Lobh 15

Gɩlɩnyaa 'tɩtɔ wɔlɩ

1Na, ncɛlɩ ‑anʋa ya Zudeebhlɩa 'kʋ 'wlʋlʋ. Ma caa Klisi 'la gɩlɩnyaa* ‑ɔ ‑kʋ 'lɛ Antɩɔsʋdua 'kʋ na lebhe ɩ ‑ka ‑kʋ lebhe ma 'ta gba ɩya ma 'ka maa 'kʋ 'dɩ, saa Moyizi 'la ‑jlɩmaa bhli 'lɛ 'kʋ na, maa cɩ 'ta gbʋʋnsalɩɛ 'lɩ. 2Wɔlɩ ‑naa ya wɔɔtɩtʋɛ ‑lamʋ 'nyɩ dlɛdlʋ ya Pɔlʋ ‑ya Banabasɩ ɩya ncɛlɩ ‑naa ‑gbaaglɩɩn bhli. Na, ma ya wɔlɩ kpo 'kʋ zʋ lebhe Pɔlʋ, Banabasɩ ɩya ncɛlɩ ‑zlʋsaasa 'kaa Zolizalɛmʋ lobhulobhunyaa* ɩya ncaakpasɩa 'ciinlɩkan mʋ, wɔlɩ ‑naa 'la gbʋ. 3Antɩɔsʋ 'la ‑laagɔnɩkplaa ya maa tɩta 'nyɩ ma ya mʋ. Ma ya Fenisii ɩya Samaliibhlɩa 'kʋ 'plɩlɩ, ma ya 'yɛpɩ 'la ncɛlɩa saa maa ‑ɔ 'ta 'lɛ Zifʋnya* ‑glɩ na calacalalɩ 'lɛ kwla na, ɩla wɔlɩa 'dɩkʋsalɩ 'nyɩ ɩ ya gɩlɩnyaa 'fɩan pɔlɛkʋmɛnɔ nʋ.

4Daa ma ŋeni 'lɛ Zolizalɛmʋ na, ‑laagɔnɩkplaa, lobhulobhunyaa ɩya ncaakpasɩa ya maa kla, 'nyɩ ɩmɩa ‑tɛtɛa Laagɔ 'plɩlɩ 'lɛ maa 'kʋ 'nyɩ ɔ nʋ 'lɛ na, ma yɩɩ 'lɛ maa 'dɩkʋsalɩ.

Ma ya wɔlɩ kpo 'kʋ zʋ 'yɛpɩ Zolizalɛmʋ

5Gɩlɩnyaa* ‑anʋa ‑ɔ 'wlʋlʋ 'lɛ Falizɩɛnnyaa* 'la ‑kandea nɩkplaan na ya wɔɔnyɩtʋ 'ma, 'nyɩ ma ya 'cla lebhe ɩ ‑fataa lebhe ma 'dɩ maa ‑ɔ 'ta 'lɛ Zifʋnya* ‑glɩ na 'kʋ ɩya ma 'cla maa lebhe ma 'plɩlɩ Moyizi 'la ‑jlɩmaa 'kʋ. 6Na, lobhulobhunyaa* ɩya ncaakpasɩa ya 'wluwlalɩ le ma 'ka wɔlɩ ‑naa 'ni 'matɩ.

