Mashitanguti 7
7
1Mwan'a ka, hupula se ni bulela, mi u si ke wa libala se ni ku bulelela kuli u si eze. 2Eza se ni bulela, mi u ta pila. U latelele ka tokomelo lituto za ka sina ha u ka sileleza meeto a hao. 3U buluke lituto za ka ka nako kaufela. U li ñole mwa pilu ya hao. 4Butali u bu eze sina kaizel'a hao, mi taluhanyo ya lika i be sina mulikan'a hao. 5Li ta ku kauhanya ni basali ba batu, ili basali ba manzwi a ka ku tiseza takazo.
Musali ya maswe
6Zazi le liñwi, ne ni talimezi mwa lihaulo la ndu ya ka. 7Na bona sitopa sa batu ba ba si na temuho, kono na tekelela fateñi mushimani wa sikuba. 8N'a nz'a zamaya mwa mukwakwa fakaufi ni sikutwana kw'a n'a ina musali yo muñwi. 9N'a fita fakaufi ni ndu ya hae ka swalala. 10Mi cwale musali a y'o katana mushimani yo. N'a apezi sina lihule, mi n'a eza milelo. 11N'a na ni bundume, mi a si na maswabi. N'a nz'a zamaya mwa mikwakwa nako kaufela. 12N'a nz'a yemanga mwa likutwana, nakonyana, fokuñwi mwa mukwakwa, fokuñwi mwa lipatelo a libelela. 13Musali yo a swala mushimani, a mu tubeta, a mu ndwandukela kwa meeto, mi a li, 14“Kacenu ni fitisize limpo, mi ni na ni nama ye zwa kwa sitabelo sa ka. 15Cwale ne ni nze ni ku bata. Ne ni bata ku ku bona, mihe ki wena yo cwale! 16Ni apesize mumbeta wa ka ka masila a mibala-bala a zwa kwa Egepita. 17Ni a beile miinko ya mira ni aloe ni sinamone. 18A lu ye, lu y'o latana busihu kaufela. Lu ka ba ni tabo ha lu nze lu itabisa ka za lilato. 19Munn'a ka h'a yo kwa hae. U ngile musipili o mutelele. 20U ile ni mali a mañata, mi h'a na ku kuta ka lisunda ze peli.” 21Cwale a mu susueza ka manzwi a hae a kalole, mi ka manzwi a hae a munati mushimani a lumela. 22Hona fo a ya ni yena sina pulu ye y'o bulaiwa, sina lizwii le li tulaka mwa siteo. 23U swana ni lizwii le li punyakwa pilu ka lisho. N'a swana sina nyunywani ye ya mwa katwa, n'a sa zibi kuli bupilo bwa hae ne bu li mwa kozi.
24Cwalehe, bana ba ka, mu ni teeleze. Mu ise pilu ku ze ni bulela. 25Lipilu za mina li si ke za hapiwa ki musali ya cwalo. Mu si ke mwa mu nyomaeta mwamulaho. 26U sinyize banna ba bañata, mi u tiselize ba bañata mafu a sa konwi ku balwa. 27Haiba mu ya kwa ndu ya hae, mu mwa nzila ye ya kwa lifasi la ba ba shwile. Ki nzila ye kuswani ye isa kwa lifu.
Lozi Interconfessional Bible, Catholic Edition © Bible Society of Zambia, 2009.