Mashitanguti 4
4
Lituso za butali
1Bana, mu utwe z'a mi luta ndat'a mina. Mu ise kwateñi lipilu, mi mu ta ba ni kutwisiso. 2Ni mi luta ze nde. Cwalehe, mu li hupule kaufel'a zona. 3Ne ni sa li yo munyinyani, ili na feela mwana wa mushimani mwa mba ya luna. 4Ka nako yeo bo ndate ne ba ni luta. Ne ba li, “U hupule se ni bulela mi u si ke wa si libala ni kamuta. U eze se ni ku bulelela, mi u ta pila. 5Ikungele butali ni ku lemuha lika! U si ke wa libala kamba ku limbulula ze ni bulela. 6U si ke wa tuhela butali, mi bu ta ku sileleza. Bu late, mi bu ta ku pilisa. 7Ku ipatela butali ki yona nto luli ya butokwa y'o ta eza. Niha u ka ipatela ze ñwi, ipatele pili ku lemuha lika. 8U late butali, mi bu ta ku hulisa. U bu apale mi bu ta ku tiseza likute. 9Bu ta ba inge kuwani ya bulena kwa toho ya hao.”
10Ni teeleze, mwan'a ka. Ze ni ku bulelela u li nge ka tokomelo, mi li ta ku fa bupilo bo butelele. 11Ni ku lutile butali ni mo ku pilelwa hande. 12Ha ku na se si ta ku kwalela mwa nzila haiba u zamaya mwateñi ka butali, mi niha u mata ha u na ku sitatala. 13U hupule kamita z'o itutile. Tuto ya hao ki bona bupilo bwa hao. I babalele hande. 14U si ke wa ya ko ba ya batu ba ba maswe. U si ke wa latelela mutala wa ba ba maswe. 15U si ke wa eza cwalo! U be kwahule ni ze maswe! U li hane, mi u ikele. 16Batu ba ba maswe ha ba lobali konji ha ba se ba ezize se siñwi se si maswe. Ba ka tona honacwalo haisi ha ba ka utwisa yo muñwi butuku. 17Ku bona, lindwa ni bumaswe li swana sina mezi ni sico.
18Mwa nzila mo ku zamaya ba ba lukile ku swana ni lizazi ha li pazula, liseli li nze li ekezeha mane i be musihali-tuna. 19Kono nzila ya ba ba maswe, yona, i lififi sina busihu. Ba wa, kono ha ba boni se si ba wisa.
20Mwan'a ka, u ise pilu ku ze ni bulela. U utwe manzwi a ka. 21A si ke a zwa ku wena. U a hupule mi u a late. 22A ta fa mañi ni mañi y'a utwisisa bupilo bo bunde. 23U tokomele mihupulo ya hao, kakuli bupilo bwa hao bu lukiswa ki yona. 24U si ke wa bulela ni kamuta sika se si sa niti. U si ke wa bulela buhata kamba manzwi a kelusa ba bañwi. 25U talime feela kwapili ka sepo. U si ke wa inyongamena kabakala maswabi. 26#Maheb 12.13 U nahane hande s'o eza kamukana mi si ta konda. 27U keluhe bumaswe, mi u zwele feela pili. U si ke wa keluha mwa nzila ye lukile niha i ka ba ka litambo li li liñwi feela.
Lozi Interconfessional Bible, Catholic Edition © Bible Society of Zambia, 2009.