɔɔ Zozii.» 8Na, 'kasɛ ‑naa ya ‑alawleea ɩya 'dua 'la 'tɩtɩplanyaa 'dɩdɔ. 9Ɩla gbʋ na, ma ya Zasɔɔn ɩya ‑da -naanʋaa dlu 'dɩ 'fɩɔn ɩya ma 'kaa maa 'cintalɩ.

Beleenyaa ya Pɔlʋ ɩya Silasɩ 'nanɩ kla

10Na, 'ylʋ bhli 'lɛ na, ‑laagɔnɩkplaa ya gba 'nyɩ Pɔlʋ ɩya Silasɩ ya 'dua ma la 'lɛ Belee na mʋ. Ma ŋeni 'lɛ 'yɛpɩ na, ma ya Zifʋnyaa 'la bhibhiepalʋa* ‑zɔn ble. 11Duu ‑naa 'kʋ 'la Zifʋnya* 'la gbɩ nanɩa ɩ zia Tesalonikidua 'kʋ ‑naanʋa 'kʋ. Ma ya ŋonu, ma ya wɔɔnyɩtʋa 'ma, pɔlɛ bhloon, 'nyɩ clɩɩa 'fɩan, ma kopea Zieziewɔlɩa nɩkplaan le ma 'ka 'lɩ ɩ ‑ka ‑kʋ lebhe wɔlɩa ‑ɩ ‑zieo 'lɛ 'yɛpɩ na, ɩya ɩmɩa Pɔlʋ ɩya Sɩlasɩ solua 'lɛ maa na, ɩ ‑glɩa bhlo na. 12Na, maa nɩkplaan ‑bhutukpa ya pɔɔtɛtɩkalɩnya 'plɩ ɩya 'ŋlɩkalɩŋwlɛ ɩya 'ŋlɩkalɩnya ‑bhutukpa ‑ɔ ‑glɩa 'lɛ Glɛkɩnya na ‑masɛ.

13‑Ma, Tesalonikidua 'kʋ 'la Zifʋnyaa 'nu 'lɛ lebhe Pɔlʋ ‑kʋa Belee 'nyɩ ɔ nyɩtɛlɩmʋa 'yɛpɩ Laagɔ 'la wɔɔnyɩtʋa na, ma ya 'kʋbho 'nyɩ ma ya 'yɛpɩ mʋ. Ma ya 'yɛpɩ ‑masɛ ncɛlɩ gbɩ zʋ 'nyɩ ma ya 'dua gblogblolu. 14Na, dɩpɩa bhlogbɩɩ ‑laagɔnɩkplaa ya gba Pɔlʋ ya gɔlʋʋn 'tɔ, ‑ma Silasɩ ɩya Timoti ya dɩpɩa ‑to. 15Maa ‑ɔ faa 'lɛ Pɔlʋ na ‑yɔɔsɔ ya mʋ ‑aan 'nyɩ ma ya dua ma la 'lɛ Atɛnɩ na, 'kʋ ŋeni 'nyɩ ma ya cɔlɔ. Ɔ ya maa 'cla lebhe ma 'cla Silasɩ ɩya Timoti lebhe ma ŋenio cɩ 'faanfan.

