1 Zaan 2
2
1'Na 'cicʋnyɩ, ka n zie 'lɛ anyɩ ɩmɩ ‑naa ɩya a 'la ka nyinyi nʋ. ‑Ma ka nclɔɔ ‑ka nyinyi nʋ na, ‑a ‑ka nclɔɔ bhlo, ‑ɔ -cɩ ka 'lɛ ‑ala da nyɩtɛ Toa ‑deliin na, ɔmɔ ‑ɔ ‑glɩ 'lɛ Zozi Klisi, 'kʋnylugolunyɔa. 2Sa, ɔmɔ ‑ɔ ‑glɩ 'lɛ ‑ala nyinyia 'la ‑aghlɛ, 'nyɩ ‑n 'ta ‑anyɩ bhlo ‑anɩa, ‑ma ‑laagɔzɔn bhuoa 'la ncɛlɩa 'nɩa ‑masɛɛ.
A wabhawabhalɩ
3‑A ‑ka Laagɔ 'la ‑jlɩmaa 'kʋ 'plɩlɩ na, 'dɛ 'la daa na, ‑a ‑cinɩ sɛɛ lebhe ‑a ‑cio. 4Ɔmɔa ‑ɔ cla 'lɛ lebhe: «N ‑ci Laagɔ,» 'nyɩ ‑ɔ 'plɩlɩ 'ta 'lɛ Laagɔ 'la ‑jlɩmaa 'kʋ na, ɔ ‑glɩ yodizʋnyɔ, 'nyɩ ‑nʋawlɛ 'tɔɔ nɩkplaan ‑kʋ. 5‑Ma ɔmɔa ‑ɔ 'plɩlɩ 'lɛ Laagɔ 'la wɔɔnyɩtʋa 'kʋ na, Laagɔ 'la ‑walʋa ‑glalɩɔ nɩkplaan 'kʋ ‑zaagbʋsa. Ɩmɩ ‑naa nɩkplaan ‑a cibhlilili 'lɛ lebhe ‑a ‑yɔɔsɔ ‑glɩ bhlo. 6Na, ɔmɔa ‑ɔ cla 'lɛ ɔcɩ lebhe ɔ mɛɔ cɩ na, ɩ ‑fata lebhe ɔ namʋ ɔmɔ 'bhisa.
7'Na ‑wawacuonyɩ, ɩmɩa n zie 'lɛ anyɩ na, ɩ 'ta ‑jlɩmaa ‑lele ‑glɩ, ‑ma ɩ ‑glɩ ‑godogodojlɩmaa a ‑ka 'lɛ bhɔdaa tooto na, ɩ ‑glɩ wɔɔnyɩtʋa a 'nu 'lɛ na. 8‑Ma 'bhlɩmɔɔn, ɩmɩa n zie 'lɛ anyɩ na, ɩ ‑glɩ ‑jlɩmaa ‑lele, 'nyɩ ma 'lɩlɩ ɩla ‑nʋawlɛa Klisi nɩkplaan ɩya anyɩ ‑masɛɛ nɩkplaan. Sa ka 'tutua 'plɩ 'lɛ, 'nyɩ zezezelia 'titi ya tooto lelɩɛ bhɔ. 9Na, ɔmɔa ‑ɔ cla 'lɛ ɔcɩ lebhe ɔ ‑kʋ zezezelia nɩkplaan, 'nyɩ ‑ɔ ‑zɔ 'lɛ ɔ bholi na, 'tutua nɩkplaan ɔ ‑kʋ ka ‑azla 'lɛ. 10Ɔmɔa ‑ɔ ‑wa 'lɛ ɔ bholi na, ɔ ‑kʋ zezezelia nɩkplaan, 'nyɩ lʋʋ ‑ylɛylɛ 'tɔɔ nɩkplaan ‑kʋ, ‑ʋ -cɩ ka 'lɛ gba ɩya ɔ 'ka bhli na. 11‑Ma ɔmɔa ‑ɔ ‑zɔ 'lɛ ɔ bholi na, 'tutua nɩkplaan ɔ ‑kʋ 'lɛ, 'tutua nɩkplaan ɔ namʋnʋ 'lɛ, 'nyɩ ɔ 'ta daa ɔ mʋnʋ 'lɛ na ‑ci, sa 'tutua yɔɔ 'ci wla na.
