Ruti 2
2
Ruti h'a li mwa simu ya Boazi
1Naomi n'a na ni mwanahabo ya bizwa Boazi, mutu ya n'a fumile, ya maata, ili wa lusika lwa Elimeleki, munn'a hae. 2#Malivi 19.9-10; Mul 24.19 Ruti a li ku Naomi, “U ni lumelele ni ye kwa masimu ni y'o nopa-nopa mabele a siilwe mwa mulaho ki bakutuli. Ni ta y'o fumana ya ta ni lumelela ku sebeza mwa mulaho a hae.”
Naomi a alaba, a li, “Ki hande, mwan'a ka.”
3Cwale Ruti a ya kwa masimu, mi a zamaya mwa mulaho a bakutuli, a nz'a nopa-nopa mabele. Kanti n'a ile mwa simu ya Boazi, wahabo Elimeleki.
4Mwamulahonyana, yena Boazi kasibili a fita ku zwa kwa Betelehema. A li kwa babeleki, “Muñ'a Bupilo a be ni mina.”
Bona ba alaba, ba li, “Muñ'a Bupilo a ku tohonolofaze.”
5Boazi a buza mubeleki wa hae ya n'a zamaisa bakutuli, a li, “Musizana yani ki mañi?”
6Mubeleki a alaba, a li, “Ki musizana wa muzwahule ya tile ni Naomi ku zwa kwa Moabi. 7U til'o ni kupa kuli ni mu lumelele ku latelela bakutili mwa mulaho, a nz'a bubula mabele! U sebelize ku zwa kakusasana luli ku t'o fitela nako ye, h'a tuhezi ku y'o pumula nakonyana mwa sibuma sani.”
8Cwale Boazi a li ku Ruti, “Teeleza, mwan'a ka, ni ku eleze. U si ke wa y'o bubula mabele ku sili haisi hona mwa simu ye feela. U ine hona mo, mi u sebeze ni babeleki ba ka ba basali. 9U ba talime ili kuli u bone ko ba kutulela mabele, mi u ine ni bona. Ni laezi babeleki ba ka ba banna kuli ba si ke ba ku kataza. Mi f'o shwela linyolwa kaufela, u ye u y'o nwa mwa linkwana ze ba talize mezi.”
10Ruti a inama, a kandelela, mane a y'o nata pata fafasi, a li ku Boazi, “Kiñi ha u ni tokomela cwalo ni ku ba ni musa ku na, niha ni li muzwahule cwana?”
11Boazi a alaba, a li, “Ni bulelezwi lika kamukana z'o ezize ku mukwenyan'a hao haisali munn'a hao a tokwahalela. Ni ziba m'o siyezi bo m'aho ni bo ndat'aho ni naha ya henu, ni m'o tezi ku t'o pila mwahal'a batu b'o n'o sa zibi. 12Muñ'a Bupilo a ku fe mupuzo ka z'o ezize kaufela. Muñ'a Bupilo, Mulimu wa Isilaele, y'o tile ku yena ku t'o silelezwa, a ku fe mupuzo o tezi!”
13Ruti a alaba, a li, “Muñ'a ka, u na ni bunde hahulu ku na. U ni tiisize pilu ka ku bulela hande ni na, niha ni sa likani ni yo muñwi wa babeleki ba hao.”
14Ka nako ya lico, Boazi a li ku Ruti, “Taha kwanu, u t'o nga siemba sa buhobe, mi u si sunse mwa mulo o zwakilwe ni waine.” Cwale kiha s'a ina ni babeleki, mi Boazi a mu fa matuyu-tuyu. A ca, a ba a kula, mane kwa siyala lico ze ñwi. 15Ha s'a ile ku y'o bubula mabele, Boazi a laela babeleki ba hae, a li, “Mu mu tuhele, a bubule ni mo ku sa kubukani mabunda a mabele, mi mu si ke mwa mu kataza. 16Mu comole makunka a mañwi fa mabunda a mabele, mi mu mu siyele ona, a t'o a nopa. Mu si ke mwa mu kalimela.”
17Cwale Ruti a bubula mabele mwa simu ku fitela manzibwana. Ha s'a pulile mabele a n'a fumani, a bata ku likana ni licika la saka. 18A nga mabele a hae, a kutela kwa hae, mi a y'o bonisa mukwenyan'a hae s'a n'a bubuzi. A mu fa cwalo ni lico ze n'e siyezi ha ku ciwa. 19Naomi a li ku yena, “Kacenu u til'o bubula kai mabele? U n'o sebeza mwa simu ya mañi? Mulimu a fuyaule mutu ya ku tokomezi!”
Ruti kih'a bulelela Naomi kuli n'a nz'a sebeza mwa simu ya mutu ya bizwa Boazi.
20 #
Malivi 25.25
Naomi a li ku yena, “A tohonolofazwe ki Muñ'a Bupilo, ya buluka lisepiso za hae kamita ku ba ba pila ni ku ba ba shwile.” Mi a zwelapili, a li, “Mutu yo ki mwanahabo luna. Ki yo muñwi wa ba ba swanela ku lu babalela.”
21Cwale Ruti a li, “Kwand'a ze ñwi kaufela, u ni bulelezi kuli ni zwelepili ku sebeza ni babeleki ba hae ku fitela ba feza ku kutula.”
22Naomi a li ku Ruti, “Eeni, mwan'a ka, mwendi u ka swana wa nyandiswa ha u ka ya mwa masimu a batu ba sili. I ka ba hande ha u ka sebeza ni basali ba ba beleka mwa simu ya Boazi.” 23Ruti kih'a sebeza ni babeleki ba Boazi, mi a bubula mabele ni buloto ku fitela kutulo i fela. A zwelapili cwalo ku ina ni mukwenyan'a hae.
Lozi Interconfessional Bible, Catholic Edition © Bible Society of Zambia, 2009.