Ruti 1
1
Elimeleki ni lubasi lwa hae ha ba li mwa Moabi
1Ka nako yeo baatuli ha ne ba sa busa mwa Isilaele, kwa ba ni tala mwa naha. Cwale mutu ya n'a zwa kwa Betelehema, munzi o n'o li mwa naha ya Juda, a y'o ina nakonyana mwa naha ya Moabi. Musal'a hae hamoho ni bana ba bashimani ba babeli ba ya ni yena. 2Munna yo n'a bizwa Elimeleki, musal'a hae n'e li Naomi, mi bana ba bona n'e li bo Mahaloni ni Kilyoni. N'e li ba mushiku wa Eferata, mi ba y'o pila mwa naha ya Moabi. 3Elimeleki a shwa, mi Naomi a siyala a nosi ni bana ba hae ba babeli. 4Ba nyala basizana ba naha ya Moabi. Wa pili n'a bizwa Olipa, mi wa bubeli n'a bizwa Ruti. Ne ba se ba inzi mwateñi lilimo ze lishumi. 5Cwale Mahaloni ni Kilyoni ni bona ba shwa, mi Naomi a siyala a li nosi, a si na munna kamba bana ba hae ba babeli cwalo.
Naomi ni Ruti ba kutela kwa Betelehema
6Ha n'a sa li mwa Moabi cwalo, Naomi a utwa kuli Muñ'a Bupilo u tusize sicaba sa hae ka ku si fa kutulo ye nde. Cwale a itukiseza ku tuta mwa Moabi ni makwenyan'a hae. 7Ba funduka hamoho ku kutela kwa Juda. 8Kono mwa nzila, a li ku bona, “Mu kutele kwa mahae, mu y'o ina ni bo m'a mina. Muñ'a Bupilo a mi shemube, sina mo ne mu ni shemubezi ni na, hamohocwalo ni ba ba shwile. 9Mi Muñ'a Bupilo a mi konise ku nyalwa hape, ni ku ba ni mandu.”
Naomi kih'a ba tubeta ni ku ba laeza. Kono ba kala ku lila hahulu. 10Ba li ku yena, “Batili! Lu ta ya ni wena haenu.”
11Naomi a li, “Mu swanezi ku kuta, bana ba ka. Mu batelañi ku ya ni na? Kana ni ka ba ni bana hape be mu ka nyaliwa ku bona, nji? 12Mu kutele kwa mahae. Ha ni sa kona ku nyalwa hape, kakuli ni se ni supezi. Ha ku na tuso ku ina ni na. Ha ni koni ku nyalwa bona busihu bo ni ku mi pepela bashimani ba bañwi. 13Kana ne mu si ke mwa nyalwa ku fitela ba hula? Kana taba yeo n'e ka mi hanisa ku nyaliwa ki u sili? Bana ba ka, mwa ziba kuli ku tata. Ha ku konahali. Muñ'a Bupilo u ni fulalezi, mi ni mi utwela butuku hahulu.”
14Kiha ba kala ku lila hape. Olipa a tubeta mukwenyan'a hae, a mu laeza, mi a kutela habo, kono Ruti a hana ku ya. 15Naomi a li ku Ruti, “Bona! Mwanahenu u kutezi kwa banabahabo ni ku mulimu wa hae. Kutela kwa hae hamoho ni yena.”
16Kono Ruti a alaba, a li, “U si ke wa kupa kuli ni ku siye. U ni lumelele ku ya ni wena! K'o ta ya kamukana, ni na, ni ta ya kwateñi. K'o y'o ina kaufela, ni na, ni ta y'o ina ni wena. Banabahenu ba ka ba banabahesu, mi Mulimu wa hao u ta ba Mulimu wa ka. 17K'o ka y'o shwela kamukana, ni na, ni ka y'o shwela kwateñi, mi ki kona ko ni ka y'o pumbekiwa. Muñ'a Bupilo a te a ni kute haiba ni ka kauhanywa ni wena ki se siñwi kwand'a lifu!”
18Naomi ha s'a boni kuli Ruti u tundamezi ku ya ni yena, h'a si ka bulela hape.
19Ba zamaya, mane ba y'o fita kwa Betelehema. Ha ba t'o fita, ba munzi kaufela ba nyakalala, mi basali ba li, “Yo, ha si yena Naomi, nji?”
20Yena a li, “Mu si ke mwa ni biza Naomi. Mu ni bize Mara, kakuli Mulimu ya Maata Kaufela u ni utwisize hahulu butuku. 21Ha ni zwile mo, ne ni na ni ze ñata, kono Muñ'a Bupilo u ni kutisize ni si na ni se sikana. Cwale mu ni bizezañi Naomi kanti yena Mulena ya Maata Kaufela u s'a ni atuzi ni ku ni tahiseza maziezi?”
22Kihona mw'a n'a kutezi Naomi, hamohocwalo ni Ruti mukwenyan'a hae, ku zwa kwa Moabi. Ba t'o fita mwa Betelehema kwa makalelo a kutulo ya mabele.
Lozi Interconfessional Bible, Catholic Edition © Bible Society of Zambia, 2009.