Mashitanguti 6
6
Litemuso ze ñwi hape
1 #
Litu 29.14-20
Mwan'a ka, kana u sepisize ku ba ni buikalabelo ka sikoloti sa mutu u sili, nji? 2Kikuli u swasizwe ki manzwi a hao? Wa pupuliswa ki lisepiso za hao luli, nji? 3Hakulicwalohe, mwan'a ka, u mwa maata a mutu yo, kono ki wo mukwa wa ku zwa mwateñi. Akufela ku yena, u y'o mu kupa kuli a ku lukulule. 4U si ke wa lobala kamba ku pumula. 5Zwa mwa siteo sina nyunywani kamba lizwii ha li bandile muzumi.
6Batu ba ba buzwa ba lukela ku ituta se siñwi ka mo bu pilela butwa. 7Ha bu na mueteleli, nduna, kamba mubusisi. 8Kono litabula bu kubukanya lico za bona, ili ku itukiseza maliha. 9Mutu ya buzwa, yena, ku ta mu nga nako ye kuma kai a sa li a lobala? U ta zuha lili? 10#Mash 24.33-34 U li, “Ni sa lobala hanyinyani feela, ni pute mazoho mi ni pumule nakonyana.” 11Kono h'a sa lobezi, bubotana bu ta mu kenela sina lisholi le li sweli lilwaniso.
12Batu ba ba maswe ba ba si na tuso ba zamaya ba nze ba bulela buhata. 13#Litu 27.22 Ba kobeta ka meeto, ba eza liponiso ka mahutu mane ba supa ni ka minwana ya bona ku ku puma. 14Mi ha ba nze ba eza cwalo ba lela bumaswe mwa minahano ya bona, ni ku tisa mifili-fili kai ni kai. 15Kabakaleo, ba ta kenelwa ki maziezi ba si ka lemuha, mi ba ta holofala maswe.
16Ku na ni lika ze supile ze toilwe ki Muñ'a Bupilo, z'a si ke a yemela. 17Lika ki ze:
ku talima ka buikuhumuso,
lilimi le li puma,
mazoho a sulula mali,
18minahano ye hupulwa ze maswe feela,
mahutu a bubebe kwa ku eza bumaswe,
19paki ya twaezi ku bulela buhata,
ni mutu wa mifili-fili wa balikani.
Litemuso ze ñwi ka buhule
20Mwan'a ka, eza s'a ku bulelela ndat'aho, mi u si ke wa libala z'a ku lutile m'aho. 21Buluka manzwi a bona ka linako kaufela, u nz'o a pakezi mwa pilu ya hao. 22Lituto za bona li ta ku etelela ha u zamaya, li ku sileleze busihu, mi li ku eleze musihali. 23Mulao ni lituto za bona ki liseli le li benya. Likalimelo za bona li ta ku luta mo u swanezi ku pilela. 24Li ta ku zwisa kwa basali ba ba maswe, kwa manzwi a tiseza takazo kwa basali ba batu. 25U si ke wa likwa ki bunde bwa bona. U si ke wa swasiwa ki meeto a bona a kobeta. 26Munna u kona ku sebelisa lihule ka teko ya sinkwa, kono bubuki bu ka mu ngela z'a na ni zona kamukana.
27Kana u ka lwala mulilo fa sifuba sa hao u sa cisi liapalo za hao? 28U ka zamaya fa mashala a cisa, mahutu a hao a sa ci, naa? 29Kwa swana ni ku lobala ni musal'a mutu. Ya eza cwalo kaufela u ta nyanda. 30Batu ha ba nyazi lisholi haiba a uzwa lico h'a lapile. 31Kono haiba a swaliwa, u swanezi ku lifiswa hasupile ni ku fita. U lukela ku lifa s'a na ni sona kamukana. 32Kono mutu ya buka h'a na ngana. U isinya ili yena. 33U ta natiwa, mi a si ke a kutekiwa. Ku shwaulwa kwa hae ha ku na ku fela. 34Munna h'a nyemi hahulu sina ya na ni lifufa. Ku kutiseza kwa hae ha ku feli. 35H'a na ku amuhela tifo ifi kamba ifi. Ha ku na mpo ye ka mu wisa pilu.
Lozi Interconfessional Bible, Catholic Edition © Bible Society of Zambia, 2009.