Mashitanguti 5
5
Litemuso bakeñisa buhule
1Mwan'a ka, u tokomele, mi u teeleze ku za butali bwa ka ni mo ni lemuhela lika. 2Fohe, u ta ziba ku ba ni buiswalo, mi manzwi a hao a ta bonisa kuli u na ni zibo. 3Milomo ya musal'a mutu i ka ba munati sina linosi ni kalole ka hae ka be bunde sina mafula a olive. 4Kono ha ku se ku felile kaufela, u ku siya u si na ni se sikana haisi feela lipilaelo ni butuku mwa pilu. 5U ta ku isa mwa lifasi la ba ba shwile. Nzila y'a zamaya ki nzila ye ya kwa lifu. 6H'a ini mwa nzila ye ya kwa bupilo. U zwa ku yona a nz'a yambaela, kono yena h'a lemuhi.
7Cwale mu ni teeleze, bana ba ka, mi mu si ke mwa libala ni kamuta se ni bulela. 8Mu ambuke basali ba ba cwalo! Mu si ke mwa lika nihaili ku ya fakaufi ni munyako wa bona! 9Haiba mu ka eza cwalo, ba bañwi ba ta mi amuha likute le ne mu na ni lona, mi mu ta shwela mwa mazoho a ba ba na ni situhu mu sa li ba banca. 10Ee, batu ba sili ba ta nga liluwo la mina kaufela, mi ze mu ipelekezi li ta ba za batu ba sili. 11Mu ta lapalala mu nze mu tongela fa mimbeta ya mina fo mu ta shwela, mibili ni linama za mina ha li nze li fela. 12Mu ta li, “Kiñi ha ne lu si ka ituta? Kiñi ha ne lu si ka lumelela batu ku lu eleza? 13Ne lu sa utwi baluti ba luna. Ne lu sa isi pilu ku bona. 14Mi cwale lu ipumana lu ishwauzi patalaza!”
15Mu sepahale kwa basali ba mina, mi mu late bona feela. 16Bana be mu pepa kwa basali ba sili, ha ba na ku mi tusa se siñwi. 17Bana ba mina ba lukela ku hula ni ku mi tusa, isiñi ku tusa ba sili. 18Cwale mu ine ni basali ba mina ka kozo, mi mu fumane tabo ya mina kwa likalibe be mu nyezi, ili likalibe ba bande ba ba kateleha sina mazwii. 19Mu katelwe libupeho za bona kamita. Mi lilato la bona li mi beye mwahali. 20Bana ba ka, se si mi latisa basali ba sili ki sifi? Mu lakalezañi basali ba batu? 21Muñ'a Bupilo u bona ze mu eza kaufela. Kai ni kai ko mu ya, u mi talimezi. 22Libi za mutu ya maswe ki silaha. U swaseha mwa kanyandi ka sibi sa hae luli. 23Wa shwa kakuli h'a na buiswalo. U ta isiwa ki bukuba bwa hae mwa libita.
Lozi Interconfessional Bible, Catholic Edition © Bible Society of Zambia, 2009.