A zʋlʋ ‑laagɔzɔan pɔlɛ 'kʋ
12'Na 'cicʋnyɩ, ka n zie 'lɛ anyɩ, ‑ofi lebhe ala nyinyia ya anyɩ ‑vɔɔ, Zozi Klisi 'la 'ŋlɩa nɩkplaan.
13'Cuotonyɩ, ka n zie 'lɛ anyɩ, ‑ofi lebhe a ‑ci ɔmɔ ‑ɔ ‑kʋ 'lɛ bhɔdaa tooto na.
Ncaanyɩgbɩanyɩ, ka n zie 'lɛ anyɩ, ‑ofi lebhe a ya ‑Abhɔlɛnyɔa ‑sɩa.
14'Na 'cicʋnyɩ, n ya anyɩ zie, ‑ofi lebhe a ‑ci Toa. 'Cuotonyɩ, n ya anyɩ zie, ‑ofi lebhe a ‑ci ɔmɔa ‑ɔ ‑kʋ 'lɛ bhɔdaa tooto na. Ncaanyɩgbɩanyɩ, n ya anyɩ zie, ‑ofi lebhe a ‑ka 'tɛtɩ, Laagɔ 'la wɔɔnyɩtʋa ‑kʋ anyɩ nɩkplaan, 'nyɩ a ya ‑Abhɔlɛnyɔa ‑sɩa.
15A 'la wabhaa ‑laagɔzɔan ɩya lɩɩa ‑ɩ ‑kʋ 'lɛ ‑laagɔzɔan na. Sa, gbazɩ nclɔɔ ‑ka ‑laagɔzɔan ‑wa na, Toa 'la ‑walʋ 'tɔɔ nɩkplaan ‑kʋ. 16‑Masa ɩmɩa ‑tɛtɛa ‑ɩ ‑kʋ 'lɛ ‑laagɔzɔan, 'nyɩ ‑ɩ ‑glɩ 'lɛ lɩɩa 'la 'tʋa ‑ʋ bhla 'lɛ 'nyɛkɛa, lɩɩa 'la 'tʋa ‑ʋ bhla 'lɛ 'cia, ɩya 'bhɛlɩlilie 'la ‑tutuleea na, 'ɩ 'wlʋlʋ 'ta Toa wlɩɩn, ‑ma ‑laagɔzɔan ɩ 'wlʋlʋ 'lɛ. 17Ka ‑laagɔzɔan ɩya ɩla lɩɩa 'la 'tʋa ‑ʋ bhla 'lɛ ncɛlɩ na plɩ 'lɛ. ‑Ma ɔmɔa ‑ɔ nʋ 'lɛ Laagɔ 'la pɔɔsa na, ɔ ‑kʋ 'lʋkʋlʋkʋ ɩya 'lʋkʋlʋkʋ.
A zʋlʋ Klisi 'la ‑zɔbhɛlɩgbanyɔa pɔlɛ 'kʋ
18'Na 'cicʋnyɩ, bhɩalɩclɩɩa ya cɩ mɛ. A ya 'nu lebhe Klisi 'la ‑zɔbhɛlɩgbanyɔa cɩ 'ka ci. ‑Ma Klisi 'la ‑zɔbhɛlɩgbanyaa yanɩ ‑pɔtɔnʋ zubholi. Ɩmɩ ‑naa nɩkplaan ‑a cibhlili 'lɛ lebhe bhɩalɩclɩɩa ya cɩ mɛ. 19Ncɛlɩ ‑naa, ‑anyɩ sidiin ma 'wlʋ 'lɛ, ‑ma ma 'ta ‑a 'nʋa ‑glɩ. ‑Ofi lebhe ma ‑kaa ‑anʋa ‑glɩa na, ma cɩ 'ka kaa ‑anyɩ sidiin kʋ. Na, ɩ ‑fata lebhe ma 'wlʋa ‑zɔn, ɩya ‑a ka cibhlili lebhe maa ‑tɛtɛa, bhlogbɩɩ 'taa ‑a 'nɔ ‑glɩ. 20‑Ma anyɩ, Klisi, ‑ɔ ‑glɩ 'lɛ ‑Kplɔkplɔnyɔa na, ɔ ya anyɩ ‑Wugoa 'nyɩ, dɛ anyɩa 'fɩan a ‑ci 'lɛ ‑nʋawlɛa. 21N 'ta anyɩ zie lebhe a 'ta ‑nʋawlɛa ‑ci, ‑ma ka n zie 'lɛ anyɩ lebhe a ‑cie, 'nyɩ a ‑ci 'lɛ lebhe ‑tɛtɛa 'fɩan ‑ɩ ‑glɩ 'lɛ yodi na, ɩla nɩkplaan 'la wɔlɩ bhlogbɩɩ 'wlʋlʋ 'ta ‑nʋawlɛ nɩkplaan.
