Mashitanguti 2
2
Mipuzo ya butali
1Mwan'a ka, itute ze ni ku luta, mi u si ke wa libala ze ni ku bulelela kuli u li eze. 2U teeleze ku za ngana, mi u like ku li utwisisa. 3Ee, kupa zibo. U lilele ku lemuha lika. 4I bate ka tata sina m'o ka batela mali, kamba bufumu bo buñwi bo bu patilwe. 5Haiba u eza cwalo, u ta ziba se si taluswa ka ku saba Muñ'a Bupilo, mi u ta kona ku ituta hande za Mulimu. 6#But 9.10; Litu 1.1Ki Muñ'a Bupilo ya fana butali. Zibo ni kutwisiso li zwa ku yena. 7U fa tuso ni silelezo ku ba ba lukile, ili batu ba ba sepahala. 8U sileleza ba ba eza ba bañwi hande, mi u babalela ba ba ineezi ku yena.
9Haiba u ni teeleza u ta ziba se si lukile, s'e li sa niti ni se si swanela. U ta ziba s'o swanezi ku eza. 10U ta ba ni butali, mi zibo ya hao i ta ku tabisa. 11Ku lemuha lika ni kutwisiso ya hao li ta ku sileleza. 12Li ta ku hanisa ku eza sifi ni sifi se si maswe. Li ta ku zwisa kwa batu ba ba zusa mifili-fili ka ze ba bulela. 13Li ta ku zwisa kwa batu ba ba tuhezi bupilo bo bunde ku y'o pila mwa lififi la sibi. 14Li ta ku zwisa kwa batu ba ba tabela ku eza ze fosahalile, mi ba ikola ze maswe. 15Ki batu ba ba si na tuso, ba ba sa sepahali.
16U ta ambuka basali ba mahule ba ba lika ku ku kelusa ka lipulelo za bona za kalole. 17Basali bao ba sa sepahali kwa banna ba bona, mi ba libala buitamo bwa bona bo bu kenile. 18Haiba u ya kwa mandu a bona, u zibe kuli u zamaya mwa nzila ye ku isa kwa lifu. Ku ya kwateñi ki ku sutelela kwa lifasi la ba ba shwile. 19Ha ku na ya ba potela ya kuta hape. H'a sa tola a kutela kwa nzila ye isa kwa bupilo. 20Cwale u pile ka bupilo bo bu piliwa ki batu ba bande, mi u latelele mutala wa ba ba lukile. 21Batu ba ba lukile, batu ba ba sepahala, ki bona ba ba ta ina mwa naha ya luna ye. 22Kono Mulimu u ta pamula batu ba ba maswe mwa naha, mi a kumaule baezalibi ba ba mwateñi sina limela ze mwa mubu.
Lozi Interconfessional Bible, Catholic Edition © Bible Society of Zambia, 2009.