Mashitanguti 3
3
Likelezo ku ba banca
1Mwan'a ka, u si ke wa libala se ni ku luta. Ka linako kaufela u hupule ku eza se ni ku bulelela. 2Lituto za ka, li ta ku fumanisa bupilo bo butelele bwa buiketo. 3Likute ni busepahali li si ke za kauhana ni wena. U li tamelele mwa mulala wa hao, mi u li ñole mwa pilu ya hao. 4#Luk 2.52 Haiba u ka eza cwalo, Mulimu ni batu ba ta ku tabela.
5Sepa Muñ'a Bupilo ka pilu ya hao kaufela. U si ke wa itinga ku z'o hupula kuli wa li ziba. 6Hupula Muñ'a Bupilo mwa lika kaufela z'o eza, mi u ta ku supeza nzila ye lukile. 7#Baro 12.16 U si ke wa ipona butali ku fita m'o inezi. Saba feela Muñ'a Bupilo, mi u hane ku eza se si si ka luka. 8Ha u ka eza cwalo, i ka ba sina mulyani o munde, o folisa litombo za hao ni ku kokobeza butuku. 9Kuteka Muñ'a Bupilo ka ku mu ezeza limpo ka lika ze nde z'o fumani mwa masimu a hao. 10Haiba u eza cwalo, matuli a hao a ka tala mabele. U ta ba ni waine ye ñata y'o ka palelwa ku buluka.
11 #
Job 5.17
#Maheb 12.5-6 Mwan'a ka, Muñ'a Bupilo h'a ku sikulula, u teeleze manzwi a hae ka tokomelo, mi u a nge sina temuso. 12#Sin 3.19 Muñ'a Bupilo u sikulula b'a lata, sina mushemi h'a sikulula mwana y'a itumba ka yena. 13U na ni mbuyoti mutu ya na ni butali ni kutwisiso. 14Butali bu kutiseza hahulu ku fita silivela. Ku wena ki bwa butokwa ku fita gauda. 15Butali ki nto ya butokwa ku fita macwe a mikabo. Ha ku na s'o ka lakaza s'o ka bu likanya ni sona. 16Butali bu ku fumanisa bupilo bo butelele, hamohocwalo ni bufumu ni likute. 17Butali bu kona ku tahisa buiketo mwa bupilo bwa hao, mi bu ku zwisezepili hande. 18Ba ba na ni butali ba na ni litohonolo. Butali bu ta ba pilisa.
19Muñ'a Bupilo u ezize lifasi ka butali bwa hae,
mi ka zibo ya hae u beile lihalimu mwa sibaka sa lona.
20Linuka li bubiswa ki butali bwa hae,
mi i sa li ka bona malu a tisa pula fafasi.
21Mwan'a ka, tiyela fa butali bwa hao, ni fa ku lemuha lika. U si ke wa li tuhela li ku siya. 22Li ta ku fumanisa bupilo, ili bupilo bo bunde bwa tabo. 23U ta zamaya hande mwa nzila ya hao mi ha u na ku sitatala. 24Ha u na ku saba ha u y'o lobala, mi u ta lobala hande busihu kaufela. 25Ha u na ku sabiswa ki liziezi ze ka ku tahela ka sipundumukela, ze tela ba ba maswe sina liñungwa. 26Muñ'a Bupilo u ta ku tokomela. H'a na ku ku tuhela u wela mwa siteo.
27 #
Litu 4.3
M'o konela kaufela, u tuse ba ba tokwa tuso. 28U si ke wa bulelela y'o yahile ni yena kuli a litele konji kamuso, haiba u kona ku mu tusa hona fo. 29U si ke wa eza mulelo o ta utwisa wahenu butuku. U pila kwatuko a hao mi u ku sepile. 30U si ke wa kanana ni yo muñwi ku si na libaka, h'a si ka ku utwisa butuku. 31U si ke wa shwela muna batu ba ba bambabile, kamba ku lela ku eza sina mo ba ezeza. 32Muñ'a Bupilo u toile ba ba eza ze maswe, kono u tabela batu ba ba lukile. 33Muñ'a Bupilo u kuta mandu a batu ba ba maswe, kono u fuyaula mandu a ba ba lukile. 34#Jak 4.6; 1 Pit 5.5 H'a na taba ni baikuhumusi, kono u bonisa lilato ku ba ba ikokobeza. 35Batu ba ba butali ba ta fumana kabubo ka ka kutekeha, kono haili likuba, zona, li ta ekeza feela kwa maswabi a zona.
Lozi Interconfessional Bible, Catholic Edition © Bible Society of Zambia, 2009.