7Wɔlɩa ma 'tɩtɔa 'lɛ na 'matɩa lebhe ɩ 'kaa dlɛdlʋ ‑lamʋ. Na, Pɩɛlɩ ya wɔɔnyɩtʋ 'ma 'nyɩ ɔ ya 'cla lebhe: «Bholiecɩnyɩ, anyɩ 'titi a ‑ci sɛɛ lebhe anyɩ sidiin Laagɔ slalɩɩn 'lɛ de bhɔdaa tooto, 'nyɩ maa ‑ɔ 'ta 'lɛ Zifʋnya ‑glɩ na yaan 'lɛ Dɩnanɩa* neen 'nunu 'nyɩ ma ya 'lɛ Zozii 'la gɩlɩnya 'plɩ. 8Laagɔ, ‑ɔ ‑ci 'lɛ nclɔɔ 'la pɔlɛ 'ciin 'la wɔlɩ na, ya mala ‑danʋfʋɛ li, 'nyɩ ‑anyɩ 'bhisa, ɔ ya 'lɛ gba 'nyɩ ma ya 'lɛ ‑Kplɔkplɔ ‑Wugoa* 'lɩ. 9Ɔ 'ta nɩkplaan gbazlɩlɩ, ‑ma mala pɔɔtɛtɛa 'kʋ ɔ 'plɩlɩ 'lɛ 'nyɩ ɔ ya 'lɛ gba mala pɔlɩa ya 'lɛ ‑kplɔ. 10Na, 'lɩsaa 'la gbʋ ‑a ‑wa 'lɛ lebhe ‑a ka gɩlɩnyaa ‑gbaakʋa ‑a tokadɔcɩ ‑aana ‑anyɩ 'titi 'ta 'lɛ bhɛlɩɛ mino na, ‑slo bha? Laagɔ ‑a ‑wa 'lɛ lebhe a 'ka vʋvʋalɩ bha? 11'Bhlɩmɔɔn, ‑a ‑ka pɔɔtɛtɛ lebhe ‑Kwlenyɔ Zozii 'la dananɔa 'la gbʋʋ ‑a 'lɩ 'lɛ gbʋʋnsalɩɛ, saa ‑tɛɛa ɩ 'plɩ 'lɛ mala gbazɔ na.»

12‑Jleea ‑tɛtɛa ya 'cɩɩ 'plɩ, 'nyɩ ma ‑poa Banabasɩ ɩya Pɔlʋ 'nyukwliin, 'nyɩ ma saa ghledɩa ɩya nikpooslaslawɔlɩa Laagɔ 'plɩlɩ 'lɛ maa 'kʋ, 'nyɩ nʋnʋ 'lɛ maa ‑ɔ 'ta 'lɛ Zifʋnya ‑glɩ na 'bhlɩ na, ɩla 'dɩa.

13Daa ma bhɩalɩ 'lɛ nyɩtɛlɩɛ na, Zakɩ#15.13 ‑N 'ta lobhulobhunyɔ Zakɩ 'la wɔlɩ ma nyɩtɛ 'ta 'lɛ ‑da, ‑ma ‑Kwlenyɔ Zozii bholi Zakɩ ‑ɔ ‑glɩa 'lɛ Zolizalɛmʋ 'la ‑laagɔnɩkplaa 'la 'kʋklʋʋnpʋnyɔa na. ‑ma ya wɔɔnyɩtʋ 'ma 'nyɩ ɔ ya 'cla lebhe: «Bholiecɩnyɩ, a poon 'nyukwliin! 14Simɔɔn ya ‑anyɩ saa bhɔdaa tooto, Laagɔ bhɔsʋa 'lɛ le ɔ 'ka maa ‑ɔ 'ta 'lɛ Zifʋnya ‑glɩ na sidiin ncɛlɩ desla ɩya ma 'ka ɔla 'lɔlʋ 'plɩ na, ɩla wɔlɩa ‑zɔn ‑sa. 15'Nyɩ wɔlɩ ‑naa ɩya Laagɔnekʋnyɩtɛnyaa* 'la wɔɔnyɩtʋa ‑glɩ bhlo, ‑masa ɩ ‑zieo lebhe:

16‑Kwlenyɔa nabhe:

Ɩmɩ ‑naa 'la leen, n cɩ 'ka ‑awlɛ ci

ɩya n 'ka Daviti 'la 'slea ‑a gbɔlʋ 'lɛ na 'sla.

N cɩ 'ka ɔla zukwia 'kʋ 'slalɩ

ɩya n 'ka 'slea 'kʋnylugolu.

17 Ɩya ‑buun ncɛlɩ 'kanɩ ‑Kwlenyɔa 'matɩ,

maya 'lɔlɩa ‑tɛtɛa ɔ la 'lɛ

le ɩ 'ka 'naanɩ 'plɩ na.

'Lɩka ɩmɩa ‑Kwlenyɔa nyɩtɛ 'lɛ na.

‑Sa ɔ glalɩ 'lɛ ɔla wɔlɩa ɔ bhɔsʋa 'lɛ na 'kʋ,

18ɩmɩa ɔ gba 'lɛ 'nyɩ bhɔdaa tooto ma cibhlili 'lɛ na.

