Lobh 16

Timoti ya Pɔlʋ ɩya Silasɩ fa

1Pɔlʋ ya Dɛlɩbeedua 'kʋ ŋeni 'nyɩ ɔ ya 'dɛ 'wlʋ, ɔ ya 'dua ma la 'lɛ Lisli na 'kʋ mʋ. Gɩlɩnyɔ* bhlo ‑kʋa duu ‑naa nɩkplaan, ma laa 'mɔɔ Timoti. Ɔ 'nɔ ‑glɩa Zifʋŋlɔa* ‑ɔ ‑kaa 'lɛ Zozii 'la pɔɔtɛtɛ na, 'nyɩ ɔ to ‑glɩa 'lɛ Glɛkɩnyɔ. 2‑A bholiecɩa -ɔ ‑kʋa 'lɛ Lisli ɩya Ikonɩɔmʋ na nyɩtɛa ɔla wɔɔnanɩ. 3Pɔlʋ ‑waa lebhe ɔ 'kaa 'mɔɔ famʋ. Na, ɔ yɔɔ 'ma 'nyɩ ɔ ya gba ma yɔɔ 'kʋ 'dɩ, Zifʋnyaa ‑ɔ ‑kʋa 'lɛ 'dɛ 'la 'bhlɩa 'kʋ na 'la gbʋ. Sa, maa 'fɩan ‑cia sɛɛ lebhe ɔ to ‑glɩa Glɛkɩnyɔ na. 4Saa ma 'plɩa 'lɛ 'dia 'kʋ na, sɛ Pɔlʋ ɩya Silasɩ solua 'lɛ ‑laagɔnɩkplaa wɔlɩa Lobhulobhunyaa* ɩya Zolizalɛmʋ 'la ncaakpasɩa zʋa 'lɛ kpo 'kʋ 'nyɩ ma claa 'lɛ maa lebhe ma 'plɩlɩa 'mɩɩ 'kʋ na. 5Na, ‑laagɔnɩkplaa 'la ncɛlɩa 'la pɔɔtɛtɛa zʋlʋa 'kʋ 'nyɩ mala zuloa zʋlʋa 'kʋ clɩɩa ‑tɛtɛa.

Ma ya Pɔlʋ Masedʋanɩbhlɩa 'kʋ la

6Pɔlʋ ɩya Silasɩ ya Flizi ɩya Galasiibhlɩa 'kʋ 'plɩlɩ, sa ‑Kplɔkplɔ ‑Wugoa* 'ta maa ‑jioli 'nyɩ le ma nyɩtɛ Laagɔ 'la wɔlɩa Aziibhlɩa 'kʋ. 7Na, ma mʋ 'lɛ 'nyɩ ma mɛ 'lɛ Misiibhlɩa cɩ na, ma ya wabha lebhe ma 'kaa Bitiniibhlɩa 'kʋ ŋeni. ‑Ma Zozii 'la 'Wugoa ya maa pala lebhe ma cɩ 'taa 'yɛpɩ mʋ. 8Na, ma ya Misiibhlɩa 'ŋatɩ 'nyɩ ma ya Tlʋasɩdua 'kʋ kwli. 9Dobhe bhlo, Pɔlʋ ya Masedʋanɩnyɔ bhlo 'claawluun 'lɩ, ɔ 'nylugoa, ɔ bhibhiea 'mɔɔ 'nyɩ ɔ clɔɔ lebhe: «'Maa 'plɩlɩ Masedʋanɩbhlɩa 'kʋ ɩya ci ‑anyɩ 'kʋ!» 10Na, pɔlʋ 'lɩ 'lɛ wɔlɩ ‑naa na, 'kplookʋ ‑a ya 'matɩ lebhe ‑a 'kaa Masedʋanɩ mʋ, sa ‑a ‑kaa pɔɔtɛtɛ lebhe Laagɔ laa 'lɛ ‑anyɩ le ‑a 'kaa 'yɛpɩ 'la ncɛlɩa Dɩnanɩa* ‑sa.

