1 Zaan 3

1A kopeka saa Toa ya 'lɛ ‑anyɩ wabha, 'nyɩ ɔ ya 'lɛ gba, 'nyɩ ma la 'lɛ ‑anyɩ Laagɔ 'la 'cuo na. ‑A ‑glɩ maa ‑zaagbʋsa, ‑ma ‑laagɔzɔan 'ta ‑anyɩ ‑ci, ‑ofi lebhe ɩ 'tɔɔ cibhlili na. 2'Na ‑wawacuonyɩ, ‑a ‑glɩnɩ ‑pɔtɔnʋ Laagɔ 'la 'cuo, ‑ma saa ‑a ‑cɩ ka 'lɛ kʋkʋlʋ na, ɔ 'ta ka kɩɩ ‑anyɩ pala. ‑Ma 'bhlɩmɔɔn, ‑a ‑ci lebhe daa ɔ cɩ 'ka 'lɛ ɔcɩ pala na, ‑a cɩ ka ɔmɔ 'bhisa 'kʋ 'plɩ, sa saa ɔ ‑kʋkʋlʋ 'lɛ na, sɛɛ ‑a cɩ kɔɔ 'lɛ 'lɩ. 3Na, ncaatʋtʋʋntʋa ‑ɔ 'tɛbhalɩɔ 'lɛ ‑sa pɔlɛ 'kʋ na, ka ɔ kplɔ 'lɛ ɔcɩ le saa ɔmɔ ‑ma ɔ ‑kplɔ 'lɛ na. 4‑Ma ncaatʋtʋʋntʋa ‑ɔ nʋ 'lɛ nyinyi na, Laagɔ ɔ mʋnʋ 'lɛ gbatlɩ, ‑masa nyinyinʋlɩɛ ‑glɩ Laagɔ 'la gbatlɩmʋnʋlɩɛ na. 5A ‑ci lebhe ka ɔ ci 'lɛ le ɔ 'ka ncɛlɩ nyinyi nɩkplaan ‑sa, 'nyɩ nyinyi 'tɔɔ nɩkplaan ‑kʋ. 6Na, ncaatʋtʋʋntʋa ‑ɔ ‑kʋɔ 'lɛ nɩkplaan na, 'ɔ nʋ 'tanɩ nyinyi. ‑Ma ncaatʋtʋʋntʋa ‑ɔ nʋ 'lɛ nyinyi na, ɔ 'ta ka ‑azlɔɔ 'lɩ, 'nyɩ ɔ 'tɔɔ ‑ci.

7'Na 'cicʋnyɩ, nclɔɔ bhlogbɩɩ 'la 'nyiglilia anyɩ. Ɔmɔa ‑ɔ namʋnʋ 'lɛ 'kʋnylugolulɩɛ nɩkplaan na, ɔ ‑glɩ 'kʋnylugolunyɔ le saa ɔmɔ ‑ma ɔ ‑glɩ 'lɛ 'kʋnylugolunyɔ na. 8‑Ma, ɔmɔa ‑ɔ nʋ 'lɛ nyinyi na, ɔ ‑glɩ gɔzɛ 'la nclɔɔ, ‑ofi lebhe bhɔdaa tooto gɔzɛ bhɔlʋ 'lɛ nyinyinʋlɩɛ. Ka Laagɔ 'la 'Cʋa ci 'lɛ le ɔ 'ka gɔzɛ 'la nʋnʋlobholia nyumo.

9Na, ncaatʋtʋʋntʋa ‑ɔ ‑glɩnɩ 'lɛ Laagɔ 'la 'cʋ na, 'ɔ nʋ 'tanɩ nyinyi, ‑ofi lebhe ka Laagɔ 'la wɔɔnyɩtʋa ‑kʋnɩɔ 'lɛ nɩkplaan le gologolosucie 'bhisa. 'Ɔ cɩ 'tanɩ mino ɩya ɔ 'kanɩ ‑awlɛ nyinyi nʋ, ‑ofi lebhe ɔ ‑glɩnɩ Laagɔ 'la 'cʋ na. 10‑Anɩ ‑naa nɩkplaan ma cibhlilili 'lɛ Laagɔ 'la 'cuoa ɩya gɔzɛ 'la 'cuoa. Ncaatʋtʋʋntʋa ‑ɔ namʋnʋ 'ta 'lɛ 'kʋnylugolulɩɛ nɩkplaan, ‑aana ‑ɔ 'ta 'lɛ ɔ bholi ‑wa na, ɔ 'ta Laagɔ 'la 'cʋ ‑glɩ.

A wabhawabhalɩ Laaagɔ 'la 'cuo 'bhisa

11Wɔlɩ ‑naa a 'nu 'lɛ bhɔdaa tooto na, ɩmɩ ‑ɩ ‑glɩ 'lɛ lebhe ‑a wabhawabhalɩ, 12‑ma ‑a 'la nʋa le Kayɛɛn 'bhisa. Ɔ ‑glɩ 'lɛ ‑Abhɔlɛnyɔa 'nɔ na, 'dɛ ɔ 'dɩ 'lɛ bholi ‑blɩɩn. 'Nyɩ wɔɔsaa 'la gbʋ, ɔ 'dɩanɩa 'mɔɔ 'lɛ ‑blɩɩn bha? Ka ɔ 'dɩɔ 'lɛ ‑blɩɩn ‑ofi lebhe ɔla nʋnʋlobholia ‑nyua, 'nyɩ ɔ bholi 'nɩa 'nylugolua 'lɛ 'kʋ.

