Mashitanguti 10
10
Mashitanguti a Salumoni
1Ki a mashitanguti a Salumoni.
Mwana ya butali u tabisa ndat'ahe, kono wa sikuba u tiseza m'ahe maswabi.
2S'o fumana ka mukwa o sa sepahali ha si na ku ba ni tuso ku wena, kanti ku sepahala kwa pilisa.
3Muñ'a Bupilo h'a na ku tuhela mutu ya lukile a shwa tala, kono mutu ya maswe u ka mu tima z'a bata.
4Buzwa bu ka ku tiseza bubotana, kono ku sebeza ka tata ku ta ku fumisa.
5Mutu ya na ni ngana u kutula lico ha se li buzwize. Kwa swabisa ku lobala ka nako ya kutulo.
6Mutu yo munde u ta fumana limbuyoti. Manzwi a mutu ya maswe a apesize bulwani.
7Batu ba bande ba ta na ba hupulwa ka buitumelo, kono ba ba maswe ba libalwa kapili.
8Batu ba ba na ni ngana ba latelela likelezo ze nde, kono batu ba ba yambutuka za bukuba ba ta feliswa.
9Batu ba ba na ni niti ba ta iketa, kono ba ba sa sepahali ba ta swalwa.
10Mutu ya pata niti u tisa mufili-fili, kono ya nyaza patalaza u sebeleza kozo.
Pulelo ye kutekeha
11Manzwi a mutu yo munde ki liwelu-welu la bupilo, kono manzwi a ya maswe a patile bulwani.
12 #
Jak 5.20; 1 Pit 4.8 Lutimbo lu tisa mifili-fili, kono lilato ha li isi pilu kwa bumaswe kaufela.
13Batu ba ba talifile ba bulela za ngana, kono batu ba likuba ba tokwa ku utwiswa butuku.
14Batu ba ba butali ba fumana zibo mo ba konela kamukana. Sikuba ha si bulela, mufili-fili ha u yo kwahule.
15Bufumu bu sileleza mufumi. Bunjebwe bona bu bulaya mubotana.
16Mupuzo wa mutu yo munde ki bupilo, kono sibi si isa feela kwa libi ze ñwi ze ñata.
17Mutu ya teeleza h'a nyaziwa u ta pila, kono ya sa lumeli kuli u fosize u mwa kozi.
18Mutu ya pata lutimbo lwa hae ki lihata. Ufi ni ufi ya hasanya litaba za ku seba ki sitoto.
19Ha u bulela hahulu, u tuha u fosa. Haiba u butali, u kuze.
20Manzwi a mutu yo munde a swana ni silivela ye nde. Minahano ya mutu ya maswe ha i na tuso.
Tabo ya bupilo bo bunde
21Manzwi a mutu yo munde a ka tusa batu ba bañata, kono wa kona ku ipulaya ili wena ka bukuba.
22Ki mbuyoti ya Muñ'a Bupilo ye kona ku fumisa mutu. Ha ku na se si kona ku nga sibaka sa yona mbuyoti.
23Mutu wa sikuba wa ikola h'a fosa. Haili mutu ya na ni ngana u tabiswa ki butali.
24Mutu ya lukile u famana s'a bata. Kono ya maswe u fumana s'a saba ka ku fitisisa.
25Liñungwa la taha mi ba ba maswe ba fefulwa, kono batu ba ba sepahala ba iketile kamita.
26U si ke wa nga mutu ya buzwa kuli a ku ezeze nto ye ñwi. U ta ku nyemisa mane u be u lile.
27Saba Muñ'a Bupilo mi u ta pila nako ye telele. Batu ba ba maswe ba shwa nako ya bona i si ka fita kale.
28Sepo ya batu ba bande i isa kwa tabo, kono batu ba ba maswe ha ku na se ba libelezi.
29Muñ'a Bupilo u sileleza batu ba ba si na mulatu, kono u wisa ba ba eza ze maswe.
30Batu ba ba lukile ba ta ba ni sisilelezo nako kaufela, kono ba ba maswe ha ba na ku ina nako ye telele mwa naha.
31Batu ba ba lukile ba bulela za ngana, kono lilimi le li bulela ze maswe li ta kuziswa.
32Batu ba ba lukile ba ziba ku bulela ze nde, kono ba ba maswe ba bulela ze nyemisa nako kaufela.
Lozi Interconfessional Bible, Catholic Edition © Bible Society of Zambia, 2009.