19Na, n gugu lebhe ɩ 'ta ‑fata lebhe ma ‑bhɩa maa ‑ɔ 'ta 'lɛ Zifʋnya ‑glɩ, 'nyɩ ‑ɔ -tla 'lɛ Laagɔ 'klʋ na 'kwlɩ. 20‑Ma ‑a zie maa ɩya ‑a 'cla maa lebhe ma 'la lia lɩɩa ma ya 'lɛ ‑zlee 'ŋlɩ cɩ slalɩ na. Ma 'la lia ‑badaaglu. Ma 'la lia mlɛa ma 'ta 'lɛ ‑blɩɩn 'dɩ na ɩya ma 'la 'mla ‑dolu. 21‑Godogodoa tooto ‑aan ‑yaka, Moyizi ‑ka ka plicinya 'dia ‑tɛtɛa 'kʋ. ‑Masa nyɔkwɛclɩɩa* 'fɩan 'kʋ, ma zɛlɩ ɔla ‑jlɩmaa bhibhiepalɩa* ‑zɔn na.»

‑Afluwaa ya Zolizalɛmʋ 'wlʋlʋ

22Lobhulobhunyaa*, ncaakpasɩa ɩya ‑laagɔnɩkplaa ‑tɛtɛa ya bhlo 'plɩ, 'nyɩ ma ya wɔlɩ kpo 'kʋ zʋ le ma 'ka maa nɩkplaan ncɛlɩ desla ɩya ma 'ka maya Pɔlʋ ɩya Banabasɩ Antɩɔsʋdua 'kʋ lobhu. Na, Zudu, ma la 'lɛ Basabasɩ na, ɔya Silasɩ ma sla 'lɛ de. Ncɛlɩ ‑naa ‑mɔsɔa ‑glɩa 'klʋnya bholiecɩa sidiin. 23Ma ya ‑afluwaa zie 'nyɩ ma ya maa 'nyɩ, a cla lebhe: «‑Anyɩ lobhulobhunyaa, ncaakpasɩa ɩya a bholiecɩa 'fɩan, ‑a pa anyɩ ‑ayo, anyɩ ‑a bholiecɩa ‑ɔ 'ta 'lɛ Zifʋnya* ‑glɩ, 'nyɩ ‑ɔ ‑kʋ 'lɛ Antɩɔsʋdua 'kʋ 'yɛpɩ Silii ɩya Silisiibhlɩa 'kʋ na. 24‑A ya 'nu lebhe ncɛlɩ ya ‑anyɩ sidiin 'wlʋ, ma ya anyɩ wɔlɩ solukan mʋ le ma 'ka anyɩ pɔɔvʋ zʋ ɩya ma 'ka ala wɔɔgugwiea gblogblolu. ‑N 'ta -anyɩ ‑ɔ 'taa 'lɛ maa lobhu. 25Dɛ ‑a 'plɩ 'lɛ bhlo, ‑a ya 'lɛ ncɛlɩ desla 'nyɩ ‑a ya 'lɛ maa ‑ala gbakabhanyaa ‑ɔ ‑glɩ 'lɛ Banabasɩ ɩya Pɔlʋ na 'kʋ ‑gbɛ 'nyɩ ‑a ya 'lɛ maa lobhu. 26Ma ‑glɩ ncɛlɩa ‑ɔ ya 'lɛ macɩ ‑sa le macɩ ‑ala ‑Kwlenyɔ Zozi Klisi 'la 'ŋlɩa 'la gbʋ 'ku na. 27Na, Zudu ɩya Silasɩ ‑a lobhu 'lɛ anyɩ 'bhlɩ le ma 'ka wɔlɩa bhlogbɩɩa ‑ɩ zieo 'lɛ ‑afluwaa nɩkplaan na, 'kʋbhli ɩya ma 'ka anyɩ solu. 28‑Kplɔkplɔ ‑Wugoa* ɩya ‑anyɩ 'titi ‑masɛ ‑a ‑ya ‑acɩ 'cla lebhe a cɩ 'ta ‑awlɛ anyɩ ‑buun ‑gbaakʋ ‑slo, ɩ ‑ka ‑kʋ lebhe ‑n 'ta le ɩmɩ ‑naa ‑tɛɛa ɩ ‑kʋ 'lɛ le a nʋ 'saantiin na. 29Ɩmɩ -ɩ ‑glɩ 'lɛ lebhe a 'la lia ‑zliigʋgwlamla, mladolu, mlaa ma 'ta 'lɛ ‑blɩɩn 'dɩ na, ɩya ‑badaaglu. A ‑ka ɩmɩ ‑naa ‑tɛtɛa pɔlɛ cɩ falɩ 'nyɩ a kɩɩ nʋ na, a ya 'nanɩ nʋ. Anyɩ ‑ayoka!»