Lidii ‑zʋɔ ɔla pɔɔtɛtɛa ‑Kwlenyɔa 'kʋ

11Na, ‑a ya Tlʋasɩdua 'kʋ gɔlʋʋn 'tɔ, ‑a ya 'nyɩ 'kʋtaan 'plɩlɩ 'nyɩ ‑a ya 'lekpoa 'kʋ la 'dua ma la 'lɛ Samotlasɩ na 'kʋ mʋ. ‑Zeli ze 'lɛ na, ‑a ya dɩpɩa 'wlʋ, a ya 'dua ma la 'lɛ Neapolii na 'kʋ mʋ. 12‑A ya 'dɛ 'wlʋ, 'nyɩ ‑a ya 'lɛ 'dua ma la 'lɛ Filipʋ na 'kʋ mʋ. Duu ‑naa ‑glɩ Masedʋanɩbhlɩa 'kʋ 'la ‑bɛkadu 'kadie 'nyɩ ʋ ‑kʋa Wlɔmʋnya 'la ‑kwlelie ‑zɔn. ‑A ya duu naa nɩkplaan clɩɩ ‑zlʋsaasa li. 13Nyɔkwɛclɩɩ* bhlo 'kʋ, ‑a ya 'dua nɩkplaan 'wlʋ 'nyɩ ‑a ya 'nyidɔlʋ bhlo cɩ mʋ, daa ‑a gugua 'lɛ lebhe ‑a cɩa bhibhiepalʋ* 'lɩlɩ na. ‑A ya sakʋ 'nyɩ ‑a ya 'ŋwlɛa ‑ɔ cia 'lɛ dɩpɩa na solu.

14Na, maa nɩkplaan bhlo, ma laa 'mɔɔ Lidii. Ɔ 'wlʋlʋa 'dua ma la 'lɛ Tiatili na 'kʋ. Ɔ ‑glɩa 'pɛlʋtɛtʋlokuzalɩ 'la 'pɛlʋzʋŋlɔ 'nyɩ ɔ gʋgwlaa 'lɛ Laagɔ. Na, ‑Kwlenyɔa yaa ɔla wɔɔgugwiea 'gbo kalɩ le ɔ 'kaa Pɔlʋ 'la wɔɔnyɩtʋa 'nanɩ 'nyukwliinpo. 15Na, daa ma zʋ 'lɛ ɔya ɔla 'slinyaa 'nyu 'wlu na, ɔ ya ‑anyɩ 'cla lebhe: «A ya 'lɛ 'lɩ lebhe n ya ‑zaagbʋsa 'na pɔɔtɛtɛa ‑Kwlenyɔ 'kʋ zʋ na, 'dɛndlana a ci ɩya a 'ka n 'bhisleen kʋ.» Ɔ ya ‑anyɩ nyɔmʋ cɩ 'palɩ ‑aan 'nyɩ ‑a ya 'lɛ ŋonu.

