Ruti 3
3
Bunde bwa Boazi ku Ruti
1Cwale Naomi a li ku Ruti, “Mwan'a ka, ni swanezi ku ku batela munna, kuli u be ni ndu. 2U zibe kuli munna yo, Boazi, muñ'a babeleki b'o n'o sebeza ni bona, ki mwanahabo luna. Cwalehe, u teeleze. Kacenu le manzibwana u ta pula mabele. 3Cwale u tape hande, u tole miinko, mihe, u kabe mwa liapalo za hao ze nde hahulu. Ku zwa fo, u ye kwa sihoto sa hae, kono u si ke wa iponahaza ku yena, ku fitela ha s'a felize ku ca ni ku nwa. 4Ha s'a lobala u tekele f'a lobezi. Ha s'a lobezi, u ye u y'o apula kubo kwa mahutu a hae, mi u lobale kwatuko a hae. U ta ku bulelela s'o swanezi ku eza.”
5Ruti a alaba, a li, “Ni ta eza z'o ni bulelela kaufela.”
6Cwale Ruti a ya kwa sihoto, mi a y'o eza z'a n'a mu bulelezi mukwenyan'a hae kamukana. 7Boazi n'a s'a felize ku ca ni ku nwa, n'a tabile. Cwale a y'o lobala kwatuko a libunda la mabele. Ruti kiha s'a taha a nz'a nanalela, a apula kubo kwa mahutu a hae, mi a lobala. 8Mwahal'a busihu Boazi a pasumuka, a fetuha, mi a komokiswa ki ku utwa musali a lobezi kwatuko a hae. 9A li, “Ki wena mani?”
Yena a alaba, a li, “Ki na Ruti, muñ'a ka. Kakuli u wahabo luna, u na ni tukelo ya ku ni babalela. Ni kupa kuli u ni nyale, muñ'a ka.”
10Boazi a li, “Mwan'a ka, Muñ'a Bupilo a ku tohonolofaze. Ka s'o eza ka nako ye, u bonisa busepehi bo butuna bwa bana ba mba mane ku fita m'o ezelize mukwenyan'a hao. Ha u si ka bata mutangana i be ya fumile kamba mubotana. 11Cwale u si ke wa bilaela, mwan'a ka. Mutu ni mutu, mwa hae, u ziba kuli u musali ya lukile. Ni ta eza z'o kupa kamukana. 12#Rut 2.20 Ki niti luli ni wahenu, mi ni na ni buikalabelo ka wena. Kono ku na ni mutu yo muñwi ye li wahenu hahulu ku fita na. 13U lobale ku fitela bu sa, mi kakusasana lu ta bona kamba wa lata ku ku babalela. Haiba ku cwalo ki hande. Hakusicwalo, ni konka ka Mulimu ya pila kuli ni ta ku babalela. Cwalehe, u lobale ku fitela bu sa.”
14Ruti a lobala kwatuko a hae ku fitela bu sa, kono a zuha ku si ka patalala kale kakuli Boazi n'a sa lati kuli mutu a zibe kuli Ruti n'a tile ku yena. 15Cwale Boazi a li ku yena, “Tisa mulepo wa hao, mi u yale fafasi fa.” A eza cwalo, mi Boazi a sela fateñi mabele a kona ku taza mukotana wa bupi o mutuna, mi a mu lwesa ona. Cwale Ruti a kutela kwa hae. 16A ya ku mukwenyan'a hae, mi yena a mu buza cwana, a li, “Ku il'o zamaya cwañi, mwan'a ka?”
Ruti a mu taluseza lika kaufela z'a n'a mu ezelize Boazi. 17A li, “Mane u ni file mabele a kamukana, kakuli u ni bulelezi kuli ni si ke na kutela ku wena mazoho-zoho.”
18Naomi a li ku yena, “Cwale u we pilu, mwan'a ka, ku fitela u bona litaba m'o li ta zamaela. Boazi h'a na ku pumula kacenu, ku fitela a lukisa taba yeo.”
Lozi Interconfessional Bible, Catholic Edition © Bible Society of Zambia, 2009.