30Ma ya ncɛlɩa ma lobhu 'lɛ na, ‑gugwie 'nyɩ, ma ya 'plɩ, ma ya Antɩɔsʋdua 'kʋ mʋ 'nyɩ ma ya ‑laagɔnɩkplaa 'wluwlalɩ le ma 'kaa ‑afluwaa 'la nɩkplaan 'la wɔlɩa solu. 31Ma yaa zɛlɩ, 'nyɩ ala nɩkplaan 'la wɔlɩa ya ‑laagɔnɩkplaa pɔlɛkʋmɛnɔ nʋ, ‑ofi lebhe a ‑glɩa mala 'tɛtɩɩnzʋlɩɛ na. 32Zudu ɩya Silasɩ ‑ɔ ‑glɩa 'lɛ Laagɔnekʋnyɩtɛnya* na, ya maa wɔɔbhutukpa solu, ɩ ya maa 'tɛtɩɩn zʋ 'nyɩ mala pɔɔtɛtɛa ya 'kʋzʋlʋ. 33Ma ya dɩpɩa clɩɩ ‑zlʋsaasa li, 'nyɩ ma bholiecɩa ya maa ‑gugwie 'nyɩ, 'nyɩ ma ya maa ‑ɔ lobhua 'lɛ maa na 'bhlɩ cɔlɔ. [34]#15.34 ‑Godogodofluwia ‑anɩ ya wɔɔkle ‑naa Zieziewɔlɩa nɩkplaan ‑pla: «‑Ma ya 'cla lebhe ɔ cɩ dɩpɩa ‑to.» 35‑Ma Pɔlʋ ɩya Banabasɩ ya Antɩɔsʋdua 'kʋ ‑to. Maya ncaabhutukpa caa ncɛlɩa 'nyɩ ma saa 'lɛ ‑Kwlenyɔ 'la wɔɔnyɩtʋa 'la Dɩnanɩa*.

Pɔlʋ ɩya Banabasɩ ya cɩsasalɩ

36Na, clɩɩ ‑zlʋsaasa 'plɩ 'lɛ na, Pɔlʋ ya Banabasɩ 'cla lebhe: «‑A ka ‑a 'la 'bɩa 'kʋ cɔlɔ ɩya ‑a ka 'dia ‑tɛtɛa 'kʋa ‑a 'plɩlɩ 'lɛ 'nyɩ ‑a ya 'lɛ ‑a bholiecɩa ‑Kwlenyɔa 'la wɔɔnyɩtʋa solu na, ‑a ka maa kope. Ɩya a ka saa ma ‑kʋkʋlʋ 'lɛ na kope.» 37Banabasɩ ya wabha lebhe ma famʋa Zaan, ma laa 'lɛ Makɩ na. 38‑Ma Pɔlʋ 'ta ŋonu lebhe ɔ 'ka nclɔɔa ‑ɔ ya 'lɛ maa Panfiliibhlɩa 'kʋ tooto 'cɩɩnwlʋlʋ 'nyɩ ‑ɔ ‑ya maasɔ 'ta 'lɛ nebhlo lobholi nʋnʋ na 'namʋnyɔ cɩ 'manɩ. 39Na, ma ya cɩsasalɩ 'nyɩ nclɔɔ nclɔɔ ya ɔla da 'manɩ. Banabasɩ ya Makɩ 'ma 'nyɩ ɔ ‑yɔɔsɔ yaa Siplʋlekpoa 'kʋ mʋ. 40'Nyɩ Pɔlʋ ‑ma ya 'lɛ ɔcɩ Silasɩ 'kʋgbɛ, bholiecɩa ya 'lɛ bhibhie, ma yɔɔ 'lɛ ‑Kwlenyɔ wlɩɩn zʋ 'nyɩ ɔ ya 'lɛ mʋ.

Timoti fa Pɔlʋ ɩya Silasɩ

41Na, daa ma 'wlʋ 'lɛ dɩpɩa na, ma ya Siliibhlɩa ɩya Silisiibhlɩa 'kʋ 'plɩlɩ 'nyɩ ma ya 'lɛ 'yɛpɩ 'la ‑laagɔnɩkplaa 'tɛtɩɩn zʋ.

Currently Selected:

Lobh 15: NTLD13

Highlight

Copy