Ma ya Pɔlʋ ɩya Silasɩ ‑palʋʋn 'pa

16Na, clɩɩ bhlo, daa ‑a kʋa 'lɛ bhibhiedaa mʋda na, ŋlʋgbɩɔ bhlo, ɔ ‑glɩa 'lɛ lobhoco na ya ‑anyɩ 'bɩɩncili. 'Wugo bhlo ‑kʋa ŋlʋgbɩɔ ‑naa nɩkplaan, ɩ gba na ɔ paa masɩ 'nyɩ ɔla canyaa 'plɩlɩa 'mɔɔ 'kʋ 'nyɩ ma lɩa 'dala ‑bhutukpa. 17Ɔ gɩlɩa Pɔlʋ ɩya ‑anyɩ ‑daa ‑tɛtɛa, ɔ ‑gaa nɩkplaan 'nyɩ ɔ claa lebhe: «Ncɛlɩ ‑naa ‑glɩ 'Kʋzilo Laagɔa 'la lobhocuo! Ka ma ci 'lɛ ɩya ma 'ka anyɩ gbʋʋnsalɩɛ 'la ‑gugwiea pala.» 18Ɔ nʋa sɛɛ clɩɩa 'fɩan. ‑Ma clɩɩ bhlo, Pɔlʋ dɔgbɛ yɔɔ pla, ɔ ya leen kwlacala 'nyɩ ɔ ya 'wugoa 'cla lebhe: «Zozi Klisi 'la 'ŋlɩa nɩkplaan, n kpɛɔ 'kʋ le ‑n 'wlʋ ŋlɔ ‑naa nɩkplaan!» 'Nyɩ dɩpɩa bhlogbɩɩ, 'wugoa ya ‑zɔnwlʋ. 19Na, 'ŋlɔ ‑naa tocɩa lɩa 'lɛ lebhe 'ɔ cɩ 'taanɩa maa lʋʋ bhlogbɩɩ 'nyɩ na, ma ya Pɔlʋ ɩya Silasɩ 'kʋbhli 'nyɩ ma ya maa 'clikpoa nɩkplaan, 'dutocɩa ‑deliin fa. 20Ma ya 'tɩtɩplanyaa 'cla lebhe: «Ncɛlɩ ‑naa nyumo ‑ala 'dua: Ma ‑glɩ Zifʋnya*, 21'nyɩ ma ca nʋnʋgbɩa ‑anyɩ Wlɔmʋnyaa, ala ‑jlɩmaa tie 'lɛ ‑anyɩ le ‑a 'la 'maa naa, a 'la gɩlɩa na.» 22‑Alawleea ya Pɔlʋ ɩya Silasɩ 'wlugblolu. 'Nyɩ 'tɩtɩplanyaa ya gba, ma ya maa loku cɩ ‑sa 'nyɩ ma ya ‑jioli 'nyɩ le ma 'ma pa ɩya ma bhutili maa. 23Ma bhuti 'lɛ maa 'nyɩ ma bhɩalɩ 'lɛ na, ma ya maa ‑palʋʋn 'pa. 'Nyɩ ma ya ‑palʋa 'la ‑bɛnyɔa 'kʋkpɛ le ɔ 'lɩ maa 'klʋ 'nanɩ. 24Na, ‑palʋa 'la ‑bɛnyɔa ya ɩmɩa ma soluo 'lɛ lebhe ɔ nʋ na 'kʋplɩlɩ: Ɔ ya maa ‑palʋa ‑ʋ 'kʋ 'lɛ ʋcɩɩn na ‑zɔn 'pa 'nyɩ ɔ ya mala bhɩa 'kpomuun zʋ.

25Na, dɩdɩnandɩ 'la 'klia nɩkplaan, Pɔlʋ ɩya Silasɩ bhibhiea, ma bhlɩa 'lʋ, ma woa Laagɔ ‑evli 'nyɩ ‑daa ‑palʋʋnpapanyaa poa 'lɛ maa 'nyukwliin. 26'Kplookʋ, ‑dʋdʋa ya tɩtɛlɩ 'nyɩ ‑palʋa 'la ‑gbidia ya 'dɩdɔ. Dɩpɩa bhlogbɩɩ ‑palʋa 'la gbinia ya ‑kalɩ 'nyɩ ‑palʋʋnpapanyaa 'fɩan 'la 'kpomua ya maa bhɩɩn 'wlʋ. 27‑Palʋa 'la ‑bɛnyɔa galɔ 'lɛ, 'nyɩ ɔ 'lɩ 'lɛ le gbinia ‑kalɩɔ na, ɔ ya gugu lebhe ‑palʋʋnpapanyaa yaa 'gu. Na, ɔ ya ɔla ‑banjlɛtɩa 'ma le ɔ 'kaa ɔcɩ 'bhla. 28‑Ma Pɔlʋ yaan ‑gaa 'nyɩ ɔ yɔɔ 'cla lebhe: «‑Naa 'bhlaa ‑ncɩ! ‑Ma ‑anyɩa 'fɩan ‑a ‑kʋ ‑da.» 29Na, ‑palʋa 'la ‑bɛnyɔa ya ‑kanie 'clalɩ, ɔ ya ‑palʋa ‑zɔn ble sɔmɩsɔmɩɩn, 'ɔ ‑lɩɩbhuoa tɩtɛlɩa 'nyɩ ɔ ya Pɔlʋ ɩya Silasɩ ‑deliin ‑kukoonkplii sasla. 30Ɩla leen, ɔ ya maa ‑palʋa ‑zɔnsa 'nyɩ ɔ ya maa neencla lebhe: «N tocɩnyɩ, 'nsasa n cɩ 'kaa 'lɛ nʋnʋnʋ ɩya n 'kaa 'lɛ gbʋʋnsalɩɛ 'lɩ bha?» 31‑Ma yɔɔ neenŋonu lebhe: «Zʋ ‑naa pɔɔtɛtɛa ‑Kwlenyɔ Zozii 'kʋ, ‑ma ‑n ‑ya ‑naa 'slinyaa cɩ gbʋʋnsalɩɛ 'lɩ.» 32Na, Pɔlʋ ɩya Silasɩ ya ɔya ncɛlɩa -ɔ ‑kʋa 'lɛ ɔ 'bhisleen na ‑Kwlenyɔ 'la wɔɔnyɩtʋa plici. 33Na, dobhesa, 'ŋwacɩa bhlogbɩɩ 'kʋ, ‑palʋa 'la ‑bɛnyɔa yaa maa 'ma 'nyɩ ɔ ya ma 'la 'jia neen wɔlʋ. 'Nyɩ dɩpɩa bhlogbɩɩ, Pɔlʋ ɩya Silasɩ ya ‑bɛnyɔa ɩya ɔla 'slinyaa 'nyuwluzʋ. 34Ɩla leen, ɔ ya Pɔlʋ ɩya Silasɩ ɔ 'bhisleen famʋ, ɔ ya maa 'tɔnblɩ sapalɩ 'nyɩ ɔmɔ ɩya ɔla 'slinyaa ya ‑pɔpʋɛ nʋ, sa ma ya mala pɔɔtɛtɛa Laagɔ 'kʋ zʋ na.