22'Nyɩ, ncaasaa ‑ɔ ‑glɩa 'lɛ yodizʋnyɔa bha? Ɔmɔa ‑ɔ cla 'lɛ lebhe Zozii 'ta Klisi ‑glɩ na, ‑n 'ta ɔmɔ bha? 'Lɩka Klisi 'la ‑zɔbhɛlɩgbanyɔa. Ɔmɔ ‑ɔ ‑glɩ 'lɛ ɔmɔa ‑ɔ blɔ 'lɛ Toa ɩya 'Cʋa na. 23Ncaatʋtʋʋntʋa ‑ɔ blɔ 'lɛ 'Cʋa na, ɔ 'ta Toa ‑masɛɛ ‑ka. ‑Ma ɔmɔa ‑ɔ cibhlili 'lɛ 'Cʋa na, ɔ ‑ka Toa ‑masɛɛ. 24Na, anyɩ, 'naa wɔlɩa a 'nua 'lɛ bhɔdaa tooto na, ɩ kʋ anyɩ nɩkplaan. Gbazɩ wɔlɩa a 'nu 'lɛ bhɔdaa tooto na, ɩ ‑ka anyɩ nɩkplaan ‑kʋ na, 'dɛndlana, anyɩ ‑ma a ‑kʋ 'Cʋa ɩya Toa nɩkplaan. 25'Nyɩ ɩmɩa ɔmɔ 'titi talɩ 'lɛ ‑ndanyɩ 'kʋ le ɔ cɩ ‑anyɩ 'nyɩ na, ɩmɩ ‑ɩ ‑glɩ 'lɛ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na. 26Na, 'lɩka ɩmɩa n wabha 'lɛ lebhe n 'kaa anyɩ zie, maa ‑ɔ 'matɩ 'lɛ lebhe ‑ɔ ka anyɩ 'nyiglili na, 'la gbʋ na. 27Anyɩ, 'Wugoa ɔ 'nyɩ 'lɛ anyɩ na, ʋ ‑kʋ anyɩ nɩkplaan, 'nyɩ 'a 'matɩ 'tanɩ ‑awlɛ lebhe ma ca anyɩ, ‑masa ɔla 'Wugoa ca anyɩ wɔlɩa ‑tɛtɛa, 'nyɩ ɩmɩa ʋ ca 'lɛ na, ɩ ‑glɩ ‑nʋawlɛ, ɩ 'ta yodi ‑glɩ. Na, ʋ ya 'lɛ anyɩ ca na, a kʋ Klisi nɩkplaan.
28'Na 'cicʋnyɩ, a kʋɔ nɩkplaan, ɩya daa ɔ cɩ 'ka 'lɛ futo na, ‑delikʋtɛlɔ 'ka ‑anyɩ yeli, ɩya ɔla ciclɩɩa 'kʋ, ‑zo 'la ka gba ɩya ‑a 'la 'kɔɔ cɩ da tlʋbhalɩ.
A 'plɩ 'kʋnylugolunya
29Na, a ‑ci 'lɛ sɛɛ lebhe Klisi ‑glɩ 'kʋnylugolunyɔ na, a cibhlili lebhe ncaatʋtʋʋntʋa ‑ɔ namʋnʋ 'lɛ 'kʋnylugolulɩɛ nɩkplaan na, ɔ ‑glɩ Laagɔ 'la 'cʋ.
Currently Selected:
1 Zaan 2: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.