Pɔlʋ ɩya Atɛnɩnyaa nyɩtɛ

16Na, Pɔlʋ ‑kʋa Atɛnɩdua nɩkplaan, ɔ ‑bɛa Silasɩ ɩya Timoti. Ɔ 'lɩ 'lɛ lebhe tɛlɩtɛlɩlɩɩ ‑bhutukpa ‑kʋa duu ‑naa nɩkplaan na, ɔ ya ‑cʋʋ 'plɩ. 17Na, clɩɩa ‑tɛtɛa, ɔya Zifʋnyaa* ɩya maa ‑ɔ 'ta 'lɛ Zifʋnya ‑glɩ 'nyɩ ‑ɔ gʋgwlaa 'lɛ Laagɔ na 'tɩtɔa Laagɔ 'la wɔlɩa. 'Nyɩ 'clikpua nɩkplaan, ɔ ‑ya ncaatʋtʋʋntʋa -ɔ ‑yɔɔsɔ 'cɩlɩa 'lɛ 'wlu na, ɔ nʋa sɛɛ bhlogbɩɩ. 18Na, wɔɔcibhlilinyaa ‑masɛ, ma ya Pɔlʋ 'tɩtɔa wɔlɩ. Ma ‑glɩa wɔɔcibhlilinyaa ma laa 'lɛ Epicluu#17.18 Epicluu nabhe ‑laagɔzɔan ‑kʋ ’lɛ ’kpɔkpɔ na, ɔ ‑wa lebhe ncɛlɩ nʋ saa ’fɩan ɩya ma ’ka pɔlɛkʋmɛnɔ ’lɩ. ɩya Zenɔɔn#17.18 Zenɔɔn, nabhe ‑laagɔzɔan ’ta ’kpɔkpɔ ‑kʋ, ‑ma ɩ ‑ka ɩla ‑jlɩmaa. Na, ɔ ‑wa lebhe ɔ ’ka ‑jlɩmaa ‑naa cibhlili ɩya ɔ ’kaa ’kʋplɩlɩ. na 'la gɩlɩnya. Ncɛlɩ ‑naa, ‑anʋa claa lebhe: «'Ndaa dlɛdlʋ bha?» 'Nyɩ ‑da -naanʋaa claa 'lɛ lebhe: «Lowlubhlɩ 'kʋ 'la ‑zliia 'la nekʋnyɩtɛnyɔ ɔ cɩ sɛ 'lɛ 'plɩ.» Zozii ɩya 'kwɩɩnkʋbhue 'la wɔlɩ Pɔlʋ plicia 'lɛ maa.#17.18 Daa ma ’nu ’lɛ «’kwɩɩnkʋbhue» na, ɩ ‑kʋa maa ’ciin lebhe ‑zlee ’la ’ŋlɩ. Dɛ ma cla ’lɛ lebhe Pɔlʋ ‑glɩ lowlibhlɩ bhlo ’kʋ ’la ‑zlee bhlo ’la nekʋnyɩtɛnyɔ. 19Na, ma ya Pɔlʋ 'ma 'nyɩ ma ‑yɔɔsɔ ya 'dua 'la 'kike bhlo 'wlu ‑gblaa. 'Kike ‑naa 'wlu, 'yɛpɩ ma nyɩtɛlɩa 'lɛ 'dua 'la wɔlɩa ‑tɛtɛa 'nyɩ ma claa 'mɔɔ neen lebhe: «Wɔɔleli ‑naa ‑n ca 'lɛ na, ‑n cɩ mino, ‑n cɩ ‑anyɩ ɩla cɩa wɔlɩ solu bha? 20Sa, wɔlɩa ‑n solu 'lɛ anyɩ na, ɩ sla nikpoo. Na, ‑a ‑wa lebhe ‑a 'kɩɩ ‑zɔn 'nu.» 21Atɛnɩdua 'kʋ 'la ncɛlɩa ɩya lowiea 'fɩan ‑ɔ 'kʋa 'lɛ 'yɛpɩ na ‑waa wɔɔlelia ‑ɩ 'wlʋ 'lɛ ‑zɔn na, nyɩtɛlɩɛ ‑aana 'nyukwliinpolɩɛ.

22Na, Pɔlʋ ya 'kʋbho, ɔ ya ‑jleea sidiin 'nylugo 'nyɩ ɔ ya 'cla lebhe: «Atɛnɩnyanyɩ, saa 'fɩan nɩkplaan, n 'lɩ lebhe a ‑glɩ gʋgwlanya 'kadɩ. 23Sa, n ‑ka ala 'dua bhlida 'kʋ na, 'na 'cia bhlili ‑azla 'ala lɩɩa a gʋgwla 'lɛ na 'kʋ. 'Nyɩ n ya gʋgwlagbatɩ bhlo 'lɩ, ma ‑zie dɩpɩa: ‑Buun -laagɔ bhlo, ‑a 'ta 'lɛ ‑ci na. Na, lʋʋa a gʋgwla 'lɛ 'nyɩ a 'ta 'lɛ ‑cia na, ʋmʋ n ci 'lɛ anyɩ palakan. 24Laagɔ ‑ɔ nʋ 'lɛ 'pʋpʋa 'kʋ ɩya lɩɩa 'fɩan ‑ɩ ‑kʋ 'lɛ 'yɛpɩ na, ɔmɔa ‑ɔ ‑glɩ 'lɛ ‑laagɔɔn ɩya ‑dʋdʋa 'la ‑Kwlenyɔ na, ɔ 'ta ncɛlɩ 'la wlɩɩn 'la 'slaslapalɩ ‑zɔn ‑kʋ. 25'Nyɩ 'ɔ 'matɩ 'ta ‑awlɛ ncɛlɩ 'la klalɩlɩɛ le saa ɔ ‑miea 'lɛ lʋʋ na. Ɔmɔ ‑ɔ nyɩ 'lɛ ncɛlɩa ‑tɛtɛa jabhʋ, ‑sasanyɔmʋ ɩya lɩɩa 'fɩan.