13Bholiecɩnyɩ, ‑laagɔzɔan ‑ka anyɩ ‑zɔ na, ɩ 'la ‑slaa anyɩ nikpoo. 14‑Anyɩ, ‑a ‑ci lebhe ‑a ya 'kwɩ nɩkplaan 'wlʋ 'nyɩ ‑a ya 'lɛ jabhʋa nɩkplaan ble, ‑ofi lebhe ‑a ‑wa ‑a bholiecɩ na. Na, ɔmɔa ‑ɔ 'ta 'lɛ ‑walʋ ‑ka na, ɔ ‑kʋ ka 'kwɩ 'la ‑kwleliea ‑zɔn. 15Ncaatʋtʋʋntʋa ‑ɔ ‑zɔɔ 'lɛ ɔ bholi na, ncaabhlanyɔ ɔ ‑glɩ 'lɛ. 'Nyɩ a ‑ci sɛɛ lebhe jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, ʋ 'ta ncaabhlanyɔ bhlogbɩɩ nɩkplaan ‑kʋ. 16‑Anɩ ‑naa nɩkplaan ‑a cibhlili 'lɛ ‑walʋ. Zozi ya ɔcɩ ‑sa 'nyɩ ɔ ya 'lɛ ‑ala gbʋ 'ku. Na, ‑anyɩ ‑ma, ɩ ‑fata lebhe ‑a ‑sa ‑acɩ ‑a bholiecɩ 'la gbʋ. 17Gbazɩ nclɔɔ ‑ka ‑laagɔzɔn ‑naa 'bhɛlɩ ‑lio, 'nyɩ ɔ ‑ka ɔ bholi 'lɩ, ɔ ‑ka ‑mieliin ‑kʋ, 'nyɩ ɔla gbɩa 'tɔɔ ŋaazɩ ‑pla na, 'nsasa ma cɩ 'kaa 'lɛ 'claclalɩ lebhe Laagɔ 'la ‑walʋ ‑kʋɔ nɩkplaan bha? 18Na, 'na 'cicʋnyɩ ‑a 'la wabhawabhalɩa neen bhlobhlo, ‑ma ‑a wabhawabhalɩ nʋnʋgbɩ ɩya ‑nʋawlɛ nɩkplaan.

19Ɩmɩ ‑naa nɩkplaan, ‑a ‑cɩ ka 'lɛ cibhlili lebhe ‑a ‑glɩ ‑nʋawlɛ 'la ncɛlɩ, ɩya ɔmɔ ‑deliin, ‑ala pɔlɩa 'ka 'cɩɩ kʋ. 20'Nyɩ ‑ala pɔlɩa ‑ka ‑anyɩ wɔlɩ 'kʋ gɩ 'tɩtɩo na, ‑a ‑ci sɛɛ lebhe Laagɔ 'ghli 'nyɩ ɔ zi ‑ala pɔlɩa 'kʋ, 'nyɩ ɔ ‑ci ‑tɛtɛa 'fɩan. 21'Na ‑wawacuonyɩ, ‑ala pɔlɩa 'ta ‑anyɩ wɔlɩ 'kʋ gɩ na, ‑delikʋtɛlɔ ‑yelio ‑anyɩ Laagɔ ‑deliin, 22'nyɩ lʋʋa ‑tɛtɛa ‑a 'clalɩɔ 'lɛ na, ɔ nyɩʋ ‑anyɩ, ‑ofi lebhe ‑a zʋ ɔla ‑jlɩmaa, 'nyɩ ‑a nʋ ɩmɩ ‑ɩ ‑kɔɔ 'lɛ 'tʋ na. 23'Nyɩ ɔla ‑jlɩmaa ‑a ‑glɩ 'lɛ lebhe ‑a kalɩ ɔla 'Cʋa ‑ɔ ‑glɩ 'lɛ Zozi Klisi na 'la pɔɔtɛtɛ, ɩya a wabhawabhalɩ, saa ɔ 'clalɩ 'lɛ ‑anyɩ na. 24Na, ɔmɔa ‑ɔ zʋ 'lɛ ɔla ‑jlɩmaa na, ɔ ‑kʋ Laagɔ nɩkplaan, 'nyɩ Laagɔ ‑kʋɔ 'lɛ nɩkplaan. 'Nyɩ 'Wugoa ɔ 'nyɩ 'lɛ ‑anyɩ na, ʋmʋ ‑ʋ gba 'lɛ 'nyɩ ‑a cibhlili 'lɛ sɛɛ lebhe ɔ ‑kʋ ‑anyɩ nɩkplaan.

Currently Selected:

1 Zaan 3: NTLD13

Highlight

Copy

Compare