35Na, ‑zeli ze 'lɛ na, 'tɩtɩplanyaa ya mala 'sojaa lobhu le ma mʋ ɩya ma 'cla ‑palʋʋnpapalʋa 'la ‑bɛnyɔa lebhe: «'Talɩ ncɛlɩ ‑naa 'cin.» 36‑Palʋʋnpapalʋa 'la ‑bɛnyɔa ya mʋ, ɔ ya Pɔlʋ 'dɩ ‑naa ‑sa, ɔ yɔɔ 'cla lebhe: «'Tɩtɩplanyaa ya ncɛlɩ lobhu le n ‑sa anyɩ ‑palʋʋn. Na, a 'wlʋnɩ ‑zɔn ɩya a mʋnʋ pupueen!» 37‑Ma Pɔlʋ ya 'cla lebhe: «Ma ya gba ma ‑anyɩ ncɛlɩa 'fɩan 'ci 'kʋ bhutili, ma 'ta ‑anyɩ 'tɩtɩpla, ‑anyɩa ‑ɔ ‑glɩ 'lɛ Wlɔmʋnya 'nyɩ ‑ɔ ‑glɩ 'lɛ ‑ncɩkalɩnya na, ma ya ‑anyɩ ‑palʋʋn 'pa. 'Nyɩ ‑pɔtɔnʋ, ma 'matɩnɩ lebhe ma 'ka anyɩ ziziekoteen ‑palʋʋn ‑salɩ bha? Ɩ cɩ 'ta sɛɛ 'plɩ. 'Naa maa 'titi ci ɩya ma 'ka ‑anyɩ 'cintalɩ!» 38'Sojaa ya mʋ 'nyɩ ma ya 'tɩtɩplanyaa dɩɩ ‑naa ‑sa. Ma 'nu 'lɛ lebhe Pɔlʋ ɩya Silasɩ ‑glɩ Wlɔmʋ 'la ‑ncɩkalɩnya na, ŋanɔ yaa maa pla. 39Na, ma ya ci 'nyɩ ma ya 'wlusla. Ɩla leen, ma ya maa 'cintalɩ 'nyɩ ma ya maa 'cla lebhe ma 'wlʋ 'dua nɩkplaan. 40Na, Pɔlʋ ɩya Silasɩ ya ‑palʋa ‑zɔnwlʋ, ma ya Lidii 'bhisleen mʋ, ma ya ma bholiecɩa 'ciinlɩ, ma ya maa 'tɛtɩɩn zʋ 'nyɩ ma ya mʋ.

Currently Selected:

Lobh 16: NTLD13

Highlight

Copy