26Na, ɔ ya nclɔɔ nʋ 'nyɩ 'lɔlɩa ‑tɛtɛa ya 'lɛ nclɔɔ ‑naa nɩkplaan 'wlʋlʋ 'nyɩ ɩ ‑dloluo 'lɛ ‑laagɔzɔn bhuoa. Ɔ ya clɩɩ zʋ 'nyɩ ɔ ya 'lɛ ncɛlɩ 'la 'bhlɩa 'kʋa ma ‑kʋ 'lɛ na, ‑bɔlɔ zʋ.

27Ka ɔ nʋ 'lɛ sɛɛ le ma 'kaa 'mɔɔ 'matɩ. Ma ‑ka ‑dandan nʋ ‑aan na, ma 'ka sɛa 'mɔɔ 'lɩ, ‑masa ‑ɔ 'ta ‑anyɩa 'fɩan nclɔɔ nclɔɔ cɩ da tlʋ na.

28Sa, ɔmɔ gba 'lɛ 'nyɩ ‑a 'lɩ 'lɛ jabhʋa, ‑a namʋ 'lɛ 'nyɩ ‑a ‑kʋ 'lɛ. Ɩmɩ 'ala zienya ‑anʋa 'bhli 'lɛ 'kʋ lebhe: Ɔla valɩnɩkplaa 'la ncɛlɩ ‑a ‑glɩ 'lɛ.

29Na, ‑a ‑glɩ 'lɛ Laagɔ 'la 'cuoa na, ‑a 'la gugua lebhe ka Laagɔa ‑kʋ 'lɛ le ‑asɩkɛ, 'dala 'pɔpʋa ‑aana 'pɛlʋtɛtʋcokwiea nclɔɔ ma 'lɛ ɔla wɔɔgʋgwie ‑aana ‑nɛnɛ 'nyɩ ɔ nʋ 'lɛ na. 30Na, Laagɔ bu 'tanɩ mala ‑godogodo 'bhlɛsʋa nɩkplaan 'la nʋnʋgbɩa ‑ɩ 'nyɩ taa 'mɔɔ 'lɛ 'klʋ na. ‑Ma, ka ɔ lanɩ 'lɛ ‑pɔtɔnʋ ‑dʋdʋa 'kʋ 'la ncɛlɩa 'fɩan le ma cala kwla. 31‑Ofi lebhe ɔ ya clɩɩ zʋ, ɔ cɩ 'ka 'lɛ 'ma, ɔ 'ka nclɔɔa ɔ sla 'lɛ de na 'kʋplɩlɩ, ɩya 'kʋnylugolulɩɛ nɩkplaan, ɔ 'ka ‑laagɔzɔn bhuoa 'tɩtɩpla na. Ɔ yɔɔ 'kwɩɩnkʋbho le ncɛlɩa 'fɩan 'ka cibhlilibhe le ɩ cɩ 'ka 'kʋglalɩ.»

32Daa ma 'nu 'lɛ lebhe Pɔlʋ nyɩtɛa 'kwɩɩnkʋbhue 'la cɩa wɔlɩ na, ‑anʋa nyanɩa 'mɔɔ 'nyɩ ‑buun -naanʋa claa 'mɔɔ 'lɛ lebhe: «‑Buun clɩɩ 'kʋ 'nyɩ ‑n cɩ ‑awlɛ ‑anyɩ wɔlɩ ‑naa solu.» 33‑Sa Pɔlʋ 'wlʋlʋ 'lɛ maa cɩɩn. 34'Bhlɩmɔɔn, ncɛlɩ ‑anʋa ‑ya Pɔlʋ yaa ‑plɔ 'nyɩ ma ya pɔɔtɛtɩkalɩnya 'plɩ. Na, 'lɩka maa nɩkplaan 'la ncɛlɩ ‑zlʋsaasa 'la 'ŋlɩ: Ma laa bhlo Denii. Ɔmɔ ‑naa, ɔ ‑glɩmʋa mala 'tɩtɩplanyaa 'la nɩkplaan bhlo, ma laa 'ŋlɔ bhlo Damalisi ɩya ‑daa ncɛlɩ ‑anʋa ‑awlɛ.

Currently Selected:

Lobh 17: NTLD13

Highlight

Copy