Mashitanguti 9
9
Butali ni bukuba
1Butali bwa yahisa ndu ya bona, mi bwa i tiisa ka misumo ye supile. 2Bu bulaya simunanu ku eza mukiti, bu kopanya waine ni milyani, mi bu toma tafule. 3Bu luma babeleki ba bona ba basizana ku y'o biza batu. Ni bona kiha bu ya mwa libaka ze pahami za munzi, bu huweleza, bu li, 4“Batu ba ba sa zibi se siñwi, a mu tahe!” Mi kwa likuba bwa li, 5“A mu tahe, mu t'o ca lico za ka, mu nwe ni waine ye ni zwakile. 6Mu siye likopano za batu ba ba si na se ba ziba, mi mu pile. Mu latelele nzila ya zibo.”
7Haiba u sikulula mutu wa muipi, u ta shwaulwa feela. Haiba u kalimela mutu ya maswe, u ta ikutwisa feela butuku. 8U si ke wa lika ku sikulula mutu wa muipi. U ka ku toya ka ku eza cwalo. Kono ha u sikulula mutu ya butali, u ta ku kuteka. 9Sifi ni sifi s'o bulelela mutu ya butali si ta ekeza kwa butali bwa hae. S'o ka bulelela mutu ya lukile kaufela, si ta ekeza kwa zibo ya hae.
10 #
Job 28.28; Lipi 111.10; Mash 1.7 Kuli u be ni butali, u swanezi ku kala ku saba Muñ'a Bupilo pili. Haiba u ziba Ya Kenile, foo u na ni kutwisiso. 11Butali bu ta ekeza lilimo kwa bupilo bwa hao. 12Ki wena ya ka kutelwa haiba u na ni butali, mi ki wena hape ya ka nyanda haiba u bu hana.
13Bukuba bu swana ni musali ya na ni lilata, ya si na s'a ziba, ya si na maswabi. 14U ina kwa munyako wa ndu ya hae, kamba fa sipula mwa sibaka se si pahami sa munzi. 15U ina a nz'a biza batu ba ba fita, ba ba hupula za misebezi ya bona. 16A li, “Mina batu ba ba si na zibo, a mu tahe kwanu!” Kwa likuba u li, 17“Mezi a ku uzwa a munati hahulu. Sico sa ku cela mwa mukunda sa tabusa.” 18B'a swasize ha ba zibi kuli batu ba ba ya kwa ndu ya hae ba shwa, ni kuli bona bao ba ba se ba keni, ba se ba li kwatasi mwa lifasi la ba ba shwile.
Lozi Interconfessional Bible, Catholic Edition © Bible Society of Zambia, 2009.